ລາຍລະອຽດຂ່າວ
ໄອແລນເໜືອ ແລະ ສະໂລວາເກຍ ໄດ້ຜ່ານເຂົ້າຮອບ 16 ທີມໃນຖານະທີມອັນດັບ 3 ທີ່ມີຄະແນນທີ່່ດີທີ່ສຸດ
ຂຽນເມື່ອ: 22/06/2016 13:06 | ໂດຍ: ເພຣເມັກເກີ | ອ່ານ: 914 ຄັ້ງ

      ການແຂ່ງຂັນບານເຕະຢູໂຣ 2016 ຜ່ານຮອດເຊົ້າຂອງມື້ນີ້, ໄດ້ມີຫຼາຍເຫດການ ເກີດຂຶ້ນບໍ່ວ່າຈະເປັນ ເສື້ອນັກກິລາຂາດ ໃນນັດດຽວເຖິງ 4 ໂຕ, ບານແຕກ ແລະອື່ນໆ ອີກ ນອກຈາກນີ້ທີມນ້ອຍ ກໍ່ສາມາດເອົາຊະນະ ທີມຍັກໃຫຍ່ ຂອງວົງການບານເຕະໄດ້. ມາຮອດມື້ນີ້ 4 ກຸ່ມໃນທັງໝົດ 6 ກຸ່ມກໍ່ແຂ່ງຂັນສໍາເລັດແລ້ວ ເຮັດໃຫ້ຮູ້ວ່າທີມ ທີ່ຈະຜ່ານເຂົ້າໄປຫຼິ້ນຮອບ 16 ທີມສຸດທ້າຍ ມີທີມໃດແດ່. ສໍາລັບທີມທີ່ແຂ່ງຂັນຄົບ ໃນຮອບແບ່ງກຸ່ມ ທີ່ຜ່ານເຂົ້າຮອບ ໂດຍເປັນອັນດັບ 1 ແລະ 2 ມີປະກອບ: ຝລັ່ງ, ສະວິດເຊີແລນ, ເວວ, ອັງກິດ, ເຢຍລະມັນ, ໂປແລນ, ໂຄຣເອເຊຍ ແລະ ສະເປນ. ໃນນັ້ນທີມອັນດັບ 3 ຂອງທັງ 4 ກຸ່ມປະກອບດ້ວຍ ສະໂລວາເກຍ ມີ 4 ຄະແນນ ປະຕູໄດ້ເສຍ 0, ໄອແລນເໜືອ ມີ 3 ຄະແນນ ປະຕູໄດ້ເສຍ 0, ຕວັກກີ ມີ 3 ຄະແນນ ປະຕູໄດ້ເສຍ -2 ແລະ ແອວບາເນຍ ມີ 3 ຄະແນນ ປະຕູໄດ້ເສຍ -2. ສະນັ້ນທີມທີ່ຜ່ານເຂົ້າຮອບ ໃນຖານະທີມອັນດັບ 3 ທີ່ມີຄະແນນທີ່ດີທີ່ສຸດ 4 ທີມທີ່ແນ່ນອນແລ້ວມີ 2 ທີມ ຄືສະໂລວາເກຍ ແລະ ໄອແລນເໜືອ ໂດຍບໍ່ຈໍາເປັນຕ້ອງຖ້າ ຜົນການແຂ່ງຂັນຂອງອີກ 2 ກຸ່ມທີ່ຍັງເຫຼືອ. ນອກຈາກນີ້ ທີມທີ່ຍັງບໍ່ທັນແຂ່ງສໍາເລັດ ແຕ່ຜ່ານເຂົ້າໄປຖ້າໃນຮອບ 16 ທີມຮຽບຮ້ອຍກໍ່ຍັງມີ ອີຕາລີ ທີ່ໄດ້ເປັນທີມອັນດັບ 1 ຂອງກຸ່ມ E ເປັນທີ່ຮຽບຮ້ອຍ.

ພາບຂ່າວຈາກ:​ www.bbc.com

ໂດຍ: ເພຣເມັກເກີ

 




ຂ່າວຍອດນິຍົມ 7 ວັນລ່າສຸດ