ລາຍລະອຽດຂ່າວ
ພິທີເປີດການແຂ່ງຂັນກິລາ ດອກປີກໄກ່ທົ່ວປະເທດ ຄັ້ງທີ 16
ຂຽນເມື່ອ: 05/08/2016 01:08 | ໂດຍ: ແອັດມິນ | ອ່ານ: 1935 ຄັ້ງ

    ໃນວັນທີ 04 ສິງຫາ 2016 ເວລາປະມານ 18:00 ໄດ້ມີພິທີເປີດການແຂ່ງຂັນກິລາ ດອກປີກໄກ່ທົ່ວປະເທດ ຄັ້ງທີ 16 ຊີງຂັນປະທານສະພາແຫ່ງຊາດ ຢ່າງເປັນທາງການທີ່ ສະໂມສອນດອກປີກໄກ່ ບຶງຂະຫຍອງ ນະຄອນຫຼວງວຽງຈັນ. ໃຫ້ກຽດເຂົ້າຮ່ວມງານໃນຄັ້ງນີ້ໂດຍ ທ່ານ ໄຊສົມພອນ ພົມວິຫານ ກຳມະການ ກົມການເມືອງສູນກາງພັກ ປະທານສູນກາງແນວລາວສ້າງຊາດ, ທ່ານ ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ, ທ່ານ ນາງ ສວນສະຫວັນ ວິຍະເກດ ເລຂາທິການ ສະພາແຫ່ງຊາດ, ທ່ານ ນາງ ພູໄຊ ແພງພົງ ຮອງຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ, ທ່ານ ນາທານຽວ ຮອງອຳນວຍການ ບໍລິສັດເບຍລາວ, ທ່ານ ທອງຫຼ້າ ແສງວິໄຊ ປະທານຄະນະບໍລິຫານງານ ສະຫະພັນດອກປີໄກ່ ແຫ່ງຊາດລາວ, ຄະນະບໍລິຫານງານ ສະຫະພັນດອກປີໄກ່ ແຫ່ງຊາດລາວ ພ້ອມດ້ວຍແຂກ, ສື່ມວນຊົນ, ຄະນະນຳນັກກິລາ ແລະ ນັກກິລາເຂົ້າຮ່ວມ ຢ່າງເປັນຂະບວນ.

   ທ່ານ ທອງຫຼ້າ ແສງວິໄຊ ປະທານຄະນະບໍລິຫານງານ ສະຫະພັນດອກປີໄກ່ ແຫ່ງຊາດລາວ ໄດ້ກ່າວເປີດພິທີ ແລະ ໄດ້ກ່າວບາງຊ່ວງບາງຕອນວ່າ:" ໃນທ່າວກາງບັນຍາກາດ ທີ່ທົ່ວພັກທົ່ວລັດ ແລະ ທົ່ວປວງຊົນ ພວມພ້ອມພາກັນ ກະກຽມສະເຫຼີມສະຫຼອງ ວັນສ້າງຕັ້ງລັດຖະທຳມະນູນຂອງ ສປປ ລາວ ໃນວັນທີ 15 ສິງຫາ ທີ່ຈະວຽນມາບັນຈົບຄົບຮອບ 25 ປີ ແລະ ຊົມເຊີຍ ວັນສຳຄັນທາງດ້ານປະຫວັດສາດ ຂອງຊາດເຮົາເຊັ່ນ: ວັນຍຶດອຳນາດ 23 ສິງຫາ ຄົບຮອບ 41 ປີ, ວັນກຳເນີດ ກິລາ-ກາຍະກຳແຫ່ງຊາດລາວ ຄົບຮອບ 50 ປີ, ວັນສ້າງຕັ້ງກິລາ ໂອລິມປິກ ແຫ່ງຊາດລາວ ຄົບຮອບ 38 ປີ, ວັນສ້າງຕັ້ງກິລາ ໂອລິມປິກ ສາກົນ ຄົບຮອບ 122 ປີ ແລະ ວັນຄ້າຍວັນເກີດຂອງ ອະດີດ ປະທານ ສຸພານຸວົງ ຄົບຮອບ 107 ປີ. ສະຫະພັນກິລາດອກປີກໄກ່ ແຫ່ງຊາດລາວ ໂດຍການອຸປະຖຳຈາກ ບໍລິສັດເບຍລາຍ ຈຶ່ງໄດ້ຈັດການແຂ່ງຂັນ ກິລາດອກປີກໄກ່ທົ່ວປະເທດຄັ້ງທີ 16 ຊີງຂັນທ່ານ ປະທານສະພາແຫ່ງຊາດຂຶ້ນ."

