ລາຍລະອຽດຂ່າວ
ປືນໃຫຍ່ ຍັງແຮງບໍ່ຢຸດ ສອຍ ແມນຢູ 3-2...ນຳເປັນຈ່າຝູງຕໍ່ໄປ!
ຂຽນເມື່ອ: 23/01/2023 08:01 | ໂດຍ: reporter | ອ່ານ: 39 ຄັ້ງ

      ທີມ ປືນໃຫຍ່ “ອາເຊນອລ” ຍັງແຮງບໍ່ຢຸດ ຫຼັງເປີດບ້ານສອຍທີມຜູ້ມາຢາມ ຜີສາດແດງ ແມນເຊສເຕີ ຢູໄນເຕັດ ໄປແບບວຸດຫວິດ 3-2 ເກັບອີກສາມແຕ້ມ ນຳເປັນຈ່າຝູງຕໍ່ໄປ ໃນເກມພຣີເມຍລີກອັງກິດ ນັດທ້າຍສັບປະດາ!

       ເຈົ້າບ້ານ ອາເຊນອລ ຖືກແມນຢູ ຍິງນໍາອອກໄປກ່ອນແຕ່ນາທີໆ 17 ຈາກ “ມາຄັສ ແຣຊຟອດ” ກ່ອນທີ່ຈະຍິງນຳມາສະເໝີ ເປັນ 1-1 ໃນນາທີໆ 24 ຈາກ “ເອັດເວີດ ເອັນເຄເທຍ” ແລະ ມາຍິງແຊງອອກນຳເປັນ 2-1 ​ໃນນາທີໆ 53 ຈາກ “ບູຄາໂຢ ຊາກາ” ກ່ອນທີ່ “ລີຊານໂດຣ ມາຕີເນຊ” ຂອງແມນຢູ ຈະຍິງມາສະເໝີ 2-2​ໃ ນນາທີໆ 59.

      ຫຼັງຈາກນັ້ນ, ເກມທຳທ່າຈະຈົບລົງດ້ວຍຜົນສະເໝີ ແຕ່ນາທີສຸດທ້າຍ (90’) ເອັດເວີດ ເອັນເຄເທຍ ກໍມາຍິງປະຕູໄຊໃຫ້ເຈົ້າບ້ານ ອາເຊນອລ ສອຍຊະນະ ແມນຢູ ໄປແບບສຽດສິວ 3-2 ເກັບໄດ້ອີກສາມຄະແນນສຳເລັດ ມີ 50 ຄະແນນ ຈາກການລົງເຕະ 19 ນັດ ແລະ ນຳເປັນຈ່າຝູງຕໍ່ໄປ. ສ່ວນ ແມນຢູ ຍັງຢູ່ທີ່ 39 ຄະແນນ ແຕ່ເຕະໄປແລ້ວ 20 ນັດ ຢູ່ອັນດັບສີ່ຂອງຕາຕະລາງ.

*ສ່ວນຜົນຂອງຄູ່ອື່ນໆມີດັ່ງນີ້:

- ແມນເຊສເຕີ ຊີຕີ້ - ວູຟແທັມຕັນ: 3-0;

- ລີດ ຢູໄນເຕັດ - ເບຣນຟອດ: 0-0;

- ຄຣິສຕັນ ພາເຫຼດ - ນິວຄາສເຊິນ 0-0;

- ເວສແຮມ - ເອຟເວີຕັນ 2-0;

- ເຊົາແທມຕັນ - ແອສຕັນ ວິລລາ: 0-1;

- ເລສເຕີ ຊີຕີ້ - ໄບຣຕັນ: 2-2;

- ບອນມັດ - ຟໍເຣສ : 1-1;

- ລີເວີພູລ - ເຊວຊີ : 0-0.

ໂດຍ: ປັ່ນໂຄ້ງ