ລາຍລະອຽດຂ່າວ
ເຖິງຕົວຈະນ້ອຍ ແຕ່ສູ້ບໍ່ຖອຍ
ຂຽນເມື່ອ: 05/08/2016 21:08 | ໂດຍ: ແອັດມິນ | ອ່ານ: 1646 ຄັ້ງ

   ການແຂ່ງຂັນກິລາ ດອກປີກໄກ່ທົ່ວປະເທດ ຄັ້ງທີ 16 ຊີງຂັນທ່ານປະທານສະພາແຫ່ງຊາດ ທີ່ແຂ່ງຂັນກັນລະຫວ່າງ ວັນທີ 04 ເຖິງ 07 ສິງຫາ ທີ່ສະໂມສອນ ດອກປີກໄກ່ ບຶງຂະຫຍອງ ມີການແຂ່ງຂັນກັນທັງໝົດ 9 ປະເພດ ໄດ້ດຳເນີນເຖິງວັນທີ 2 ຂອງການແຂ່ງຂັນແລ້ວ.

   ສະພາບບັນຍາກາດຂອງ ການແຂ່ງຂັນ ກໍ່ເປັນໄປຕາມປົກກະຕິທົ່ວໆໄປ ເຊິ່ງເມື່ອເຂົ້າມາເຖິງຮອບເລິກໆແລ້ວ ການແຂ່ງຂັນກໍ່ຈະມີຄວາມເຂັ້ມຂຸ້ນ ແລະ ດຸເດືອດກວ່າຮອບຜ່ານມາ. ຈາກການທີ່ໄດ້ໄປຕິດຕາມຂ່າວ ແລະ ຜົນການແຂ່ງຂັນ ແບບຕິດຂອບສະໜາມ ທີມງານຂອງພວກເຮົາ ໄດ້ສັງເກດເຫັນ ແລະ ກໍ່ປະທັບໃຈ ໃນການແຂ່ງຂັນມຶ້ນີ້ກໍ່ຄື ການແຂ່ງຂັນປະເພດຄູ່ຊາຍ ອາຍຸບໍ່ເກີນ 16 ປີ ນັດທີ 28 ເປັນການພົບກັນ ລະຫວ່າງຄູ່ຂອງ ທ້າວ ຢູໂຣ+ທ້າວ ວິໄລກອນ ຈາກສະໂມສອນຕິນາ ແລະ ຄູ່ຂອງ ທ້າວ ອາເລັກ+ທ້າວ ຄຳໄຊ ຈາກແຂວງຫົວພັນ ເຊິ່ງຈຸດທີ່ເຮັດໃຫ້ທີມງານ ຂອງພວກເຮົາຕ້ອງສະດຸດ ໃນສາຍຕາກໍ່ຄື ຄູ່ຈາກສະໂມສອນຕິນາ ແມ່ນມີຮູບຮ່າງນ້ອຍກວ່າ ຄູ່ຈາກແຂວງຫົວພັນ ຢ່າງເຫັນໄດ້ຊັດເຈນ (ຕາມຮູບປະກອບ) ເຊິ່ງທີມງານຂອງພວກເຮົາ ກໍ່ເລີຍໄປສອບຖາມຂໍ້ມູນເພີ່ມເຕີິມ ເລື່ອງອາຍຸຂອງນັກກິລາ ນຳຄະນະກຳມະການ ຈັດການແຂ່ງຂັນ ແລະ ກໍ່ໄດ້ຄຳຕອບວ່າ ຄູ່ຈາກສະໂມສອນຕິນາ ແມ່ນມີອາຍຸພຽງ 13 ປີ ແລະ ເປັນນັກກິລາ ທີ່ອາຍຸນ້ອຍທີ່ສຸດ ໃນການແຂ່ງຂັນຄັ້ງນີ້ ສ່ວນຄູ່ຈາກ ແຂວງຫົວພັນ ແມ່ນອາຍຸ 16 ປີ.

