ລາຍລະອຽດຂ່າວ
ສະຫຼຸບການແຂ່ງຂັນບານເຕະ Copa America ກ່ອນຮອບ Semi Final
ຂຽນເມື່ອ: 19/06/2016 10:06 | ໂດຍ: ແອັດມິນ | ອ່ານ: 821 ຄັ້ງ

      Copa America ໃນປີ 2016 ນີ້ແມ່ນໄດ້ຈັດຢູ່ທີ່ປະເທດ ສະຫະລັດ ອາເມຣິກາ (USA) ໃນຊ່ວງວັນທີ 3 ເຖິງ 26 ມິຖຸນາ 2016 (ເວລາໃນ USA ເຊິ່ງຊ້າກວ່າເວລາໃນລາວ 11 ຊົ່ວໂມງ) ເຊິ່ງເປັນຄັ້ງທຳອິດຂອງ USA ທີ່ໄດ້ເປັນເຈົ້າພາບ ຈັດການແຂ່ງຂັນ ໃນລາຍການນີ້ ໂດຍທີ່ປະເທດ ທີ່ເປັນເຈົ້າພາບ ຈັດການແຂ່ງຂັນຫຼາຍທີ່ສຸດ ໃນລາຍການນີິ້ ແມ່ນປະເທດ Argentina ເຊິ່ງຈັດໄປແລ້ວ 9 ຄັ້ງ.

    ເຫດການສຳຄັນໆ ໃນການແຂ່ງຂັນຄັ້ງນີ້ ແມ່ນມີຫຼາຍເຫດການ ແຕ່ເຫດການທີ່ ໜ້າຈະຢູ່ໃນກະແສ ຮ້ອນແຮງທີ່ສຸດ ໃນຮອບແບ່ງກຸ່ມ ຄົງຈະໜີບໍ່ຜົ້ນຂ່າວທີ່ Brazil ບໍ່ສາມາດຜ່ານເຂົ້າຮອບ Quarter Final ຈາກການເສຍໃຫ້ Peru 0-1 ໃນນັດສຸດທ້າຍ ຂອງຮອບແບ່ງກຸ່ມ ເຮັດໃຫ້ Brazil ມີ 4 ຄະແນນ ຈົບພຽງແຕ່ທີ 3 ມີິຄະແນນໜ້ອຍກວ່າ Peru ແລະ Ecuador ທີ່ເປັນທີ 1 ແລະ 2 ຂອງກຸ່ມ B ຕາມລຳດັບ ແລະ ເປັນການຕົກຮອບແບ່ງກຸ່ມ ຫຼື ຮອບທຳອິດ ໃນການແຂ່ງຂັນ ໃນລາຍການນີ້ ເປັນຄັ້ງທຳອິດ ນັບຕັ້ງແຕ່ປີ 1987. ຈາກເຫດການດັ່ງກ່າວ ໄດ້ເຮັດໃຫ້ ສະຫະພັນບານເຕະ ບຣາຊີວ ຫຼື CBF ໄດ້ຖະແຫຼງຂ່າວຢືນຢັນ ໃນວັນອັງຄານທີ 14 ມິຖຸນາທີ່ຜານມານີ້ວ່າ ໄດ້ສັ່່ງປົດ Carlos Dunga ໂຄຊທີມຊາດ Brazil ພ້ອມກັບທີມງານຜູ້ຊ່ວຍ ອອກຈາກຕຳແໜ່ງ ຫຼັງຈາກທີ່ ບໍ່ສາມາດພາທີມ ຜ່ານເຂົ້າຮອບຕໍ່ໄປໄດ້.

   ການແຂ່ງຂັນ ໃນຮອບ Quarter Final ມີຜົນການແຂ່ງຂັນດັ່ງນີ້:

  • ຄູ່ທີ 1 USA (ທີ 1 ກຸ່ມ A) ສາມາດເອົາຊະນະ  Ecuador (ທີ 2 ກຸ່ມ B)  2-0 ເຮັດໃຫ້ເຈົ້າພາຍ ສາມາດຜ່ານເຂົ້າໄປ ໃນຮອບຕໍ່ໄປໄດ້ສຳເລັດ.
  • ຄູ່ທີ 2 ເປັນການພົບກັນລະຫວ່າງ Peru (ທີ 1 ກຸ່ມ B) ພົບກັບ Colombia (ທີ 2 ກຸ່ມ A) ເຊິ່ງສະເໝີກັນໃນ 90 ນາທີ ຕ້ອງໄດ້ຕໍ່ເວລາອີກ 30 ນາທີແຕ່ກໍ່ບໍ່ສາມາດ ຍິງປະຕູກັນໄດ້ ສຸດທ້າຍຕ້ອງໄດ້ຕັດສິນ ດ້ວຍການຍິງຈຸດໂທດ ແລະ ກໍ່ເປັນ Colombia ທີ່ສາມາດເອົາຊະນະໄປ 4-2 ຜ່ານເຂົ້າຮອບຕໍ່ໄປ.
  • ຄູ່ທີ 3 Argentina (ທີ 1 ກຸ່ມ D) ທີ່ນຳໂດຍ Lionel Messi ແລະ Gonzalo Higuain ສາມາດພາທີມ ເອົາຊະນະ Venezuela (ທີ 2 ກຸ່ມ C) 4-1 ຜ່ານເຂົ້າຮອບ Semi Final ຕາມຄາດໝາຍ.
  • ຄູ່ທີ 4 Mexico (ທີ 1 ກຸ່ມ C) ພົບກັບ Chile (ທີ 2 ກຸ່ມ D) ແລະ ເປັນ Chile ທີ່ເປັນຝ່າຍເອົາຊະນະ ໄປດ້ວຍ 7-0 ຜ່ານເຂ້ົາຮອບ Semi Final ເປັນທີມສຸດທ້າຍ.

