ລາຍລະອຽດຂ່າວ
ສະຫະພັນ ດອກປີກໄກ່ແຫ່ງຊາດລາວ ປະກາດກ່ຽວກັບ ລາຍລະອຽດຂອງການແຂ່ງຂັນ ດອກປີກໄກ່ທົ່ວປະເທດ ຄັ້ງທີ 16
ຂຽນເມື່ອ: 30/07/2016 14:07 | ໂດຍ: ແອັດມິນ | ອ່ານ: 803 ຄັ້ງ

   ປະກາດຈາກ ສະຫະພັນ ດອກປີກໄກ່ແຫ່ງຊາດລາວ ກ່ຽວກັບລາຍລະອຽດຂອງ ການແຂ່ງຂັນ ກິລາດອກປີກໄກ່ ທົ່ວປະເທດ ຄັ້ງທີ 16 ທີ່ຈະແຂ່ງກັນໃນລະຫວ່າງ ວັນທີ 4 ເຖິງ 7 ສິງຫານີ້ ຢູ່ທີ່ສະໂມສອນດອກປີກໄກ່ ບຶງຂະຫຍອງ ນະຄອນຫຼວງວຽງຈັນ ມີເນື້ອນໃນດັ່ງນີ້:

   " ສະບາຍດີ ນັກກິລາ ແລະ ຄູຝຶກດອກປີກໄກ່ ໃນທຸກສະໂມສອນ ທີ່ຈະເຂົ້າຮ່ວມການແຂ່ງຂັນ ດອກປີກໄກ່ທົ່ວປະເທດໃນຄັ້ງນີ້ ມື້ນີ້ທາງສະຫະພັນ ຈະມາແຈ້ງລາຍ ລະອຽດກ່ຽວກັບການແຂ່ງຂັນ ດອກປີກໄກ່ທົ່ວປະເທດຄັ້ງທີ 16 ດັ່ງນີ້:

1. ການຈັບສະຫລາກແຂ່ງຂັນ ແລະ ຕົກລົງລະບຽບການແຂ່ງຂັນ ໄດ້ສຳເລັດໄປໃນມື້ວານນີ້ ວັນທີ 29/07/2016 ແລ້ວ ສ່ວນຜົນການຈັບສະຫລາກນັ້ນ ຈະແຈ້ງໃຫ້ຊາບໃນວັນຈັນທີ 01/08/2016 ເວລາ 8:00 ໂມງເຊົ້າ.

2. ການແຂ່ງຂັນໃນຄັ້ງນີ້ ຈະນຳໃຊ້ດອກປີກໄກ່ຍີ່ຫໍ້ Hybrid.

3. ການແຂ່ງຂັນໃຊ້ລະບົບ 2 ໃນ 3 ເກມ ສິ້ນສຸດທີ່ຄະແນນ 21 ຖ້າສະເໝີກັນ ຈະສິ້ນສຸດທີ່ຄະແນນ 30, ເກມທີ 3 ກໍ່ເຊັ່ນກັນ

4. ໄລຍະເວລາການແຂ່ງຂັນ ວັນທີ 04-07/08/2016 ຄາບເຊົ້າເລີ່ມ 8:00 ຄາບບ່າຍເລີ່ມ 13:30 ໄປຈົນກວ່າຈະຈົບ ການແຂ່ງຂັນ ຂອງລາຍການມື້ນັ້ນ.

5. ຂໍໃຫ້ນັກກີລາ ແລະ ຄູຝຶກແຕ່ລະພາກສ່ວນ ຮັກສາເວລາໃນການແຂ່ງຂັນ, ນັກກິລາ ຄວນມາຮອດສະໜາມແຂ່ງຂັນ ກ່ອນເວລາແຂ່ງ 30 ນາທີ ເພື່ອລໍຖ້າ ເນື່ອງຈາກວ່າບາງຄູ່ ອາດແຂ່ງຂັນກັນສຳເລັດ ໄວກວ່າກຳຫນົດ. ທາງຄະນະກຳມະການ ຈະໄດ້ຈັດຄູ່ແຂ່ງຂັນຕໍ່ໄປ ລົງສະໜາມທັນທີ, ຖ້າຫາກປະກາດຊື່ລົງແລ້ວ ພາຍໃນເວລາ 10 ນາທີ ຖ້າບໍ່ມາສະເໜີໂຕແມ່ນ ຈະຖືກຕັດສິດຈາກການແຂ່ງຂັນທັນທີ.

6. ບໍ່ໃຫ້ມີການປະທ້ວງຕໍ່ນັກກີລາ ບໍ່ວ່າກໍລະນີໃດໆ ເນື່ອງຈາກວ່າທາງຄະນະກຳມະການ ໄດ້ກວດກາຊີວະປະຫວັດນັກກີລາ ພ້ອມທັງເອກະສານຢັ້ງຢືນ ຂອງນັກກິລາທຸກລຸ້ນຮຽບຮ້ອຍແລ້ວ, ພາກສ່ວນໃດຫາກປະທ້ວງ ຫລື ສ້າງພຶດຕິກຳບໍ່ດີ ຕໍ່ການແຂ່ງຂັນຄັ້ງນີ້ ຈະຖືກລົງວິໄນທັງທີມ ແລະ ນັກກິລາຜູ້ທີ່ປະທ້ວງນັ້ນດ້ວຍ.

   ດັ່ງນັ້ນ, ຈຶ່ງແຈ້ງມາເພື່ອຊາບ ແລະ ປະຕິບັດຕາມລະບຽບການນີ້ ຢ່າງເຄັ່ງຄັດດ້ວຍ ສະຫະພັນດອກປີກໄກ່ແຫ່ງຊາດລາວ ".

ຂໍຂອບໃຈ ຂໍ້ມູນ ແລະ ພາບຈາກ ສະຫະພັນ ດອກປີກໄກ່ແຫ່ງຊາດລາວ