ລາຍລະອຽດຂ່າວ
ທີມງານ laosportnews ສຳເລັດ ການພັດທະນາ ລະບົບລາຍງານຜົົນ ການແຂ່ງຂັນ ໃຫ້ກັບສະຫະພັນກິລາ ດອກປີກໄກ່ແຫ່ງຊາດລາວ
ຂຽນເມື່ອ: 01/08/2016 23:08 | ໂດຍ: ແອັດມິນ | ອ່ານ: 1263 ຄັ້ງ

   ສະຫະພັນກິລາ ດອກປີກໄກ່ແຫ່ງຊາດລາວ ໂດຍຮ່ວມມືກັບ ທີມງານ laosportnews ໄດ້ສຳເລັດການພັດທະນາ ລະບົບລາຍງານຜົນ ແລະ ເກັບກຳສະຖິຕິ ຂອງການແຂ່ງຂັນ ກິລາດອກປີກໄກ່ ທຸກລາຍການແຂ່ງຂັນ ທີ່ຂຶ້ນກັບສະຫະພັນ ດອກປີກໄກ່ແຫ່ງຊາດລາວ ໂດຍພຶ້ນຖານ.

  ລະບົບການລາຍງານຜົນ ແລະ ເກັບກຳສະຖິຕິ ດັ່ງກ່າວ ແມ່ນໄດ້ຮັບການພັດທະນາຂຶ້ນໂດຍ ທີມງານ laosportnews ເພື່ອຈຸດປະສົງ ເປັນບ່ອນເກັບກຳຜົນການແຂ່ງຂັນ ແຕ່ລະລາຍການ ຂອງສະຫະພັນກິລາ ດອກປີກໄກ່ແຫ່ງຊາດລາວ ເຮັດໃຫ້ຂໍ້ມູນມີຄວາມທັນສະໄໝ ແລະ ເປັນລະບົບອີເລັກໂທຣນິກ ຫຼາຍຂຶ້ນ. ພ້ອມນັ້ນ ຄົນທົ່ວໄປ ທີ່ມີຄວາມສົນໃຈ ໃນການຕິດຕາມຂ່າວສານ ກ່ຽວກັບການແຂ່ງຂັນ ກິລາດອກປີກໄກ່ ແຕ່ລະລາຍການ ແລະ ການເຄື່ອນໄຫວຕ່າງໆ ຂອງສະຫະພັນດອກປີກໄກ່ ແຫ່ງຊາດລາວ ກໍ່ສາມາດເຂົ້າໄປເບິ່ງໄດ້ ໂດຍຜ່ານເວັບໄຊ laosportnews.com ເຊິ່ງເຂົ້າໄປທີ່ lbf.laosportnews.com .

   ລະບົບດັ່ງກ່າວ ແມ່ນຈະຖືກນຳໃຊ້ຄັ້ງທຳອິດ ໃນການລາຍງານຜົນ ການແຂ່ງຂັນກິລາ ດອກປີກໄກ່ທົ່ວປະເທດ ຄັ້ງທີ 16 ຊິງຂັນປະທານສະພາແຫ່ງຊາດ ທີ່ຈະຈັດຂຶ້ນໃນລະຫວ່າງ ວັນທີ 04 ຫາ 07 ສິງຫານີ້ ຢູ່ທີ່ສະໂມສອນ ດອກປີກໄກ່ບຶງຂະຫຍອງ ນະຄອນຫຼວງວຽງຈັນ ມີການແຂ່ງຂັນທັງໝົດ 9 ປະເພດ ຄື: ຄູ່ເຍົາວະຊົນຊາຍ ອາຍຸບໍ່ເກີນ 16 ປີ, ຄູ່ເຍົາວະຊົນຍິງ ອາຍຸບໍ່ເກີນ 16 ປີ, ດ່ຽວຊ່າຍທົ່ວໄປ, ດ່ຽວຍິງທົ່ວໄປ, ຄູ່ຊາຍທົ່ວໄປ, ຄູ່ຍິງທົ່ວໄປ,  ຄູ່ປະສົມທົ່ວໄປ, ຄູ່ອາວຸໂສຍິງ 35 ປີຂຶ້ນໄປ ແລະ ຄູ່ອາວຸໂສຊາຍ 40 ປີຂຶ້ນໄປ.
 
   ທີມງານ laosportnews ຂໍເປັນສ່ວນໜຶ່ງ ໃນການຊ່ວຍພັດທະນາ ວົງການກິລາລາວ ໃຫ້ມີຄວາມທັນສະໄໝ ທາງດ້ານຂໍ້ມູນ ເພື່ອກຽມຄວາມພ້ອມ ໃນການຍັບເຂົ້າໃກ້ ມາດຕະຖານສາກົນ.