      ຕາຕະລາງແຂ່ງຂັນຮອບ 4 ທີມ ຫຼື ຮອບ Semi Final ມີດັ່້ງນີ້:

  • ຄູ່ທີ 1 ແຂ່ງຂັນໃນວັນທີ 22 ມິຖຸນາ 2016 ເວລາ 04:00 ຈະເປັນການ ພົບກັນລະຫວ່າງ USA ກັບ Argentina ເຊິ່ງໜ້າຈະເປັນງານໜັກ ຂອງເຈົ້າພາບທີ່ ໂຄຈອນມາພົບ ກັບທີມເຕັງຢ່າງ Argentina ທີ່ເປັນເຖິງຮອງແຊັມໃນປີ 2015 ແຕ່ USA ເອງກໍ່ຈະໄດ້ປຽບ ໃນເລືອງຂອງກອງເຊຍ ເຊິ່ງໜ້າຈະເຮັດໃຫ້ ເຂົາເຈົ້າມີກຳລັງໃຈ ແລະ ອາດຈະເຮັດໃຫ້ເຂົາເຈົ້າ ສາມາດສູ້ກັບ Argentina ໄດ້ຢ່າງດຸເດືອດ.
  • ຄູ່ທີ 2 ແຂ່ງຂັນໃນວັນທີ 23 ມີຖຸນາ 2016 ເວລາ 03:00 ຈະເປັນການໂຄຈອນ ມາພົບກັນລະຫວ່າງ Colombia ແລະ Chile ທີ່ເປັນແຊັມເກົ່າ ໂດຍເຄີຍເອົາຊະນະ Argentina ໃນຮອບຊິງຊະນະເລີດໃນປີ 2015 ມາແລ້ວ.

            ໃນການແຂ່ງຂັນໃນຮອບ Semi Final ນີ້ຖ້າຫາກວ່າ Argentina ສາມາດເອົາ ຊະນະເຈົ້າພາບໄດ້ ແລະ ທີມ Chile ສາມາດເອົາຊະນະ Colombia ໄດ້ກໍ່ຈະເຮັດໃຫ້ ຄູ່ຊິ່ງຊະນະເລີດ Copa America 2016 ນີ້ເປັນຄູ່ດຽວກັນກັບ ຄູ່ຊິ່ງຊະນະເລີດໃນປີ 2015 ແລະ ຖ້າເປັນແບບນັ້ນແທ້ ກໍ່ຈະເປັນໂອກາດອັນດີທີ່ Argentina ຈະໄດ້ແກ້ມືກັບ Chile ຈາກການແພ້ ການດວນຈຸດໂທດ ໃນຮອບຊິງຊະນະເລີດໃນປີ 2015 1-4.

         ຕາຕະລາງແຂ່ງຂັນ ນັດຊິງທີ 3 ແມ່ນຈະແຂ່ງຂັນກັນ ໃນວັນທີ 26 ມິຖຸນາ 2016 ເວລາ 03:00.
         ຕາຕະລາງແຂ່ງຂັນ ນັດຊິງຊະນະເລີດ ແມ່ນຈະແຂ່ງຂັນກັນ ໃນວັນທີ 27 ມິຖຸນາ 2016 ເວລາ 03:00.

(ວັນ ແລະ ເວລາແຂ່ງຂັນ ແມ່ນເວລາໃນລາວ)

ຂອບໃຈຂໍ້ມູນຈາກເວັບໄຊ: www.ca2016.com, th.wikipedia.org, www.siamsport.co.th
ຂອບໃຈພາບ ປະກອບຂ່າວຈາກ: www.insidespanishfootball.com, www.goal.com, www.adndeportivo.com,
www.hindustantimes.com

ຂຽນ ແລະ ຮຽບຮຽງຂ່າວໂດຍ ອຸດົມຊັບ

ສະໜັບສະໜູນຂ່າວໂດຍ:



ຂ່າວລ່າສຸດ