ລາຍລະອຽດຂ່າວ
ການເກັບຄະແນນສະສົມ National Ranking ໃນການແຂ່ງຂັນກິລາ ດອກປີກໄກ່ທົ່ວປະເທດ ຄັ້ງທີ 16
ຂຽນເມື່ອ: 06/08/2016 08:08 | ໂດຍ: ແອັດມິນ | ອ່ານ: 758 ຄັ້ງ

   ການແຂ່ງຂັນກິລາ ດອກປີກໄກ່ທົ່ວປະເທດ ຄັ້ງທີ 16 ໄດ້ດຳເນີນມາຮອບວັນທີ 3 ຂອງການແຂ່ງຂັນ ແລະ ການແຂ່ງຂັນກໍ່ນັບມື້ນັ້ບເຂັມຂຸ້ນ ແລະ ດຸເດືອນຂຶ້ນເລື້ອຍໆ ເພາະແຕ່ລະນັດຂອງການແຂ່ງຂັນ ແມ່ນແຂ່ງແບບແພ້ຄັດອອກ (Knock-out) ເຊິ່ງມື້ວານນີ້ ພາຍຫຼັງທີ່ຈົບການແຂ່ງຂັນໃນວັນທີ 2, ທາງສະຫະພັນກິລາ ດອກປີກໄກ່ແຫ່ງຊາດ ໄດ້ອອກແຈ້ງການເຖິງບັນດານັກກິລາ ທີ່ເຂົ້າຮ່ວມການແຂ່ງຂັນໃນຄັ້ງນີ້ ເຖິງການເກັບຄະແນນສະສົມ National Ranking ດັ່ງນີ້:

 " ຂໍແຈ້ງມາຍັງນັກກິລາດອກປີກໄກ່ ທີ່ລົງແຂ່ງຂັນໃນລາຍການ ແຂ່ງຂັນດອກປີກໄກ່ທົ່ວປະເທດ ຄັ້ງທີ 16 ຊິງຂັນປະທານສະພາແຫ່ງຊາດ 2016 ຊາບທົ່ວເຖິງກັນ
ເລື່ອງ: ການເກັບຄະແນນສະສົມ National Ranking ດັ່ງນີ້:
1. ທາງສະຫະພັນ ໄດ້ມີການຕົກລົງໃຫ້ຄະແນນກັບ ປະເພດຄູ່ເຍົາວະຊົນຊາຍ 16 ປີ ແລະ ດ່ຽວຊາຍທົ່ວໄປ ທີ່ຜ່ານເຂົ້າຮອບ 16 ທີມສຸດທ້າຍ ຈຳນວນ 35 ຄະແນນ ແລະ ຄູ່ຊາຍທົ່ວໄປ ທີ່ຜ່ານເຂົ້າຮອບ 16 ທີມສຸດທ້າຍຈຳນວນ 50 ຄະແນນ
2. ສຳລັບປະເພດ ຄູ່ເຍົາວະຊົນຍິງ 16 ປີ ຈະໄດ້ຄະແນນສະສົມ ແຕ່ທີມທີ່ໄດ້ຊະນະເລີດ ແລະ ຮອງຊະນະເລີດເທົ່ານັ້ນ ເນື່ອງຈາກມີພຽງແຕ່ 4 ທີມລົງແຂ່ງຂັນ
3. ສຳລັບປະເພດ ດ່ຽວຍິງທົ່ວໄປ ແລະ ຄູ່ຍິງທົ່ວໄປ ຈະໃຫ້ຄະແນນສະສົມ ແກ່ທີມທີ່ໄດ້ເຂົ້າຮອບ 4 ທີມເທົ່ານັ້ນ ເນື່ອງຈາກມີພຽງ 10 ຄົນ ແລະ 7 ຄູ່ລົງແຂ່ງຂັນເທົ່ານັ້ນ
4. ປະເພດຄູ່ປະສົມຍັງຮັກສາ ການເກັບຄະແນນສະສົມ ໄວ້ຄືເກົ່າຄື ນັບແຕ່ຮອບ 8 ທີມສຸດທ້າຍໄປ
5. ປະເພດຄູ່ອາວຸໂສຍິງ ແລະ ຊາຍ ຈະບໍ່ໄດ້ມີການເກັບຄະແນນສະສົມ

   ດັ່ງນັ້ນ, ຈຶ່ງໄດ້ແຈ້ງມາຍັງນັກກິລາທຸກຄົນ ເພື່ອຊາບຕາມນີ້
ສະຫະພັນກິລາດອກປີກໄກ່ແຫ່ງຊາດ "

   ທາງສະຫະພັນກິລາ ດອກປີກໄກ່ແຫ່ງຊາດ ຍັງໄດ້ແຈ້ງກັບທີມງານ laosportnews ຂອງພວກເຮົາວ່າ ການເກັບຄະນແນນສະສົມ National Ranking ໃນຄັ້ງນີ້ແມ່ນເປັນຄັ້ງທຳອິດ ຂອງການແຂ່ງຂັນ ກິລາດອກປີກໄກ່ລາວ ແລະ ຈະກາຍເປັນມາດຕະຖານອັນໝຶ່ງ ໃຫ້ກັບນັກກິລາດອກປີກໄກ່ລາວ ເຊິ່ງຈະເຮັດໃຫ້ ການຄັດເລືອກນັກກິລາ ເຂົ້າຮ່ວມການແຂ່ງຂັນລາຍການຕ່າງໆ ທັງພາຍໃນ ແລະ ຕ່າງປະເທດ ເປັນລະບົບຫຼາຍຂຶ້ນ ແລະ ເປັນໄປຕາມຫຼັກການ ແລະ ຮູບແບບດຽວກັບສາກົນ ພ້ອມນັ້ນ ການແຂ່ງຂັນກິລາ ດອກປີກໄກ່ ໃນຄັ້ງຕໍ່ໄປ ຈະມີຄວາມເປັນມາດຕະຖານ ແລະ ດຸເດືອນເຂັ້ມຂຸ້ນຂຶ້ນໄປເລື່ອຍໆ.