   ທ່ານ ທອງຫຼ້າ ແສງວິໄຊ ຍັງໄດ້ເວົ້າຕື່ມອີກວ່າ "ການຈັດການແຂ່ງຂັນໃນຄັ້ງນີ້ ນອກຈາກຈະເປັນການສ້າງ ບັນຍາກາດໃນການ ສະເຫຼີມສະຫຼອງວັນສຳຄັນຕ່າງໆແລ້ວ ຍັງເປັນການຄັດເລືອກ ແລະ ຈັດລະດັບນັກກິລາແຕ່ລະຮຸ່ນ ໃຫ້ເຂົ້າລະບົບ ພ້ອມທັງຈະມີການ ສະສົມຄະແນນຂອງນັກກິລາ ແລະ ຈະກ້າວໄປສູ່ການຈັດ ການແຂ່ງຂັນລະດັບ ລີກທົ່ວປະເທດ".

  ນອກນັ້ນ ທ່ານຍັງກ່າວຂອບໃຈ ແລະ ຊົມເຊີຍ ບໍລິສັດເບຍລາວ ທີ່ໃຫ້ການອຸປະຖຳ ການຈັດການແຂ່ງຂັນໃນຄັ້ງນີ້ ໂດຍບໍລິສັດເບຍລາວ ສະໜັບສະໜູນເປັນເງິນຈຳນວນທັງໝົດ 203,755,000 ກີບ.

    ການແຂ່ງຂັນ ກິລາດອກປີກໄກ່ທົ່ວປະເທດ ໃນຄັ້ງນີ້ ແມ່ນເລີ່ມແຂ່ງຂັນແຕ່ວັນທີ 04 ເຖິງວັນທີ 07 ສິງຫາ ໂດຍມີການແຂ່ງຂັນກັນໃນ 9 ປະເພດ ແລະ ມີນັກກິລາເຂົ້າຮ່ວມທັງໝົດ 335 ຄົນ ຈາກ 10 ແຂວງ, 1 ນະຄອນຫຼວງ ແລະ 23 ສະໂມສອນພາຍໃນ ນະຄອນຫຼວງວຽງຈັນ.




ຄະນະບໍລິຫານງານ ສະຫະພັນດອກປີກໄກ່ແຫ່ງຊາດລາວ ກ່າວຕ້ອນຮັບ ແລະ ດຳເນີນພິທີທາງການ
ຂະບວນນັກກິລາ ທີ່ເຂົ້າຮ່ວມການແຂ່ງຂັນ
ຂະບວນນັກກິລາ ທີ່ເຂົ້າຮ່ວມການແຂ່ງຂັນ
ຂະບວນນັກກິລາ ທີ່ເຂົ້າຮ່ວມການແຂ່ງຂັນ
ຂະບວນນັກກິລາ ທີ່ເຂົ້າຮ່ວມການແຂ່ງຂັນ
ການແຂ່ງຂັນຄັ້ງນີ້ ຈະໃຊ້ 4 ຂອດແຂ່ງຂັນ
ທ່ານ ໄຊສົມພອນ ພົມວິຫານ ແລະ ແຂກ ລົງແຂ່ງໃນນັດພິເສດ
ບັນຍາກາດດ້ານນອກ ສະໂມສອນດອກປີກໄກ່ບຶກຂະຫຍອງ ນັກກິລາກຳລັງລໍຖ້າເຂົ້າງານ
ບັນຍາກາດດ້ານນອກ ສະໂມສອນດອກປີກໄກ່ບຶກຂະຫຍອງ ນັກກິລາກຳລັງລໍຖ້າເຂົ້າງານ
ບັນຍາກາດດ້ານນອກ ສະໂມສອນດອກປີກໄກ່ບຶກຂະຫຍອງ ນັກກິລາກຳລັງລໍຖ້າເຂົ້າງານ
ປິດທ້າຍດ້ວຍ ຮອຍຍິມຫວານໆຂອງເອື້ອຍນ້ອງ ຈາກບໍລິສັດເບຍລາວ