ລາຍລະອຽດຂ່າວ
ກະຊວງ ສສກ ແລະ ບໍລິສັດ ພີເອັດແອວ ຊ່ວຍປັບປຸງກໍ່ສ້າງສະໜາມເປຕັງ ມູນຄ່າ 88 ລ້ານກວ່າກີບ
ຂຽນເມື່ອ: 24/01/2023 11:01 | ໂດຍ: reporter | ອ່ານ: 47 ຄັ້ງ

      ກະຊວງສຶກສາທິການ ແລະ ກິລາ (ສສກ) ສົມທົບກັບ ບໍລິສັດ ພີເອັດແອວ ກໍ່ສ້າງຄົບວົງຈອນ ຈໍາກັດຜູ້ດຽວ ສະໜັບສະໜູນເງິນ ຈຳນວນ 88.504.000 ກີບ ປະກອບສ່ວນເຂົ້າໃນການປັບປຸງກໍ່ສ້າງສະໜາມກິລາເປຕັງຂອງສະຖາບັນກິລາ-ກາຍະກຳ (ສບກ) ທີ່ສາມາດກໍ່ສ້າງສຳເລັດແລ້ວ ກຽມນຳໃຊ້ເຂົ້າໃນການຈັດຕັ້ງປະຕິບັດການຮຽນການສອນ ຂອງໂຮງຮຽນພອນສະຫວັນກິລາ-ກາຍະກຳກິລາ ຫຼື ຮພກ ສະຖາບັນກິລາກາຍະກຳ ແນໃສ່ສ້າງນັກກິລາເປຕັງເຍົາວະຊົນ ກຽມກ້າວຂຶ້ນໄປຮັບໃຊ້ທີມຊາດ ໃນຕໍ່ໜ້າ.

      ພິທີມອບ-ຮັບການອຸປະຖຳຄັ້ງນີ້ ໄດ້ມີຂຶ້ນ ເມື່ອວັນທີ 20 ມັງກອນ 2023 ທີ່ ຮພກ ເຂດບ້ານສີເກີດ ເມືອງນາຊາຍທອງ ນະຄອນຫຼວງວຽງຈັນ, ໃຫ້ກຽດກ່າວມອບໂດຍ ທ່ານ ນາງ ພວງທອງ ສຸຍະວົງ ປະທານບໍລິສັດ ພີເອັດແອວ ກໍ່ສ້າງຄົບວົງຈອນ ຈໍາກັດຜູ້ດຽວ ແລະ ກ່າວຮັບແມ່ນ ທ່ານ ດຣ. ສຸລິວັນ ເຊີນວິໄລ ຜູ້ອຳນວຍການສະຖາບັນກິລາ-ກາຍະກຳ, ໂດຍມີທ່ານ ປອ ນາງ ສີສຸກ ວົງວິຈິດ ຮອງລັດຖະມົນຕີ ກະຊວງສຶກສາທິການ ແລະ ກິລາ ແລະ ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ກະຊວງ ສສກ ພ້ອມດ້ວຍຄະນະອຳນວຍການສະຖາບັນ, ຄະນະອຳນວຍການ ຮພກ, ຫົວໜ້າ-ຮອງຫົວໜ້າພາກວິຊາ, ພະນັກງານ, ຄູອາຈານ ແລະ ນັກຮຽນ-ນັກສຶກສາ ເຂົ້າຮ່ວມເປັນສັກຂີພິຍານ.

      ການກໍ່ສ້າງໂຄງຫຼັງຄາສະໜາມກິລາເປຕັງແຫ່ງນີ້ ມີມູນຄ່າທັງໝົດ 88.504.000 ກີບ ໃນນີ້ທຶນຊ່ວຍເຫຼືອຈາກກະຊວງ ສສກ ມູນຄ່າ 38.504.000 ກີບ ແລະ ບໍລິສັດ ພີເອັດແອວ ກໍ່ສ້າງຄົບວົງຈອນ ຈໍາກັດຜູ້ດຽວ ມູນຄ່າ 50.000.000 ກີບ ຊຶ່ງການກໍ່ສ້າງໄດ້ດໍາເນີນການຕາມແບບທີ່ຖືກຮັບຮອງຈາກພະແນກຄຸ້ມຄອງອອກແບບກໍ່ສ້າງ-ສ້ອມແປງ ກົມການເງິນ ສສກ, ມີຂະໜາດກວ້າງ 15 ແມັດ, ຍາວ 20 ແມັດ, ສູງ 7 ແມັດ, ໂດຍໄດ້ເລີ່ມລົງມືກໍ່ສ້າງນັບແຕ່ວັນທີ 9 ພະຈິກ 2022 ແລະ ສໍາເລັດໃນວັນທີ 18 ພະຈິກ 2022 ມື້ນີ້ ຈຶ່ງມີພິທີມອບ-ຮັບເປັນທາງການ.

      ໂອກາດນີ້, ທ່ານ ນາງ ປອ. ສີສຸກ ວົງວິຈິດ ຕາງໜ້າຄະນະນຳກະຊວງ ສສກ ກໍໄດ້ກ່າວສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງສູງມາຍັງປະທານບໍລິສັດ ພີເອັດແອວ ກໍ່ສ້າງຄົບວົງຈອນ ຈໍາກັດຜູ້ດຽວ ຊຶ່ງຍາມໃດກໍໄດ້ໃຫ້ການສະໜັບສະໜູນວຽກງານກິລາຕະຫຼອດ ໂດຍສະເພາະການຊ່ວຍເຫຼືອກິລາດອກປີກໄກ່ ແລະ ຫຼ້າສຸດແມ່ນໃຫ້ການຊ່ວຍປັບປຸງກໍ່ສ້າງສະໜາມເປຕັງ ຊຶ່ງເປັນສະໜາມທີ່ຈະປັ້ນນັກກິລາຮຸ່ນສືບທອດກ້າວສູ່ທີມຊາດ ໃນອະນາຄົດ ຫວັງຢ່າງຍິ່ງວ່າທາງອົງການຈັດຕັ້ງ ສບກ ຈະພ້ອມກັນນຳໃຊ້ສະໜາມແຫ່ງນີ້ ໃຫ້ເກີດຜົນປະໂຫຍດສູງສຸດຕາມແຜນການທີ່ວາງໄວ້ປະກົດຜົນເປັນຈິງ ເວົ້າລວມ, ເວົ້າສະເພາະແມ່ນນຳໃຊ້ສ້າງນັກຮຽນ-ນັກສຶກສາ ເຂົ້າໃນການຝຶກແອບຝຶກຊ້ອມໃຫ້ມີການພັດທະນາຢ່າງມີຄຸນນະພາບ ເຂົ້າຮ່ວມແຂ່ງຂັນສ້າງຜົນງານເປັນກຽດສັກສີ ແລະ ຊື່ສຽງໃຫ້ແກ່ປະເທດຊາດ.

ຂໍ້ມູນແລະ ພາບ ຈາກ ໜັງສືພິມ ສຶກສາ-ກິລາ ລາຍວັນ

ຮຽບຮຽງໂດຍ: ປັ່ນໂຄ້ງ