ລາຍລະອຽດຂ່າວ
ເອຟເວີຕັນ ປະກາດສັ່ງປົດ “ ແຟຣງ ແລມພາດ” ຢ່າງເປັນທາງການແລ້ວ!
ຂຽນເມື່ອ: 24/01/2023 08:01 | ໂດຍ: reporter | ອ່ານ: 44 ຄັ້ງ

      “ແຟຣງ ແລມພາດ” ຜູ້ຈັດການທີມເອຟເວີຕັນ ຂອງອັງກິດ ຖືກສັ່ງໃຫ້ປົດອອກຈາກຕຳແໜ່ງຢ່າງເປັນທາງການແລ້ວ ໃນວັນທີ 23 ມັງກອນທີ່ຜ່ານມາ ເນື່ອງຈາກພາທີມປະລາໄຊເຖິງ 11 ນັດ ຈາກ 14 ນັດ ສົ່ງຜົນໃຫ້ທີມຕ້ອງຫຼົ່ນລົງໄປຢູ່ອັນດັບຮອງສຸດທ້າຍ ເກັບໄດ້ພຽງ 15 ຄະແນນເທົ່ານັ້ນ ຫຼັງຈາກລົງແຂ່ງໃນພຣີເມຍລີກ ລະດູການນີ້ໄປແລ້ວທັງໝົດ 20 ນັດ.

      “ແລມພາດ” ອະດີດນັກເຕະທີມຊາດອັງກິດ, ໃນໄວ 44 ປີ,  ຊຶ່ງເຂົ້າມາຄຸມທີມເອຟເວີຕັນບໍ່ເຖິງປີ ແລະ ມີສັນຍາຮອດເດືອນມິຖຸນາ ປີ 2024, ມີສະຖິຕິຄຸມທີມເອຟເວີຕັນທັງໝົດແລ້ວ 44 ນັດ ຊະນະ 12​ ນັດ, ສະເໝີ 8 ນັດ ແຕ່ເສຍເຖິງ 24 ນັດ ເຮັດໃຫ້ ສະໂມສອນຕ້ອງຕັດສິນໃຈປົດ ແລມພາດ ກ່ອນໝົດກຳນົດສັນຍາ.

      ນອກຈາກ ແລມພາດ ແລ້ວ, ເອຟເວີຕັນ ຍັງສັ່ງປົດທີມງານໂຄ໊ຊນຳກັນອີກຫຼາຍຄົນ ຍົກເວັ້ນໂຄ໊ຊຜູ້ຮັກສາປະຕູຄົນດຽວ ທີ່ຍັງຮັກສາໄວ້.

ໂດຍ: ປັ່ນໂຄ້ງ