ລາຍລະອຽດຂ່າວ
ນັກກິລາເທັນນິດລາວ ເຂົ້າຮ່ວມເທັນນິດທີມຊາຍ Davis Cup ຊີງແຊ໋ມໂລກ ຄັ້ງປະຫວັດສາດ
ຂຽນເມື່ອ: 17/10/2022 13:10 | ໂດຍ: revive | ອ່ານ: 285 ຄັ້ງ

      ສະຫະພັນກິລາເທັນນິດແຫ່ງຊາດລາວ ສົ່ງຄະນະນັກກິລາ ຈຳນວນ 6 ຄົນ, ຄູຝຶກ 2 ຄົນ ແລະ ນັກກິລາ 4 ຄົນ ເຂົ້າຮ່ວມແຂ່ງຂັນກິລາເທັນນິດທີມຊາຍ ຊິງແຊ໋ມໂລກ ຫຼື ລາຍການ Davis Cup ຄັ້ງທຳອິດ ທີ່ປະເທດບາເຣນ ນຳໂດຍ ທ່ານ ວົງສະຫວັດ ຈັນສົມພູ ຫົວໜ້າທີມ ພ້ອມດ້ວຍຄູຝຶກຊາວສິງກະໂປ ທ່ານ ອາລັນ ວ໋ອງ ແລະ ນັກກິລາ 4 ຄົນ ປະກອບມີ ວິທະຍາ ຣາຊາວະດີ, ສະຖາພອນ ສິມມາລາວົງ, ສົມພອນ ຊົງວິໄລ ແລະ ໄຊສະຫວັດ ຈັນສົມພູ.

      ເມື່ອວັນທີ 16 ຕຸລາ ຜ່ານມາ ທີ່ສະໜາມກິລາເທັນນິດວຽງຈັນ ນະຄອນຫຼວງວຽງຈັນ ໄດ້ມີພິທີມອບເງິນອຸດໜູນການເດີນທາງຂອງຄະນະນັກກິລາເທັນນິດລາວທຸກຄົນ ເພື່ອເປັນກຳລັງໃຈໃນການເຂົ້າຮ່ວມແຂ່ງຂັນລາຍການນີ້ ຊຶ່ງເປັນຄັ້ງປະຫວັດສາດ ທີ່ທັບນັກກິລາເທັນນິດລາວ ໄດ້ເຂົ້າຮ່ວມ ລາຍການ Davis Cup ຈາກທ່ານ ດາວວອນ ພະຈັນທະວົງ ປະທານສະຫະພັນເທັນນິດແຫ່ງຊາດລາວ ມີຄະນະບໍລິຫານງານສະຫະພັນ, ຄູຝຶກ ແລະ ນັກກິລາ ຕະຫຼອດຮອດນັກກິລາເທັນນິດຮຸ່ນອາວຸໂສ ແລະ ສື່ມວນຊົນບາງພາກສ່ວນເຂົ້າຮ່ວມເປັນສັກຂີພິຍານ.

