ລາຍລະອຽດຂ່າວ
ສະກຸບພິເສດ: ເປັນຫຍັງ Copa America ຈຶ່ງຈັດການແຂັ່ງຂັນ 2 ປີຊ້ອນ 2015 ແລະ 2016
ຂຽນເມື່ອ: 05/07/2016 04:07 | ໂດຍ: ແອັດມິນ | ອ່ານ: 369 ຄັ້ງ

     ເຖິງແມ່ນວ່າການແຂ່ງຂັນ ບານຕະລາຍການ Copa America ໄດ້ຈັບໄປແລ້ວໃນທ້າຍເດືອນ ມິຖຸນາ ທີ່ຜ່ານມາ ແຕ່ຍ້ອນວ່າມີບາງທ່ານ ຍັງມີຄຳຖາມ ແລະ ຂໍ້ສົງໃສກ່ຽວກັບການຈັດການແຂ່ງຂັນ Copa America ວ່າ ດ້ວຍເຫດໃດ ການແຂ່ງຂັນບານເຕະ ລາຍການນີ້ເຖິງໄດ້ຈັດ 2 ປີຊ້ອນຄືປີ 2015 ແລະ ປີ 2016, ດັ່ງນັ້ນ ທາງທີມງານ laosportnews ກໍ່ໄດ້ໄປຊອກຫາຄຳຕອບ ແລະ ເອົາມາຂຽນເປັນ ສະກຸບພິເສດ ໃຫ້ໄດ້ອ່ານກັນໃນມື້ນີ້.

    ໂດຍຫຍໍ້: ເນື່ອງຈາກວ່າ ໃນປີ 2016 ເປັນປີຄົບຮອບ 100 ປີຂອງການແຂ່ງຂັນ Copa America ສະນັ້ນ ເຖິງວ່າຈະຈັດການແຂ່ງຂັນ Copa America ໃນປີ 2015 ແລ້ວ ກໍ່ຍັງໄດ້ຈັດການແຂ່ງຂັນຂຶ້ນອີກໃນປີ 2016 ເພື່ອເປັນການສະຫຼອງ ການຄົບຮອບ 100 ປີຂອງການແຂ່ງຂັນລາຍການນີ້ ໂດຍໃສ່ຊື່ການແຂ່ງຂັນວ່າ Copa America Centenario, ສາມາດອ່ານລາຍລະອຽດ ເພີ່ມເຕີມທາງດ້ານລຸ່ມ.


    Copa America  ຊື່ເກົ່າແມ່ນ South America Football Champioinship ແມ່ນລາຍການແຂ່ງຂັນ ບານເຕະຊາຍລະດັບນານາຊາດ ລະຫວ່າງບັນດາທີມຊາດຂອງປະເທດ CONMEBOL (ໃນພາສາ ສະເປນ ຂຽນວ່າ Confederación Sudamericana de Fútbol ສະມາພັນບານເຕະອາເມຣິກາໃຕ້) ເຊິ່ງປະກອບມີ Argentina, Bolivia, Brazil, Chile, Colombia, Ecuador, Paraguay, Peru, Uruguay, Venezuelaເປັນລາຍການແຂ່ງຂັນ ບານເຕະລະດັບທະວີບ ທີ່ເກົ່າແຕ່ທີ່ສຸດໃນໂລກ ເຊິ່ງການແຂ່ງຂັນ ໄດ້ຈັດຂຶ້ນຄັ້ງທຳອິດແມ່ນໃນປີ 1916.

