ລາຍລະອຽດຂ່າວ
ລາຍງານ ບັນຍາກາດ ນັດຊິງຊະນະເລີດ Euro 2016
ຂຽນເມື່ອ: 11/07/2016 05:07 | ໂດຍ: ແອັດມິນ | ອ່ານ: 1214 ຄັ້ງ

   ການແຂ່ງຂັນບານເຕະ Euro 2016 ໄດ້ເດີນທາງມາຮອດ ນັດຊິງຊະນະເລີດແລ້ວ ເຊິ່ງເປັນການແຂ່ງຂັນກັນລະຫວ່າງ Portugal ພົບກັບ France ເຈົ້າພາບ.
   ການແຂ່ງຂັນແມ່ນເຄັ່ງຕຶງ ແລະ ດຸເດືອດ ຕັ້ງແຕ່ຊ່ວງຕົ້ນຂອງເຄິ່ງເວລາທຳອິດ ແລະ ໃນນາທີທີ 25 Cristiano Ronaldo ຖືກປ່ຽນຕົວອອກເພາະ ມີອາການບາດເຈັບທີ່ ບໍລິເວນຫົວເຂົ່າຊ້າຍ ຈາກການປະທະກັບ Payet ເຮັດໃຫ້ຫຼັງຈາກນັ້ນເກມຂອງ Portugal ກໍ່ຫຼຸດຜ່ອນຄວາມດຸດັນລົງໄປພໍສົມຄວນ ແລະ ເກມສ່ວນໃຫຍ່ຕົກເປັນຂອງ France ດ້ວຍຮູບແບບການຫຼິ້ນ, ການຄອງບານ ແລະ ໂອກາດຍິງປະຕູ ທີ່ເໜືອກວ່າ ໂດຍເຄິ່ງເວລາທຳອິດ ສະຖິຕິການຄອງບານຂອງ France 55%, ຄວາມແນ່ນອນຂອງການຈ່າຍບານ 91%, ໂອກາດຍິງ 7 ຄັ້ງ ເຂົ້າກອບ 4 ຄັ້ງ ແຕ່ກໍ່ບໍ່ສາມາດຍິງປະຕູໄດ້, ຈົບ 45 ນາທີທຳອິດສະເໝີກັນໄປ 0-0.

  ເກມໃນເຄິ່ງເວລາຫຼັງ ເປັນທາງ France ທີ່ກົດດັນ Portugal ເປັນໄລຍະໄລຍະ ແລະ ມີໂອກາດຍິງປະຕູຫຼາຍກວ່າ, ສ່ວນທາງ Portugal ແມ່ນພະຍາຍາມດຶງເກມໃຫ້ຊ້າລົງ, ເນັ້ນຄວາມແນ່ນອນ ແລະ ເພີ່ມຄວາມຫັດກຸມ ໃນເກມຮັບຫຼາຍຂຶ້ນ. ເວລາຜ່ານໄປເຮັດໃຫ້ນັກເຕະ ແລະ ໂຄຊຂອງທັງ 2 ທີມຍິ່ງເພີ່ມຄວາມກົດກັນຫຼາຍຂຶ້ນ ເພາະການໄດ້ ຫຼື ເສຍ 1 ປະຕູໃນເກມສຳຄັນລະດັບນີ້ ແມ່ນອາດຈະເປັນການຊີ້ຊະຕາ ຜົນການແຂ່ງຂັນໄດ້ເລີຍ ເຊິ່ງເຮັດໃຫ້ເກມໃນ ຊ່ວງທ້າຍເຄິ່ງເວລາຫຼັງຊ້າລົງ ແລະ ທັງ 2 ທີມກໍ່ເນັ້ນໄປທີຄວາມແນ່ນອນ ຂອງການຫຼິ້ນບານ ເພື່ອຮັກສາຄວາມໄດ້ປຽບ ໄວ້ກັບຕົວເອງ. ເວລາທີ່ເຫຼືອເຮັດຫຍັງກັນບໍ່ໄດ້ ຈົບ 90 ນາທີສະເໝີກັນໄປ 0-0 ຕ້ອງຕໍ່ເວລາອີກ 30 ນາທີເພື່ອຫາຜູ້ຊະນະຕໍ່ໄປ.

   ເລີ່ມມາໃນຊ່ວງຕໍ່ເວລາພິເສດ ທັງ 2 ທີມຫຼິ້ນດ້ວຍຄວມລະມັດລະວັງ, ເນັ້ນຄວາມແນ່ນອນ ແລະ ການຄອງບານ. ໃນຊ່ວງເຄິ່ງເວລາທີ 2 ຂອງຊ່ວງຕໍ່ເວລາພິເສດ Portugal ມາໄດ້ລູກຕັ້ງເຕະ ຢູ່ໜ້າກອບເຂດໂທດຂອງ France ແຕ່ຍິງໄປຕຳຄານຢ່າງໜ້າເສຍດາຍ ແຕ່ຫຼັງຈາກນັ້ນໃນນາທີທີ 109 Portugal ໂດຍ Eder ຍິງໃຫ້ Portugal ຂຶ້ນນຳ 1-0. ຫຼັງຈາກນັ້ນ France ເຫຼືອເວລາອີກ 11 ນາທີ ແລະ France ກໍ່ມາເລັ່ງເກມໃນ ຊ່ວງເວລາທີ່ເຫຼືອ ແຕ່ກໍ່ບໍ່ສາມາດຕີສະເໝີໄດ້. ຈົບເກມໃນ 120 ນາທີ Portugal ເອົາຊະນະ France ເຈົ້າພາບໄປໄດ້ 1-0 ແລະ Portugal ເປັນແຊັມ Euro 2016 ໄດ້ສຳເລັດ ແບບພິກລອກ ເໜືອຄວາມຄາດໝາຍ ແລະ ເປັນການສ້າງປະຫວັດສາດ ໜ້າໃໝ່ຂອງພວກເຂົາ ທີ່ສາມາດຄວ້າແຊັມ ສະໄໝທຳອິດມາຄອບຄອງໄດ້.

ຜົນງານຂອງ Portugal ຫຼິ້ນ 7 ນັດ ຍິງໄດ້ 9 ປະຕູ ເປັນແຊັມ Euro 2016 ສະໄໝທຳອິດ.
Pepe ໄດ້ເປັນ Man of the Match.
ດາວຊັນໂວຂອງ Euro 2016 ຕົກເປັນຂອງ Antoine Griezmann ທີ່ຍິງໄດ້ 6 ປະຕູ.

ຂອບໃຈພາບຈາກ uefa.com




ຂ່າວຍອດນິຍົມ 7 ວັນລ່າສຸດ