ລາຍລະອຽດຂ່າວ
ສປປ ລາວ ຄາດວ່າຈະສົ່ງ 31 ປະເພດກິລາ ຮ່ວມຊີງໄຊໃນຊີເກມ ຄັ້ງທີ 32 ທີ່ປະເທດກຳປູເຈຍ
ຂຽນເມື່ອ: 20/01/2023 15:01 | ໂດຍ: reporter | ອ່ານ: 56 ຄັ້ງ

      ສປປ ລາວ ຄາດວ່າຈະສົ່ງທັບນັກກິລາເຂົ້າຮ່ວມຊີງໄຊທັງໝົດ 31 ປະເພດກິລາ ແລະ ພ້ອມໃຫ້ທັບນັກກິລາລາວ ໄດ້ເກັບຕົວຝຶກຊ້ອມເປັນເວລາ 90 ວັນ ກ່ອນເຂົ້າຮ່ວມແຂ່ງຂັນໃນງານມະຫະກຳກິລາຊີເກມ ຄັ້ງທີ 32 ຫຼື “ພະນົມເປນ ເກມ 2023” ທີ່ນະຄອນຫຼວງພະນົມເປນ ປະເທດກຳປູເຈຍ ເປັນເຈົ້າພາບ ໃນກາງປີ 2023 ນີ້

      ທ່ານ ບຸນມາ ທຳມະວົງ ຫົວໜ້າພະແນກພັດທະນາກິລາ ກົມກິລາລະດັບສູງ ກະຊວງສຶກສາທິກຫານ ແລະ ກິລາ ລາຍງານໃຫ້ທີມງານນັກຂ່າວໜັງສືພິມສຶກສາ, ວິທະຍາສາດ ແລະ ກິລາ ໃຫ້ຮູ້ວ່າ: ໃນປັດຈຸບັນທາງກົມກິລາລະດັບສູງ ໃນນາມກອງເລຂາເຕັກນິກ ກະກຽມນຳພາທັບນັກກິລາລາວ ເຂົ້າຮ່ວມແຂ່ງຂັນກິລາໃນງານມະຫະກຳກິລາຊີເກມ ຄັ້ງທີ 32 ທີ່ນະຄອນຫຼວງພະນົມເປນ ປະເທດກຳປູເຈຍ ເປັນເຈົ້າພາບ ລະຫວ່າງວັນທີ 5-17 ພຶດສະພາ 2023  ໄດ້ມີການຈັດຕັ້ງປະຕິບັດແຜນວຽກງານຕ່າງໆທີ່ຂຶ້ນແຜນໄວ້ໃນເບື້ອງຕົ້ນ ມີຄວາມຄືບໜ້າໄປຫຼາຍແລ້ວ ໂດຍສະເພາະກຳລັງລົງທະບຽນປ້າຍນໍ້າເບີຂອງນັກກິລາ ແລະ ກຳນົດປະເພດກິລາສົ່ງເຂົ້າຮ່ວມແຂ່ງຂັນ ຊຶ່ງຄາດວ່າປີນີ້ ຈະສົ່ງນັກກິລາເຂົ້າຮ່ວມທັງໝົດ 31 ປະເພດກິລາ. ແຕ່ເຖິງຢ່າງໃດກໍຕາມ, ແຜນທັງໝົດນີ້ ຍັງຢູ່ໃນການພິຈາລະນາຂອງລັດຖະບານ ສ່ວນລາຍລະອຽດຄວາມຊັດເຈນຈະເປັນແນວໃດນັ້ນ ຈະຂໍລາຍງານໃຫ້ຊາບຕື່ມອີກ.

       ທ່ານ ບຸນມາ ທຳມະວົງ ຍັງໃຫ້ຮູ້ອີິກວ່າ: ສຳລັບສູນຝຶກຊ້ອມກິລາ 31 ປະເພດນັ້ນ ແມ່ນໄດ້ຝຶກແອບທີ່ສະໜາມກິລາຕ່າງໆພາຍໃນສູນກາງ ເຊັ່ນ: ສູນຝຶກກິລາແຫ່ງຊາດ (ສີເກີດ), ວິທະຍາເຂດດົງໂດກ ຫຼື ສະໜາມອ້ອມຂ້າງ ມະຫາວິທະຍາໄລແຫ່ງຊາດ, ສະໜາມກິລາກະຊວງປ້ອງກັນປະເທດ (ຫຼັກ5), ສະໜາມກິລາແຫ່ງຊາດ (ຫຼັກ16), ເຂດບ້ານໂພນທັນ ແລະ ວິທະຍາໄລເຕັກນິກສັບພະວິຊາ ສ່ວນກິລາລົດຖີບ ຊຶ່ງເປັນປະເພດກິລາທີ 31 ແມ່ນກຳນົດ ຝຶກຊ້ອມຢູ່ເສັ້ນທາງ 450 ປີ, ເສັ້ນທາງບ້ານເກິນ ແລະ ເສັ້ນທາງເມືອງວັງວຽງ ເປັນຫຼັກ.