   ຕັ້ງແຕ່ປີ 1993 ເປັນຕົ້ນມາ, ການແຂ່ງຂັນແມ່ນປະກອບມີ 12 ທີມ, 10 ທີມມາຈາກປະເທດ CONMEBOL ແລະ ອີກ 2 ທີມແມ່ນຮັບເຊີນ ຈາກສະມາພັນອື່ນໆ ໜຶ່ງໃນນັ້ນແມ່ນ Mexico ທີ່ເປັນປະເທດຢູ່ນອກ CONMEBOL ທີ່ໄດ້ເຂົ້າຮ່ວມການແຂ່ງຂັນ ທຸກຄັ້ງນັບຕັ້ງແຕ່ປີ 1993 ແລະ ອີກປະເທດ 1 ແມ່ນມາຈາກປະເທດ CONCACAF (Confederation of North, Central America and Caribbean Association Football ສະມາພັນສະມາຄົມບານເຕະອາເມຣິກາເໜືອ, ອາເມຣິກາກາງ ແລະ ຄາຣີບຽນ) ເຊິ່ງລວມມີ Canada, Costa Rica, Cuba, El Salvador, Haiti, Honduras, Jamaica, Mexico, Trinidad and Tobago ແລະ United States ແຕ່ໃນປີ 1999 Japan ໄດ້ຖືກຮັບເຊີນ ເຂົ້າຮ່ວມການແຂ່ງຂັນ.

   ໃນປີ 2016 ມີຈຳນວນທີມ ເຂົ້າຮ່ວມການແຂ່ງຂັນ 16 ທີມ ໃນນັ້ນ 6 ທີມມາຈາກປະເທດ CONCACAF ແລະ 10 ທີມມາຈາກປະເທດ CONMEBOL ເຊິ່ງ 8 ໃນ 10 ທີມຈາກ CONMEBOL ແມ່ນໄດ້ແຊັມຢ່າງໜ້ອຍ 1 ຄັ້ງ ມີແຕ່ Ecuador ແລະ Venezuela ທີ່ຍັງບໍ່ທັນໄດ້ແຊັມຈັກເທື່ອ ເຊິ່ງ Uruguay ໄດ້ແຊັມຫຼາຍທີ່ສຸດຄື 15 ຄັ້ງ ແລະ ປະເທດທີ່ໄດ້ແຊັມລ່າສຸດແມ່ນ Chile. Argentina ເປັນເຈົ້າພາບຈັດການແຂ່ງຂັນຫຼາຍທີ່ສຸດຄື 9 ຄັ້ງ ໃນຂະນະທີ USA ເປັນປະເທດຢູ່ນອກ CONMEBOL ພຽງໜຶ່ງດຽວທີ່ໄດ້ເປັນ ເຈົ້າພາບຈັດການແຂ່ງຂັນ ແລະ ເປັນຄັ້ງທຳອິດໃນປີ 2016. ໃນປີ 1975, 1979 ແລະ 1983 ເປັນ 3 ຄັ້ງທີ່ການແຂ່ງຂັນ ທີ່ໄດ້ຈັດການແຂ່ງັຂັນ ກະຈາຍຢູ່ຫຼາຍປະເທດ ໃນອາເມຣິກໃຕ້.

    ການເປັນເຈົ້າພາບ, ໃນປີ 1984 ກຸ່ມປະເທດ CONMEBOL ໄດ້ປັບປ່ຽນການໝູນວຽນ ສິດໃນການ ເປັນເຈົ້າພາບຈັດການແຂ່ງຂັນ ລະຫວ່າງປະເທດໃນສະມາພັນ ແລະ ຮອບທຳອິດຂອງການໝູນວຽນ ໄດ້ຈົບລົງແລ້ວ ໂດຍການເປັນເຈົ້າພາບຂອງ Venezuela ໃນປີ 2007. ຮອບທີ 2 ເລີ່ມໃນປີ 2011 ໂດຍເຈົ້າພາບຈະໝູນວຽນ ຕາມການລຽງລຳດັບຕາມຕົວອັກສອນ ເຊິ່ງເລີ່ມຈາກ Argentina ແລະ ມີ Chile, Mexico ແລະ USA ສະແດງຄວາມສົນໃຈ ເປັນເຈົ້າພາບຖັດຈາກ Argentina ແຕ່ ຄະນະກຳມະການບໍລິຫານງານ CONMEBOL ໄດ້ຕົກລົງກັນວ່າຈະປະຕິບັດ ຕາມສິດການໝູນວຽນ ທີ່ໄດ້ກຳນົດໄວ້ ແລະ ໃຫ້ແຕ່ລະທີມຢືນຢັນວ່າຈະຕ້ອງການເປັນເຈົ້າພາບຕາມກຳນົດໄວ້ ຫຼື ບໍ່ ໂດຍບໍ່ໄດ້ບັງຄັບ ແລະ Argentina ໄດ້ຢືນຢັນການເປັນເຈົ້າພາບເມື່ອວັນທີ 24 ພະຈິກ 2008 ວ່າຈະເປັນເຈົ້າພາບ ຈັດການແຂ່ງຂັນ ຕາມສິດຂອງຕົນ ໃນປີ 2011.