   ການແຂ່ງຂັນໃນຮອບຄັດເລືອກຄູ່ ທ້າວ ຢູໂຣ+ທ້າວ ວິໄລກອນ ເອົາຊະນະຄູ່ຂອງ ທ້າວ ວິລະສັກ+ທ້າວ ອະນຸສອນ ຈາກແຂວງອຸດົມໄຊ ໄປ 2-0 ເຊັດ, ໃນຮອບ 32 ທີມ ພວກເຂົາກໍ່ເອົາຊະນະ ຄູ່ຂອງ ທ້າວ ເພັດນະຄອນ+ທ້າວ ສຸກສາຄອນ ຈາກ ສະໂມສອນ ມິດຕະພາບທ່າງອນ ໄປ 2-0 ເຊັດ ແລະ ມາຮອດ ຮອບ 16 ທີມສຸດທ້າຍ ນັດທີ 28 ຄູ່ຂອງ ສະໂມສອນຕິນາ ໄດ້ມາພົບກັບ ຄູ່ຈາກແຂວງຫົວພັນ ແລະ ເສຍໄປ 0-2 ເຊັດ.

  ເຖິງວ່າຜົນການແຂ່ງຂັນ ຈະອອກມາຄືແນວນັ້ນ ແຕ່ຖ້າໄດ້ຕິດຕາມ ເບິ່ງການແຂ່ງຂັນແບບໃກ້ຊິດ ຕິດຂອບສະໜາມແລ້ວ ຈະເຫັນວ່າ ທຸກຄະແນນທີ່ຄູ່ຂອງ ສະໂມສອນຕິນາ ໄດ້ມານັ້ນ ແມ່ນລ້ວນແລ້ວແຕ່ ເປັນຄະແນນທີ່ໄດ້ມາຈາກ ຄວາມສາມາດຂອງພວກເຂົາເອງ ເຖິງຈະເສຍປຽບຄູ່ແຂ່ງທາງດ້ານອາຍຸ ແລະ ຮູບຮ່າງທີ່ນ້ອຍກວ່າກໍ່ຕາມ ເຊິ່ງນັກກິລາທັງ 2 ຄົນຈາກສະໂມສອນຕິນາ ກໍ່ໄດ້ສູ້ຈົນສຸດຄວາມສາມາດທີ່ມີ ແລະ ພວກເຂົາກໍ່ໄດ້ຮັບ ແຮງເຊຍແຮງໃຈ ຈາກຜູ້ທີ່ເຂົ້າໄປເບິ່ງ ການແຂ່ງຂັນໃນສະໜາມ ຢ່າງຫຼວງຫຼາຍ  ລວມທັງທີມງານ ຂອງພວກເຮົາ ກໍ່ໄດ້ຕົບມືຊົມເຊີຍ ໃຫ້ການແຂ່ງຂັນໃນນັດນີ້ຈາກໃຈຈິງ.

   ທາງສະຫະກິລາ ດອກປີກໄກ່ແຫ່ງຊາດ ກໍ່ໄດ້ເວົ້າກັບທີມງານພວກເຮົາຕື່ມວ່າ ນັກກິລາຈາກ ສະໂມສອນຕິນາ 2 ຄົນນີ້ແມ່ນມີຄວາມຫ້າວຫັນ ແລະ ມີຄວາມສາມາດ, ພວກເຂົາສາມາດເປັນກຳລັງສຳຄັນ ໃຫ້ກັບທັບ ນັກກິລາດອກປີກໄກ່ລາວ ໃນອານາຄົດ ຢ່າງແນ່ນອນ.

   ທ່ານສາມາດຕິດຕາມຂ່າວສານ ແລະ ຜົນການເຄື່ອນໄຫວ ການແຂ່ງຂັນກິລາດອກປີກໄກ ໄດ້ທີ່  lbf.laosportnews.com