ລາຍລະອຽດຂ່າວ
ສະຖານະການ ກ່ອນລົງສະໜາມຂອງກຸ່ມB
ຂຽນເມື່ອ: 20/06/2016 15:06 | ໂດຍ: ເພຣເມັກເກີ | ອ່ານ: 743 ຄັ້ງ

     ຫຼັງຈາກຈົບ ການແຂ່ງຂັນຄົບທີມລະ 2 ນັດຂອງທຸກທີມ ໃນກຸ່ມຜົນປະກົດວ່າ ອັງກິດມີ 4 ຄະແນນເປັນ ທີມນຳຂອງກຸ່ມ ມີລູກໄດ້ +1, ຕາມມາດ້ວຍທີມ ເວວແລະສະໂລວາເກຍທີ່ ມີ 3 ຄະແນນປະຕູ ໄດ້ເສຍ 0 ເທົ່າກັນ ແລະ ສຸດທ້າຍແມ່ນທີມ ໝີຂາວ ຣັດເຊຍ ມີ 1 ຄະແນນ ປະຕູໄດ້ເສຍ -1     

    ຈາກຄະແນນ ລ່າສຸດເຫັນວ່າທຸກທີມ ຍັງມີໂອກາດເຂົ້າຮອບ ຖ້າຫາກສາມາດ ເອົາຊະນະຄູ່ຕໍ່ສູ້ ໃນການແຂ່ງຂັນ ນັດສຸດທ້າຍ ຂອງກຸ່ມເຊິ່ງ ຈະເລີ່ມແຂ່ງຂັນກັນເວລາ 02:00 ພ້ອມກັນທັງ 2 ຄູ່ ແລະ ຖ້າທີມໃດເສຍ ມີໂອກາດຕົກຮອບທັນທີ, ເຮັດໃຫ້ ເກມທີ່ຈະມີຂຶ້ນ ໃນຕອນເດິກຂອງມື້ນີ້ ຫຼື ວ່າຕອນເຊົ້າຂອງມື້ອື່ນ ອອກມາມ່ວນແນ່ນອນ.

       ວິເຄາະຄູ່ລະຫວ່າງ ອັງກິດ ພົບກັບ ສະໂລວະເກຍ: ຮອດເວລານີ້ ອັງກິດ ຖືວ່າເປັນທີມ ທີ່ຫຼິ້ນໄດ້ດີແຕ່ຫຼາຍຄັ້ງຍັງ ຈົບສະກໍບໍ່ໄດ້ ແລະ ນັດລ່າສຸດຕ້ອງໄດ້ ອາໃສການຍິງຂອງ 2 ໂຕສຳຮອງຢ່າງ ຈິມມີ້ ວາດີ ແລະ ເດນ້ຽວ ສະເຕີຣິດ ຈຶ່ງສາມາດພິກ ສະຖານະການ ກັບມາຊະນະ ເວວໄດ້, ຖ້າປຽບທຽບ ທາງດ້ານໂຕຜູ້ຫຼິ້ນ ແລ້ວອັງກິດເປັນຕໍ່ຫຼາຍຂຸມ ແຕ່ກໍ່ບໍ່ອາດປະໝາດ ສະໂລວະເກຍ ເຊິ່ງເປັນທີມທີ່ ສາມາດຕໍ່ກອນ ກັບທີມໃຫຍ່ໄດ້ດີ, ເຊິ່ງເກມທີ່ພວກເຂົາພົບກັບ ຣັດເຊຍ ກໍ່ໄດ້ພິສູດໃຫ້ເຫັນມາແລ້ວ ເຊິ່ງຜົນປະກົດວ່າ ພວກເຂົາຊະນະ 2-1. ສະນັ້ນ ບໍ່ມີທີມໃດທີ່ຈະ ຜ່ານພວກເຂົາໄປໄດ້ງ່າຍໆ ແລະ ໃນນັດນີ້ຢ່າງໜ້ອຍ ພວກເຂົາຕ້ອງການຄະແນນ ເພື່ອຫວັງທີ່ຈະເຂົ້າຮອບຕໍ່ໄປ. ເກມການແຂ່ງຂັນໃນຄູ່ນີ້ ໜ້າຈະອອກມາມ່ວນແນ່ນອນ, ຖ້າກອງໜ້າອັງກິດ ຍັງບໍ່ຄົມຄືນັດຜ່ານມາ ຈົບເກມອາດມີຜົນສະເໝີ ຫຼື ເກີດເຊີໄພຣ ຂຶ້ນມາກໍ່ໄດ້ ເໝືອນດັ່ງຄູ່ ໂຣມາເນຍ ກັບ ແອວເບເນຍ ໃນກຸ່ມ A ກໍ່ອາດເປັນໄດ້.

      ສ່ວນຄູ່ລະຫວ່າງ ຣັດເຊຍ ພົບກັບ ເວວ: ຄູ່ນີ້ ຣັດເຊຍ ຕ້ອງການ 3 ຄະແນນສະຖານດຽວ ເພື່ອຫວັງເຂົ້າຮອບຕໍ່ໄປ, ສ່ວນ ເວວ ເອງຢ່າງໜ້ອຍ ກໍ່ຕ້ອງບໍ່ເສຍ ເພື່ອຫວັງເຂົ້າຮອບຕໍ່ໄປເຊັ່ນກັນ ແຕ່ຖ້າສາມາດ ເອົາຊະນະໄດ້ ຈະໄດ້ເຂົາຮອບທັນທີ ບໍ່ດັ່ງນັ້ນກໍ່ຕ້ອງ ຫວັງໃຫ້ໄດ້ 1 ຄະແນນ ເພື່ອຫວັງໃຫ້ໄດ້ເປັນທີ 3 ທີ່ດີທີ່ສຸດ 4 ທີມຈາກທັງໝົດ 6 ກຸ່ມເພື່ອເຂົ້າຮອບຕໍ່ໄປ. ຈາກສະຖິຕິ ທີ່ເຄີຍຜົບກັນຜ່ານມາ 3 ຄັ້ງຫຼັງສຸດ ຣັດເຊຍ ເປັນຝ່າຍທີ່ສາມາດ ເອົາຊະນະລວດ ເຫັນໄດ້ວ່າ ຄູ່ນີ້ຂ້ອນຂ່າງເປັນເກມແພ້ທາງກັນ. ໂດຍທົ່ວໄປແລ້ວ ຣັດເຊຍ ເປັນທີມທີ່ມີ ການປະສານງານ ພາຍໃນທີມເປັນຢ່າງດີ ແຕ່ສ່ວນ ເວວ ຍັງອາໃສຄວາມສາມາດ ສະເພາະຕົວຂອງຜູ້ຫຼິ້ນ ເປັນສ່ວນໃຫຍ່ ໂດຍສະເພາະແມ່ນ ເກເຣັດ ເບວ, ເກມນີ້ໜ້າຈະເປີດສາກ ໂດຍການບຸກເຂົ້າໃສ່ຂອງຣັດເຊຍ ແລະ ເວວ ຄົງຕັ້ງຮັບ ແລ້ວຫາໂອກາດ ໂຕ້ກັບ ແລະ ອາດມີລຸ້ນປະຕູຈາກ ລູກຟຣີຄຣິກ. ຄູ່ນີ້ຣັດເຊຍຂ້ອນຂ້າງໄດ້ປຽບ ແລະ ໜ້າຈະເອົາຊະນະເວວໄດ້ຕາມເຄີຍ.

ໂດຍ: ເພຣເມັກເກີ




ຂ່າວຍອດນິຍົມ 7 ວັນລ່າສຸດ