   ເຈົ້າພາບປີ 2015 ຕາມກຳນົດເດີມແມ່ນ Brazil ແຕ່ເນື່ອງຈາກວ່າ Brazil ໄດ້ເປັນເຈົ້າພາບ ຈັດການແຂ່ງຂັນບານໂລກ 2014 ແລະ Olympics ລະດູຮ້ອນ 2016 ແລ້ວ ເຊິ່ງປະທານ CONMEBOL ໄດ້ສະເໜີ Mexico ເປັນເຈົ້າພາບແທນ Brazil ແລະ ອະນຸຍາດໃຫ້ Brazil ແລະ Chile ໄປປຶກສາກັນ ເຖິງຄວາມເປັນໄປໄດ້ ໃນການປ່ຽນກັນເປັນເຈົ້າພາບໃນປີ 2015 ແລະ 2019 ເຊິ່ງທັງສອງປະເທດໄດ້ຕົກລົງກັນ ແລະ ຖືກຢືນຢັນຈາກ CBF ຫຼື  Brazilian Football Confederation (ພາສາໂປຕຸເກດ: Confederação Brasileira de Futebol)  ໃນເດືອນກຸມພາ ປີ 2011 ວ່າການຈັດການແຂ່ງຂັນປີ 2015 ຈະຍັງຄົງຈັດທີ່ Brazil, ແຕ່ວ່າໃນເດືອນ ມິນາ 2012 Chile ໄດ້ປະກາດວ່າ ພວກເຂົາຈະເປັນເຈົ້າພາບ ຈັດການແຂ່ງຂັນໃນປີ 2015 ແທນ Brazil ພາຍຫຼັງທີ່ປະທານ CBF ຄົນເກົ່າລ່າອອກຈາກຕຳແໜ່ງ ແລະ CBF ກໍ່ເຫັນດີປ່ຽນ ການເປັນເຈົ້າພາບ ຈັດການແຂ່ງຂັນໃນປີ 2016 ໄປເປັນ Chile. ການປ່ຽນເຈົ້າພາບລະຫວ່າງ Chile ແລະ Brazil ໄດ້ປະກາດເປັນທາງການ ໃນເດືອນພິດສະພາ 2012.

   ການແຂ່ງຂັນບານເຕະ Copa America ຕັ້ງແຕ່ປີ 1916-2016 ກໍ່ຈະຄົບຮອບ 100 ປີພໍດີ ແລະ ເພື່ອເຮັດໃຫ້ໂອກາດ ອັນພິເສດດັ່ງກ່າວນີ້ ມີຄວາມໝາຍຄວາມສຳຄັນຍິ່ງຂຶ້ນ ທັງ 2 ສະມາພັນ ເລີຍຕົກລົງເຫັນດີ ໃຫ້ຈັດການແຂ່ງຂັນ Copa America ຄົບຮອບ 100 ຂຶ້ນໃນປີ 2016 ແລະ ເປັນການຈັດການແຂ່ງຂັນ ລາຍການນີ້ນອກປະເທດ CONMEBOL ເປັນຄັ້ງທຳອິດ.


ຂອບໃຈຂໍ້ມູນຈາກ wikipedia.org,sports.yahoo.com
ຂອບໃຈພາຍຈາກ wikipedia.org

ໂດຍ ໂດເຣມອນ

ສະໜັບສະໜູນຂ່າວໂດຍ: