ລາຍລະອຽດຂ່າວ
ສະຫະພັນ ດອກປີກໄກ່ແຫ່ງຊາດລາວ ຮ່ວມມືກັບເວັບໄຊ laosportnews.com ພັດທະນາລະບົບລາຍງານຜົນ ການແຂ່ງຂັນ
ຂຽນເມື່ອ: 25/07/2016 18:07 | ໂດຍ: ແອັດມິນ | ອ່ານ: 849 ຄັ້ງ

  ໃນຕອນບ່າຍຂອງວັນອາທິດ ວັນທີ 24 ກໍລະກົດ 2016 ທີ່ຜ່ານມາ ທີມງານ laosportnews ໄດ້ເຂົ້າປຶກສາຫາລືກັບ ສະຫະພັນ ດອກປີກໄກ່ແຫ່ງຊາດລາວ ກ່ຽວກັບລະບົບການລາຍງານຜົນ ແລະ ເກັບກຳສະຖິຕິຕ່າງໆ ຂອງສະຫະພັນ. ໃຫ້ກຽດເຂົ້າຮ່ວມປຶກສາຫາລື ໂດຍ ຄະນະກຳມະການ ບໍລິຫານສະຫະພັນ ດອກປີກໄກ່ແຫ່ງຊາດລາວ.

   ການປຶກສາຫາລືກັນຄັ້ງນີ້ ແມ່ນເພື່ອເປັນການສ້າງມາດຕະຖານ ໃຫ້ກັບການລາຍງານຜົນ ການແຂ່ງຂັນ, ເຜີຍແຜ່ຂໍ້ມູນຂ່າວສານ ຂອງສະຫະພັນ ລວມໄປເຖິງການ ຈັດຮູບແບບຂອງ ການລາຍງານຜົນ ການແຂ່ງຂັນ ຂອງສະຫະພັນ ດອກປີກໄກ່ ໃຫ້ເປັນລະບົບລະບຽບ ແລະ ທັນສະໄໝຫຼາຍຂຶ້ນ.

   ຄະນະກຳມະການ ບໍລິຫານສະຫະພັນ ດອກປີກໄກ່ແຫ່ງຊາດລາວ ໄດ້ໃຫ້ຄຳເຫັນ ຕໍ່ການປຶກສາຫາລືຄັ້ງນີ້ວ່າ "ຜ່ານມາ ການລາຍງານຜົນ ການແຂ່ງຂັນຂອງສະຫະພັນ ແມ່ນຍັງບໍ່ທັນເປັນລະບົບ ທີ່ທັນສະໄໝເທື່່ອ, ຂໍ້ມູນບາງສ່ວນແມ່ນ ຍັງຖືກຈັດເກັບ ໃນຮູບແບບເປັນເຈ້ຍ ແລະ ເອກະສານຢູ່ ແລະ ທາງສະຫະພັນ ແມ່ນໄດ້ມີຄວາມຕ້ອງການ ລະບົບເພື່ອມາບໍລິຫານ-ຈັດການບັນຫາດັ່ງກ່າວ ຕັ້ງແຕ່ດົນແລ້ວ ແລະ ເພື່ອເປັນການເຮັດໃຫ້ ມາດຕະຖານຂອງການ ຈັດການແຂ່ງຂັນ ຂອງສະຫະພັນ ໃຫ້ມີຄວາມທັນສະໄໝ ແລະ ຍົກລະດັບລະບົບ ລາຍງານຜົນ ໃຫ້ທຽບເທົ່າສາກົນ ທາງສະຫະພັນຈຶ່ງເຫັນດີ ໃຫ້ທີມງານ laosportnews ພັດທະນາລະບົບດັ່ງກ່າວ ຂຶ້ນມານ້ຳໃຊ້".

