ລາຍລະອຽດຂ່າວ
“ສິງຄຳ”-“ເພັດພະຈັນ” ຄອງແຊ໋ມຍິງປືນ ຊຸດອ໋ອບ ປະເພດຄູ່ ຊີງແຊ໋ມ ໄອພີເອັດຊີ ລາວ 2023
ຂຽນເມື່ອ: 24/01/2023 11:01 | ໂດຍ: reporter | ອ່ານ: 56 ຄັ້ງ

      ທ້າວ ສິງຄຳ ສີປະເສີດ ກັບ ທ້າວ ເພັດພະຈັນ ສີວົງສາ ຊ່ວຍກັນຍິງເປົ້າໄດ້ຢ່າງແມ້ນຍຳ ຈົນສາມາດ ຄວ້າອັນດັບທີ 1 ປະເພດປືນຊຸດອ໋ອບປະເພດຄູ່ ໃນການແຂ່ງຂັນຍິງປືນໄອພີເອັດຊີ ລະດັບ 1 ປະຈຳປີ 2023 ເພື່ອສ້າງຂະບວນການສະເຫຼີມສະຫຼອງວັນສ້າງຕັ້ງກອງທັບ ປະຊາຊົນລາວ ຄົບຮອບ 74 ປີ (20 ມັງກອນ 1949-20 ມັງກອນ 2023) ໄປຄອງ. ຂະນະທີ່ແຊ໋ມ ປະເພດປືນໂປຣດັກຊັນ ຮຸ່ນທົ່ວໄປ ຕົກເປັນຂອງ ທ້າວ ສຸນັນ ວັດທະນະບູນ ສ່ວນ ທ້າວ ແສງສະຫວັນ ສີສະວົງ ຄວ້າແຊ໋ມປືນໂປຣດັກຊັນມືໃໝ່.

      ສະໂມສອນຍິງປືນ ໄອພີເອັດຊີລາວ, ສະຫະພັນຍິງປືນແຫ່ງຊາດລາວ ໄດ້ຈັດການແຂ່ງຂັນຍິງປືນໄອພີເອັດຊີ ລະດັບ 1 ປະຈຳປີ 2023 ໃນວັນທີ 20 ມັງກອນ 2023 ທີ່ສະໜາມຝຶກຊ້ອມກິລາຍິງປືນ 5 ເມສາ ໃຫ້ກຽດເຂົ້າຮ່ວມ ແລະ ມອບລາງວັນໂດຍທ່ານ ພຸດທະສັກ ສຸກອາລຸນ ປະທານສະໂມສອນຍິງປືນໄອພີເອັດຊີລາວ ທັງເປັນຜູ້ອຳນວຍການສະໜາມຝຶກຊ້ອມກິລາຍິງປືນ 5 ເມສາ ພ້ອມດ້ວຍນັກກິລາເຂົ້າຮ່ວມ 20 ກວ່າຄົນ ຊຶ່ງເປັນລາຍການທຳອິດຂອງສະໂມສອນ ໄອພີເອັດຊີລາວ ທີ່ກຳນົດໃຫ້ນັກກິລາໄດ້ນຸ່ງຊຸດສູດຜູກກາຣາວັດ ມີການຊີງໄຊ 4 ລາຍການ ແຂ່ງຂັນ 5 ສະໜາມ ປະກອບມີ ປະເພດປືນໂປຣດັກຊັນ ຮຸ່ນທົ່ວໄປ, ໂປຣດັກຊັນມືໃໝ່, ຊຸດອ໋ອບດ່ຽວ ແລະ ຊຸດອ໋ອບຄູ່ 

      ສຳລັບຜົນການແຂ່ງຂັນປະເພດປືນຊຸດອ໋ອບ ປະເພດຄູ່ ແລະ ດ່ຽວລາຍການນີ້ ກຳນົດເປົ້າແຜ່ນ ຈຳນວນ 10 ແຜ່ນ ຍິງບໍ່ຈຳກັດລູກ ທີມໃດຍິງເປົ້າໝົດເປັນຜູ້ຊະນະ. ຜ່ານການແຂ່ງຂັນປະກົດວ່າ ແຊ໋ມຊຸດອ໋ອບ ຄູ່ຊາຍ ຕົກເປັນຂອງທ້າວ ສິງຄຳ ສີປະເສີດ ແລະ ທ້າວ ເພັດພະຈັນ ສີວົງສາ, ອັນດັບທີ 2 ທ້າວ ອານຸໄຊ ແສງດາລາ ແລະ ທ້າວ ທຽນອີ້ ແລະ ອັນດັບທີ 3 ທ້າວ ເພັດລະຄອນ ພາມີສິດ ກັບ ນາງ ກົງຄຳ ບົວແສງພະຈັນ; ປະເພດປືນຊຸດອ໋ອບດ່ຽວ ແຊ໋ມເປັນຂອງ ທ້າວ ເຊດຖາ ໄຄ້ຍະວົງ, ອັນດັບທີ 2 ນາງ ກົງຄຳ ບົວແສງພະຈັນ ແລະ ອັນດັບທີ 3 ຮ່ວມ ແມ່ນທ້າວ ແສງສະຫວັນ ສີສະວົງ ແລະ ທ້າວ ທາສຸກິ ຮາມາດະ; ປະເພດໂປດັກຊັນດ່ຽວສາຍທົ່ວໄປ ແຊ໋ມເປັນຂອງທ້າວ ສຸນັນ ວັດທະນາບູນ, ອັນດັບທີ 2 ທ້າວ ທຽນອີ້ ແລະ ອັນດັບທີ 3 ທ້າວ ຫົງພະຈັນ ດາລາວົງ; ປະເພດໂປດັກຊັນມືໃໝ່ດ່ຽວ ແຊ໋ມເປັນຂອງ ທ້າວ ແສງສະຫວັນ ສີສະວົງ, ອັນດັບທີ 2 ທ້າວ ເພັດພະຈັນ ສີວົງສາ ແລະ ອັນດັບທີ 3 ທ້າວ ທາສຸກິ ຮາມາດະ.

ຂໍ້ມູນ ແລະ ພາບ ຈາກ ໜັງສືພິມສຶກສາ-ກິລາ ລາຍວັນ

ໂດຍ: ປັ່ນໂຄ້ງ