ລາຍລະອຽດຂ່າວ
ສກຂ ສະຫວັນນະເຂດ ຮ່ວມກັບ ທະຫານແຂວງ ສ້າງຂະບວນການກິລາ ສະຫຼອງວັນສ້າງຕັ້ງກອງທັບ ຄົບຮອບ 74 ປີ
ຂຽນເມື່ອ: 21/01/2023 15:01 | ໂດຍ: reporter | ອ່ານ: 35 ຄັ້ງ

      ພະແນກສຶກສາທິການ ແລະ ກິລາແຂວງ ຫຼື ສກຂ ສະຫວັນນະເຂດ ຮ່ວມກັບ ກອງບັນຊາການທະຫານແຂວງສະຫວັນນະເຂດ ສ້າງຂະບວນການກິລາກິລາມວນຊົນ ເພື່ອສຸຂະພາບ, ມິດຕະພາບ ແລະ ການພັດທະນາ ເພື່ອສະເຫຼີມສະຫຼອງວັນສ້າງຕັ້ງກອງທັບ ປະຊາຊົນລາວ ຄົບຮອບ 74 ປີ (20 ມັງກອນ 1949-20 ມັງກອນ 2023) ໃນວັນທີ 18 ມັງກອນ 2023 ທີ່ສະໜາມກິລາແຂວງ (ຫຼັກ 4) ນະຄອນໄກສອນ ພົມວິຫານ, ໂດຍມີ ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ, ທ່ານ ພົນຈັດຕະວາ ສີ ທະວີໄຊ ຫົວໜ້າການເມືອງ ກອງບັນຊາການທະຫານແຂວງ ແລະ ທ່ານ ອະນຸສອນ ສຸດທິວົງ ຮອງຫົວໜ້າພະແນກສຶກສາທິການ ແລະ ກິລາແຂວງ ພ້ອມດ້ວຍບັນດາພະນັກງານຈາກກອງບັນຊາການທະຫານແຂວງ ແລະ ພະແນກສຶກສາທິການ ແລະ ກິລາ, ພະແນກການອ້ອມຂ້າງແຂວງ ແລະ ອົງການຈັດຕັ້ງມະຫານຊົນ ເຂົ້າຮ່ວມຢ່າງເປັນຂະບວນການຟົດຟື້ນ.

      ໃນພິທີ, ທ່ານ ອະນຸສອນ ສຸດທິວົງ ໄດ້ລາຍງານໃຫ້ຮູ້ວ່າ: ການຈັດກິດຈະກໍາຄັ້ງນີ້ ກໍເພື່ອໃຫ້ມີບັນຍາກາດເບີກບານມ່ວນຊື່ນ, ຟົດຟື້ນ ແລະ ເຫັນໄດ້ຄວາມໝາຍຄວາມສໍາຄັນໃນການສະເຫຼີມສະຫຼອງວັນສ້າງຕັ້ງກອງທັບ ປະຊາຊົນລາວ ຄົບຮອບ 74 ປີ ແລະ ຍັງເປັນການສ້າງຂະບວນການໃຫ້ມວນຊົນຊາວແຂວງສະຫວັນນະເຂດ ໄດ້ອອກກໍາລັງກາຍ ໄດ້ຮ່ວມກິດຈະກໍາ ທີ່ເຕັມໄປດ້ວຍໄມຕີຈິດມິດຕະພາບ ແລະ ຄວາມສາມັກຄີອີກດ້ວຍ.

      ໂອກາດນີ້, ທ່ານ ພົນຈັດຕະວາ ສີ ທະວີໄຊ ກໍໄດ້ໃຫ້ກຽດເລົ່າຄືນປະຫວັດຄວາມເປັນມາຂອງວັນທີ 20 ມັງກອນ ຊຶ່ງທ່ານໄດ້ຍົກໃຫ້ເຫັນເຖິງປະຫວັດອັນຍາວນານປະຊາຊົນລາວບັນດາເຜົ່າເຄີຍມີມູນເຊື້ອນໍ້າໃຈຮັກຊາດ, ມີມູນເຊື້ອດຸໝັ່ນ, ມູນເຊື້ອສາມັກຄີ ແລະ ມູນເຊື້ອພິລາດອາດຫານຕໍ່ສູ້ຕ້ານຈັກກະພັດຜູ້ຮຸກຮານ ຊຶ່ງມີຫຼາຍຂະບວນການຕໍ່ສູ້ ຕະຫຼອດໄລຍະແຫ່ງການກໍາເນີດ, ສູ້ຮົບມີໄຊ ເຕີບໃຫຍ່ຂະຫຍາຍຕົວ 74ປີຜ່ານມາ ກອງທັບປະຊາຊົນລາວ ພ້ອມກັບປະຊາຊົນບັນດາເຜົ່າ ໄດ້ເຮັດສໍາເລັດປະຫວັດສາດທີ່ພັກ-ລັດມອບໝາຍໃຫ້ຕີເອົາໄຊຊະນະຈັກກະພັດຜູ້ຮຸກຮານ ແລະ ລູກແຫຼ່ງຕີນມືຂອງພວກເຂົາໃຫ້ປະລາໄຊ, ປົກປັກຮັກສາໝາກຜົນຂອງການປະຕິວັດ, ປົກປັກຮັກສາ ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດໄວ້ໃຫ້ໝັ້ນຄົງ.

      ສຳລັບກິດຈະກໍາໃນຄັ້ງນີ້ ປະກອບມີີ: ກິລາເຕະບານຊາຍ ເປັນການພົບກັນລະຫວ່າງ ທີມພະແນກສຶກສາທິການ ແລະ ກິລາແຂວງ ພົບກັບ ກອງບັນຊາການທະຫານແຂວງ. ຜົນການແຂ່ງຂັນປະກົດວ່າ ທັງສອງທີມເຮັດໄດ້ພຽງສະເໝີກັນ 2-2 ປະຕູ. ກໍໄດ້ສືບຕໍ່ກິດຈະກຳເຕັ້ນແອໂຣບິກ ພ້ອມທັງໄດ້ຮັບຊົມການສະແດງຟ້ອນຂັບລໍາ 4 ຈັງວະ ຈາກສະໂມສອນກອງບັນຊາການທະຫານແຂວງຕື່ມອີກ.

ຮຽບຮຽງໂດຍ: ປັ່ນໂຄ້ງ (ຂໍ້ມູນ: ໜັງສືພິມ ສຶກສາ-ກິລາ ລາຍວັນ)