     ທາງທີມງານ laosportnews ກໍ່ໄດ້ປະກອບຄຳເຫັນວ່າ "ທີມງານຂອງພວກເຮົາ ມີຄວາມດີໃຈທີ່ໄດ້ຮ່ວມມືກັບ ສະຫະພັນດອກປີກໄກ່ ແຫ່ງຊາດລາວ ໃນການພັດທະນາ ລະບົບລາຍງານຜົນ ແລະ ເກັບກຳສະຖິຕິ ການແຂ່ງຂັນ ດັ່ງກ່າວ ແລະ ພູູມໃຈທີ່ໄດ້ເປັນສ່ວນໜຶ່ງ ໃນການພັດທະນາ ວົງການກິລາບ້ານເຮົາ. ທີມງານຂອງພວກເຮົາ ແມ່ນມີຄວາມພ້ອມ ໃນການພັັດທະນາລະບົບ ເຊິ່ງຜ່ານມາ ທີມງານພວກເຮົາ ໄດ້ສຳເລັດການພັດທະນາ ລະບົບລາຍງານຜົນຂອງ ກິລາມະຫາວິທະຍາໄລ ອາຊຽນ ຄັ້ງທີ 16 ທີ່ຈັດຂຶ້ນ ທີ່ນະຄອນຫຼວງວຽງຈັນ ໃນທ້າຍປີ 2012 ແລະ ລະບົບລາຍງານຜົນຂອງ ກິລາມະຫາວິທະຍາໄລລາວ ຄັ້ງທີ 1 ທີ່ຈັດຂຶ້ນໃນຊ່ວງ ຕົ້ນປີ 2016 ທີ່ຜ່ານມາ".

   ການຮ່ວມມືລະຫວ່າງ ສະຫະພັນດອກປີກໄກ່ ແຫ່ງຊາດລາວ ແລະ ທີມງານ laosportnews ໃນການພັດທະນາ ລະບົບລາຍງານຜົນ ແລະ ເກັບກຳສະຖິຕິ ແມ່ນຈະເປັນຂີດໝາຍອັນສຳຄັນ ໃຫ້ວົງການກິລາບ້ານເຮົາ ເພື່ອໃຫ້ການລາຍງານ ຜົນການແຂ່ງຂັນ ຫັນເຂົ້າສູ່ລະບົບ, ມີຄວາມທັນສະໄໝ, ປະຊາຊົນສາມາດເຂົ້າເຖິງ ຂໍ້ມູນຂ່າວສານ ໄດ້ຢ່າງກວ້າງຂວາງ ແລະ ເປັນການຍັບເຂົ້າໃກ້ ມາດຕະຖານຂອງ ລະບົບສາກົນ ເທື່ອລະກ້າວ.

  ລະບົບການລາຍງານຜົນ ການແຂ່ງຂັນດອກປີກໄກ່ນີ້ ຈະຖືກສ້າງຂຶ້ນ ເປັນຮູບແບບເວບໄຊ ທີ່ປະຊາຊົນທົ່ວໄປ ສາມາດເຂົ້າເບິ່ງ ຂໍ້ມູນໄດ້ຢ່າງສະດວກ ແລະ ຈະຖືກນຳໃຊ້ເປັນຄັ້ງທຳອິດ ໃນງານການແຂ່ງຂັນ ກິລາດອກປີໄກ່ ທົ່ວປະເທດຄັ້ງທີ 16 ຊິງຂັນປະທານສະພາແຫ່ງຊາດ ທີ່ຈະຈັດຂຶ້ນລະຫວ່າງ ວັນທີ 4 ຫາ 7 ສິງຫານີ້ ຢູ່ທີ່ສະໂມສອນດອກປີກໄກ່ ບຶງຂະຫຍອງ ນະຄອນຫຼວງວຽງຈັນ ເຊິ່ງມີການແຂ່ງຂັນທັງໝົດ 9 ປະເພດຄື ຄູ່ເຍົາວະຊົນຍິງ ອາຍຸບໍ່ເກີນ 16 ປີ, ຄູ່ເຍົາວະຊົນຊາຍ ອາຍຸບໍ່ເກີນ 16 ປີ, ດ່ຽວຍິງທົ່ວໄປ, ດ່ຽວຊາຍທົ່ວໄປ, ຄູ່ຍິງ, ຄູ່ຊາຍ, ຄູ່ປະສົມ, ຄູ່ອາວຸໂສຍິງ 30 ປີຂຶ້ນໄປ ແລະ  ຄູ່ອາວຸໂສຊາຍ 45 ປີຂຶ້ນໄປ.

ຂອບໃຈຂໍ້ມູນ ແລະ ພາບຈາກ ສະຫະພັນ ດອກປີກໄກ່ ແຫ່ງຊາດລາວ