ລາຍລະອຽດຂ່າວ
ອັບເດດຜົນການແຂ່ງຂັນ ແລະ ເຫດການເດັ່ນ ວັນທີ 2 ຂອງການແຂ່ງຂັນກິລາ ດອກປີກໄກ່ທົ່ວປະເທດ ຄັ້ງທີ 16
ຂຽນເມື່ອ: 06/08/2016 07:08 | ໂດຍ: ແອັດມິນ | ອ່ານ: 623 ຄັ້ງ

   ການແຂ່ງຂັນກິລາ ດອກປີກໄກ່ທົ່ວປະເທດ ຄັ້ງທີ 16 ຊີງຂັນທ່ານປະທານສະພາແຫ່ງຊາດ ທີ່ແຂ່ງຂັນກັນລະຫວ່າງ ວັນທີ 04 ເຖິງ 07 ສິງຫາ ທີ່ສະໂມສອນ ດອກປີກໄກ່ ບຶງຂະຫຍອງ ນະຄອນຫຼວງວຽງຈັນ ມີການແຂ່ງຂັນທັງໝົດ 9 ປະເພດ ແລະ ໄດ້ສຳເລັດການແຂ່ງຂັນວັນທີ 2 ຂອງການແຂ່ງຂັນແລ້ວ.

   ສຳລັບມື້ວານນີ້ ວັນທີ 05 ສິງຫາ ເປັນວັນທີ 2 ຂອງການແຂ່ງຂັນ ເຊິ່ງໄດ້ມີການແຂ່ງຂັນທັງໝົດ 76 ນັດໃນ 7 ປະເພດຄື:
ຄູ່ເຍົາວະຊົນຍິງ 16 ປີ ຈະແຂ່ງ 2 ນັດ
ຄູ່ເຍົາວະຊົນຊາຍ 16 ປີ ຈະແຂ່ງ 16 ນັດ
ດ່ຽວຊາຍທົ່ວໄປ ຈະແຂ່ງ 24 ນັດ
ດ່ຽວຍິງທົ່ວໄປ ຈະແຂ່ງ 2 ນັດ
ຄູ່ຊາຍທົ່ວໄປ ຈະແຂ່ງ 24 ນັດ
ຄູ່ປະສົມທົ່ວໄປ ຈະແຂ່ງ 6 ນັດ
ຄູ່ອາວຸໂສຍິງ 35 ປີ ຈະແຂ່ງ 2 ນັດ

