ຜີສາດແດງ "ແມນເຊສເຕີ ຢູໄນເຕັດ" ຟື້ນຈາກຫຼຸມໄດ້ແລ້ວ ຫຼັງຈາກຖືກ ລີເວີພູລ ຝັງໄປເຖິງ 7-0 ໃນເກມລີກທ້າຍອາທິດຜ່ານມາ ໂດຍນັດນີ້ ຜີສາດແດງ ກັບມາຖະຫຼົ່ມ "ຣີອາລ ເບຕິສ" ຜູ້ມາຢາມຈາກສະເປນ ໄປແບບຂາດຮອບ 4-1 ໃນເກມ ຢູໂຣປາ ລີກ ນັດແຮກ ໄດ້ສຳເລັດ ກ່ອນທີ່ຈະອອກໄປຢາມບ້ານເບຕິສ ໃນວັນພະຫັດໜ້າ.

      ແມນຢູ ຫຼິ້ນໃນສະໜາມໂອລແທຣັບຟອດ ໄດ້ປະຕູອອກນຳໄວແຕ່ນາທີໆ 6 ຈາກ ມາຄັສ ແຣຊຟອດ ເຊິ່ງກາຍເປັນປະຕູທີ 5 ໃນ 7 ເກມຂອງເຂົາໄປແລ້ວໃນລາຍການນີ້.​ແຕ່ ນາທີ 32 ເບຕິສ ກໍຕີສະເໝີໄດ້ຈາກ ອາໂຢເຊ ເປເຣສ ຈົບເຄິ່ງແຮກ ສະເໝີກັນຢູ່ 1-1.

      ກັບມາໃນເຄິ່ງຫຼັງ, ແມນຢູ ປ່ຽນໂຕໄວ ຖອດ ດາໂລ ແບັກຂວາອອກ ໂດຍສົ່ງ ວານບິດຊາກາ ລົງມາແທນ ແລະ ພຽງ 7 ນາທີ ແອນໂທນີ ກໍມາຊັດປະຕູທີສອງໃຫ້ແມນຢູ ຂຶ້ນນຳ 2-1. ຈາກນັ້ນ, ເກມຂອງເຈົ້າບ້ານກໍຍິ່ງໄຫຼລື່ນ ມາໄດ້ອີກສອງປະຕູ ຈາກ ບຣູໂນ ເຟີນັນເດັສ ນາທີ 58 ແລະ ປິດທ້າຍດ້ວຍ ເວັກຄອດ ນາທີໆ 82 ຊຶ່ງເປັນປະຕູທຳອິດຂອງເຂົາ ນັບແຕ່ຍ້າຍມາຢູ່ກັບ ແມນເຊັສເຕີ ຢູໄນເຕັດ.

      ຈົບເກມ, ແມນ ຢູໄນເຕັດ ຖະຫຼົ່ມ ຣີອາລ ມາຕິສ ຂາດຮອຍ 4-1 ເກັບໄຊໄປກ່ອນ ແລະ ໂອກາດທະລຸເຂົ້າສູ່ຮອບ ກ່ອນຮອງຊະນະເລີດ ຫຼື ຮອບ 8 ທີມສຸດທ້າຍແມ່ນມີສູງ!.

*ສ່ວນຜົນອີກ 7 ຄູ່ ມີດັ່ງນີ້:

- ຊັກຕ້າ ໂດເນັດ (ຢູເຄຣນ) 1-1 ເຟເຢນູດ (ຮອນແລນ);

- ເຊບີຢາ (ສະເປນ) 2-0 ເຟເນບາເຊ (ຕູຣະເກຍ);

-  ຈູເວນຕຸສ (ອິຕາລີ) 1-0 ຟາຍບວກ (ເຢຍລະມັນ);

- ຢູນຽນ ເບີລິນ (ເຢຍລະມັນ) 3-2 ຢູນຽນ ເອັສຈີ (ເບລຢ້ຽມ);

- ສະປອດຕິ້ງ ລິສບອນ (ໂປຕຸເກດ) 2-2 ອາເຊນອລ (ອັງກິດ);

- ໂຣມາ (ອິຕາລີ) 2-0 ໂຊເຊຍດດ (ສະເປນ);

- ເລເວີຄູເຊັນ (ເຢຍລະມັນ) 2-0 ເຟຣັນວາໂຣສ (ຮັງກາຣີ).

ໂດຍ: ອອ໊ຟໄຊ