ລາຍລະອຽດຂ່າວ
ຜົນການແຂ່ງຂັນ ແລະ ເຫດການທີ່ສຳຄັນ ໃນມື້ທຳອິດຂອງການແຂ່ງຂັນ ດອກປີກໄກ່ ທົ່ວປະເທດ ຄັ້ງທີ 16
ຂຽນເມື່ອ: 05/08/2016 02:08 | ໂດຍ: ແອັດມິນ | ອ່ານ: 896 ຄັ້ງ

   ການແຂ່ງຂັນກິລາ ດອກປີກໄກ່ທົ່ວປະເທດ ຄັ້ງທີ 16 ຊິງຂັນປະທານສະພາແຫ່ງຊາດ ທີ່ຈັດຂຶ້ນໃນລະຫວ່າງວັນທີ 04 ເຖິງວັນທີ 07 ໂດຍມີການແຂ່ງຂັນກັນໃນ 9 ປະເພດຄື: ຄູ່ເຍົາວະຊົນຊາຍ 16 ປີ, ຄູ່ເຍົາວະຊົນຍິງ 16 ປີ, ດ່ຽວຊາຍທົ່ວໄປ, ດ່ຽວຍິງທົ່ວໄປ,​ ຄູ່ຊາຍທົ່ວໄປ, ຄູ່ຍິງທົ່ວໄປ, ຄູ່ປະສົມທົ່ວໄປ, ຄູ່ອາວຸໂສຍິງ 35 ປີ ແລະ ຄູ່ອາວຸໂສຊາຍ 45 ປີ. ມີນັກກິລາເຂົ້າຮ່ວມທັງໝົດ 335 ຄົນ ໃນນັ້ນມີນັກກິລາຊາຍ 273 ຄົນ ແລະ ຍິງ 62 ຄົນ ຈາກ 10 ແຂວງ, 1 ນະຄອນຫຼວງ ແລະ 23 ສະໂມສອນພາຍໃນ ນະຄອນຫຼວງວຽງຈັນ ເຂົ້າຮ່ວມ ແລະ ຈະໃຊ້ເວລາແຂ່ງຂັນ 4 ວັນ ໃນຈຳນວນ 201 ນັດແຂ່ງຂັນ.

    ມື້ວານນີ້ ວັນທີ 04 ສິງຫາ ເປັນມື້ທຳອິດຂອງການແຂ່ງຂັນ ເຊິ່ງໄດ້ມີການແຂ່ງຂັນໄປແລ້ວ 58 ນັດໃນ 3 ປະເພດຄື:
ຄູ່ເຍົາວະຊົນຊາຍ 16 ປີ ແຂ່ງໄປແລ້ວ 21 ນັດ
ດ່ຽວຊາຍທົ່ວໄປ ແຂ່ງແລ້ວ 15 ນັດ
ຄູ່ຊາຍທົ່ວໄປ ແຂ່ງແລ້ວ 22 ນັດ

   ເຊິ່ງການແຂ່ງຂັນ ຄູ່ທີ່ສຳຄັນຂອງ ມື້ວານນີ້ແມ່ນ ປະເພດດ່ຽວຊາຍທົ່ວໄປ ເປັນການຈັບສະຫຼາກ ມາພົບກັນລະຫວ່າງ ທ້າວ ວິຊຸນນະລາດ ຈາກສະໂມສອນ ມັນທາຕຸລາດ ພົບກັບ ທ້າວ ໄຊຊະນະ ຈາກແຂວງສະຫວັນນະເຂດ, ນັກກິລາທັງ 2 ຄົນນີ້ເປັນນັກກິລາຮຸ່ນໃໝ່ ທີ່ມີຄວາມສາມາດ ແລະ ເປັນໜຶ່ງໃນຕົວເຕັງ ຂອງການແຂ່ງຂັນໃນຄັ້ງນີ້ ແຕ່ວ່າຖືກຈັບສະຫຼາກ ມາພົບກັນໃນຮອບຄັດເລືອກ ເຊິ່ງຜົນການແຂ່ງຂັນ ເປັນຝ່າຍຂອງ ທ້າວ ວິຊຸນນະລາດ ເອົາຊະນະໄປດ້ວຍຄະແນນ 2 ຕໍ່ 0 ເຊັດ ແລະ ອີກຄູ່ໜຶ່ງແມ່ນ ປະເພດຄູ່ຊາຍທົ່ວໄປ ເປັນການພົບກັນລະຫວ່າງ ຄູ່ຂອງ  ທ້າວ ວັນປະສິດ ແລະ ທ້າວ ສຸລິສັກ ຈາກສະໂມສອນ KT ແລະ ຄູ່ຂອງ ທ້າວ ວິລະຈິດ ແລະ ທ້າວ ໄຊຊະນະ ຈາກແຂວງສະຫວັນນະເຂດ ຄູ່ນີ້ກໍ່ເປັນຄວາມບັງເອີນ ທີ່ຈົກສະຫຼາກມາພົບກັນ ໃນຮອບຄັດເລືອກ ແລະ ຜົນການແຂ່ງຂັນປະກົດວ່າ ຄູ່ຈາກສະໂມສອນ KT ເອົາຊະນະໄປ 2 ຕໍ່ 1 ເຊັດ.

   ສຳລັບການແຂ່ງຂັນໃນວັນທີ 05 ສິງຫາ ຈະມີການແຂ່ງຂັນທັງໝົດ 76 ນັດ ໃນ 7 ປະເພດຄື:
ຄູ່ເຍົາວະຊົນຍິງ 16 ປີ ຈະແຂ່ງ 2 ນັດ
ຄູ່ເຍົາວະຊົນຊາຍ 16 ປີ ຈະແຂ່ງ 16 ນັດ
ດ່ຽວຊາຍທົ່ວໄປ ຈະແຂ່ງ 24 ນັດ
ດ່ຽວຍິງທົ່ວໄປ ຈະແຂ່ງ 2 ນັດ
ຄູ່ຊາຍທົ່ວໄປ ຈະແຂ່ງ 24 ນັດ
ຄູ່ປະສົມທົ່ວໄປ ຈະແຂ່ງ 6 ນັດ
ຄູ່ອາວຸໂສຍິງ 35 ປີ ຈະແຂ່ງ 2 ນັດ

   ໂດຍທາງທີມງານ laosportnews ຈະເກາະຕິດຂ່າວສານ ແລະ ຜົນການເຄື່ອນໄຫວ ຂອງການແຂ່ງຂັນກິລາ ດອກປີກໄກ່ທົ່ວປະເທດ ຄັ້ງທີ 16 ນີ້ ແລະ ນຳສະເໜີ ໃຫ້ທ່ານຜູ້ອ່ານໄດ້ຮັບຮູ້ກັນ ແລະ ທ່ານສາມາດເຂົ້າໄປ ຕິດຕາມຂ່າວສານ ແລະ ຜົນການແຂ່ງຂັນໄດ້ທີ่່ເວັບໄຊ laosportnews.com ຂອງພວກເຮົາ ແລະ ເວັບໄຊຂອງ ສະຫະພັນກິລາດອກປີກໄກ່ ໄດ້ທີ່ lbf.laosportnews.com.