   ໃນການແຂ່ງຂັນ ໃນວັນທີ 05 ສິງຫາຜ່ານມານີ້ ຄູ່ທີ່ສຳຄັນ ແລະ ໂດດເດັ່ນແມ່ນ ປະເທດຄູ່ເຍົາວະຊົນຊາຍ ອາຍຸບໍ່ເກີນ 16 ປີ ຮອບ 16 ທີມ ນັດທີ 25 ເປັນການພົບກັນລະຫວ່າງຄູ່ຂອງ ທ້າວ ເລັກໂຕ້+ທາວ ແກ້ວອຸດອນ ຈາກສະໂມສອນເມືອງວັງວຽງ ພົບກັບ ຄູ່ຂອງ  ທ້າວ ດາວມີໄຊ+ທ້າວ ເກດຕິຍະ ຈາກ ສະໂມສອນມັນທາຕຸລາດ ເຊິ່ງຈາກການຕິດຕາມຂອງທີມງານ laosportnews ຢາງໃກ້ຊິດຕິດຂອບສະໜາມແລ້ວ ເຫັນວ່າຄູ່ນີ້ແມ່ນມີຄວາມດຸເດືອດ ສູສີກັນຫຼາຍ ແລະ ຖືກຍົກໃຫ້ເປັນຄູ່ເດັ່ນປະຈຳວັນໄປເລີຍ, ພ້ອມກັນນັ້ນ ທາງດ້ານຂອງກອງເຊຍ ຂອງແຕ່ລະຝ່າຍ ກໍ່ໄດ້ສົ່ງສຽງເຊຍໃຫ້ກຳລັງໃຈ ນັກກິລາຂອງຕົນຢ່າງຝົດຝື້ນ ໂດຍສະເພາະກອງເຊຍຂອງ ສະໂມສອນມັນທາຕະລາດ ທີ່ສົ່ງເສຍເຊຍເປັນຈັງວະຢ່າງພ້ອມພຽງ ແລະ ກາຍເປັນສີສັນຂອງການແຂ່ງຂັນໄປເລີຍ ແລະ ຜົນການແຂ່ງຂັນແມ່ນ ຄູ່ຈາກ ສະໂມສອນມັນທາຕຸລາດ ເອົາຊະນະໄປດ້ວຍຄະແນນ 2 ຕໍ່ 1 ເຊັດ ຢ່າງສຸດມັນ ແລະ ອີກຄູ່ 1 ທິ່ເປັນຄູ່ເດັ່ນປະຈຳວັນ ວັນທີ 05 ສິງຫາ ແມ່ນປະເພດຄູ່ຊາຍ ອາຍູບໍ່ເກີນ 16 ປີເຊັນກັນ ເປັນການພົບກັນ ລະຫວ່າງຄູ່ຂອງ ທ້າວ ຢູໂຣ+ທ້າວ ວິໄລກອນ ຈາກສະໂມສອນຕິນາ ແລະ ຄູ່ຂອງ ທ້າວ ອາເລັກ+ທ້າວ ຄຳໄຊ ຈາກແຂວງຫົວພັນ ຄູ່ນີ້ຈຸດພິເສດແມ່ນຢູ່ບ່ອນວ່າ ຄູ່ຈາກຈາກສະໂມສອນຕິນາ ເສຍປຽບທາງດ້ານຮູບຮ່າງ ແລະ ອາຍຸ ເຊິ່ງອາຍຸຂອງນັກກິລາ ຈາກຈາກສະໂມສອນຕິນາ ແມ່ນມີພຽງ 13 ປີເທົ່ານັ້ນ ແຕ່ຫົວໃຈເກີນຮ້ອຍ ສູ້ບໍ່ຖອຍ ແລະ ໄດ້ຮັບສຽງເຊຍຈາກ ແຟນດອກປີກໄກ່ໃນສະໜາມ ຢ່າງຫຼວງຫຼາຍ ເຊິ່ງຜົນການແຂ່ງຂັນ ສຳລັບຄູ່ນີ້ແມ່ນ ທາງສະໂມສອນຕິນາ ຕ້ານພະລະກຳລັງຂອງ ຄູ່ແຂ່ງບໍ່ໄຫວ ເສຍໃຫ້ຄູ່ຈາກ ແຂວງຫົວພັນ ໄປ 2 ຕໍ່ 0 ເຊັດ.

   ທາງທີມງານ laosportnews ໂດຍການຮ່ວມມືກັບ ສະຫະພັນກິລາ ດອກປີກໄກ່ແຫ່ງຊາດລາວ ຈະນຳເອົາຜົນ ແລະ ຂ່າວສານຕ່າງໆກ່ຽວກັບ ການແຂ່ງຂັນຄັ້ງນີ້ ມາແຈ້ງໃຫ້ທ່ານຊາບເປັນໄລຍະ ເຊິ່ງທ່ານສາມາດອັບເດດ ຜົນການແຂ່ງຂັນແບບ ນັດຕໍ່ນັດໄດ້ທີ່ ເວັບໄຊຂອງສະຫະພັນກິລາ ດອກປີກໄກ່ແຫ່ງຊາດລາວ lbf.laosportnews.com ແລະ ທ່ານຍັງສາມາດຕິດຕາມ ຂ່າວກິລາອື່ນໆທັງພາຍໃນ ແລະ ຕ່າງປະເທດໄດ້ທີ່ laosportnews.com.