      ສຳລັບການແຂ່ງຂັນກິລາ “ພະນົມເປນ ເກມ 2023” ປີນີ້ ກຳນົດໃຫ້ມີການຊີງໄຊທັງໝົດ 608 ຫຼຽນຄຳ ໃນ 40 ກວ່າປະເພດກິລາ ຊຶ່ງເປັນຈຳນວນຫຼຽນຄຳສູງສຸດນັບຕັ້ງແຕ່ມີການແຂ່ງຂັນກິລາຊີເກມ ແຕ່ລະຄັ້ງຜ່ານມາ ຊຶ່ງໃນຈຳນວນ 40 ກວ່າປະເພດກິລາ ໃນນີ້ແບ່ງເປັນກິລາແລ່ນ-ລານ ຊີງໄຊ 47 ຫຼຽນຄຳ, ກິລາທາງນ້ຳ 69 ຫຼຽນຄຳ (ລອຍນ້ຳ 39 ຫຼຽນຄຳ, ໂດດນ້ຳ 4 ຫຼຽນຄຳ, ໂປໂລນ້ຳ 2 ຫຼຽນຄຳ, ຟິນສະວິມມິງ 24 ຫຼຽນຄຳ), ດອກປີກໄກ່ 8 ຫຼຽນຄຳ, ບານບ້ວງ 4 ຫຼຽນຄຳ, ບິນລຽດ-ສະນຸກເກີ 10 ຫຼຽນຄຳ, ມວຍສາກົນ 17 ຫຼຽນຄຳ, ເພາະກາຍ 15 ຫຼຽນຄຳ, ໝາກເສິກ 12 ຫຼຽນຄຳ, ຄຣິກເກດ (ກິລາຂອງອິນເດຍ) 8 ຫຼຽນຄຳ, ລົດຖີບ 8 ຫຼຽນຄຳ, ແດ້ນສະປອດ 12 ຫຼຽນຄຳ, ອີ-ສະປອດ 9 ຫຼຽນຄຳ, ຟັນດາບ 12 ຫຼຽນຄຳ, ຟຼໍບານ 2 ຫຼຽນຄຳ, ເຕະບານ 2 ຫຼຽນຄຳ, ກັອບ 4 ຫຼຽນຄຳ, ຢິມນາສະຕິກສິນ 8 ຫຼຽນຄຳ, ຢິມນາສະຕິກແອໂຣບິກ 5 ຫຼຽນຄຳ, ຮອກກີ 4 ຫຼຽນຄຳ, ເຈັດສະກີ 6 ຫຼຽນຄຳ, ຢູໂດ 13 ຫຼຽນຄຳ, ຄາຣາເຕໂດ 17 ຫຼຽນຄຳ, ອານິດ (ກິລາພື້ນເມືອງຂອງຟິລິບປິນ) 12 ຫຼຽນຄຳ, ຢູຢິດສູ (ກິລາຈາກຍີ່ປຸ່ນ) 13 ຫຼຽນຄຳ, ຄິກບັອກຊິ້ງ 17 ຫຼຽນຄຳ, ຄຸນໂບກາຕໍ (ກິລາມວຍພື້ນເມືອງກຳປູເຈຍ) 21 ຫຼຽນຄຳ, ມວຍລາວ 17 ຫຼຽນຄຳ, ໂວວີນາມ 30 ຫຼຽນຄຳ, ອອບສະຕັດເຄິນ ເຣດ 4 ຫຼຽນຄຳ, ປັນຈັກສີລັດ 22 ຫຼຽນຄຳ, ເປຕັງ 11 ຫຼຽນຄຳ, ເຮືອໃບ 9 ຫຼຽນຄຳ, ຊັອບເທັນນິດ 7 ຫຼຽນຄຳ, ກະຕໍ້ 22 ຫຼຽນຄຳ, ປິ່ງປ່ອງ 7 ຫຼຽນຄຳ, ເທຄວັນໂດ 24 ຫຼຽນຄຳ, ເຮືອຍາວ 13 ຫຼຽນຄຳ, ເທັນນິດ 7 ຫຼຽນຄຳ, ໄຕຣກິລາ 7 ຫຼຽນຄຳ, ບານສົ່ງ 4 ຫຼຽນຄຳ, ຍົກນ້ຳໜັກ 14 ຫຼຽນຄຳ, ມວຍປ້ຳ 30 ຫຼຽນຄຳ ແລະ ວູຊູ 24 ຫຼຽນຄຳ.

 

ຮຽບຮຽງໂດຍ: ປັ່ນໂຄ້ງ (ຂໍ້ມູນ ຈາກ ໜັງສືພິມ ສຶກສາ-ກິລາ ລາຍວັນ)