      ໂອກາດນີ້, ທ່ານ ດາວວອນ ພະຈັນທະວົງ ໃຫ້ສຳພາດວ່າ: ລາຍການນີ້ ສະຫະພັນພວກເຮົາເຄີຍສົ່ງນັກກິລາຍິງເຂົ້າຮ່ວມແຂ່ງຂັນມາກ່ອນ ຊຶ່ງນັກກິລາຊາຍ ເນື່ອງຈາກພວກເຮົາເປັນສະມາຊິກຊັ້ນສອງ ຈຶ່ງໄດ້ສິດເຂົ້າຮ່ວມແຂ່ງຂັນ ແລະ ກໍເປັນຄັ້ງທຳອິດທີ່ໄດ້ເຂົ້າຮ່ວມລາຍການນີ້ ໂດຍໄດ້ຮັບທຶນສະໜັບສະໜູນຈາກສະຫະພັນເທັນນິດສາກົນ ຫຼື ໄອທີເອັບ ລາຍການດັ່ງກ່າວ ປີໜຶ່ງຈະມີແຂ່ງຂັນ 3 ຫາ 4 ລາຍການ ແລະ ຕໍ່ໄປພວກເຮົາກໍຈະໄດ້ໄປຮ່ວມ ສິ່ງທີ່ພາກພູມໃຈທີ່ສຸດຄືເຫັນທຸງຊາດລາວ ປິວສະບັດຜ່ານສາຍຕາມວນຊົນໃນເວທີໂລກ ຊຶ່ງເປັນກຽດ ແລະ ຊື່ສຽງຂອງປະເທດຊາດພວກເຮົາ. ແນວໃດກໍຕາມ, ສຳລັບນັກກິລາຊຸດນີ້ ກໍເຫັນວ່າມີຄວາມພ້ອມຫຼາຍດ້ານ ໂດຍມີຄູຝຶກຕ່າງປະເທດມາປະຈຳ ທີ່ເຄີຍນຳທີມເຂົ້າຮ່ວມແຂ່ງຂັນ ງານກິລາ ຊີເກມ ທີ່ ສສ ຫວຽດນາມ ກໍສາມາດຍາດໄດ້ 1 ຫຼຽນທອງ ແລະ ພໍ່ແມ່ຜູ້ປົກຄອງກໍໄດ້ເອົາໃຈໃສ່ປະກອບສ່ວນຢ່າງເຕັມທີ່ ແລະ ພວກເຮົາຊາວລາວທຸກຄົນຂໍເປັນກຳລັງໃຈທີ່ດີໃຫ້ທຸກຄົນນຳເອົາກຽດຊື່ສຽງມາສູ່ປະເທດຊາດດ້ວຍຄວາມພາກພູມໃຈ.

       ສ່ວນ ທ່ານ ວົງສະຫວັດ ຈັນສົມພູ ຫົວໜ້າທີມຊາດລາວຊຸດນີ້ ກໍໄດ້ໃຫ້ຮູ້ວ່າ: ຄະນະນັກກິລາລາວທຸກຄົນ ແມ່ນມີຄວາມພ້ອມເຕັມຮ້ອຍ ທັງພະລະກຳລັງ ແລະ ຈິດໃຈ ພ້ອມສູ້ຊົນສ້າງຜົນງານໃຫ້ດີທີ່ສຸດ ເພື່ອເກັບຄະແນນອັນດັບໂລກທີ່ດີກັບມາ ຂະນະທີ່ ທາງດ້ານ ວິທະຍາ ຣາຊາວະດີ ນັກເທັນນິດ ມື 1 ຂອງລາວ ກໍສະແດງຄວາມດີໃຈ ທີ່ໄດ້ເປັນຕົວແທນຂອງທີມຊາດລາວ ເຂົ້າຮ່ວມລາຍການນີ້ຄັ້ງທຳອິດ ຈະພະຍາຍາມສູ້ສຸດຄວາມສາມາດ ເພື່ອຍາດແຍ່ງຜົນງານໃຫ້ດີທີ່ສຸດ.

       ການແຂ່ງຂັນເທັນນິດ ທີມຊາຍຊິງແຊ໋ມໂລກ ຫຼື ລາຍການ Davis Cup ແມ່ນມີມາແຕ່ປີ 1900 ໂດຍມີການຈັດລະດັບແຂ່ງຂັນໃນແຕ່ລະຂົງເຂດ ຕາມຜົນງານອັນດັບໂລກ ຫຼື Ranking ຂອງແຕ່ລະຊາດ ເພື່ອຄັດເຂົ້າສູ່ຮອບສຸດທ້າຍ ຫລື ລະດັບສູງສຸດ ສຳລັບນັກກິລາເທັນນິດ ທີມຊາດລາວ ໃນຖານະເປັນນ້ອງໃໝ່ ໄດ້ແຂ່ງຂັນໃນຂົງເຂດອາຊີ-ໂອຊີເນຍ ຢູ່ລະດັບກຸ່ມທີ 4 ຂອງຂົງເຂດ ຊຶ່ງມີ 17 ທີມເຂົ້າຮ່ວມ ແບ່ງການແຂ່ງຂັນອອກເປັນ 2 ສ່ວນ ໂດຍທີມຊາດລາວ ຢູ່ສ່ວນທີ 2 ປະກອບມີ 9 ທີມ ຄື: ເຕີກເມນິສຖານ, ຄູເວດ, ກຳປູເຈຍ, ເກາະກວມ, ມົງໂກລີ, ສິງກະໂປ, ບູຖານ ແລະ ບາເຣນ ເຈົ້າພາບ. ສ່ວນຮູບແບບການແຂ່ງຂັນຈະແບ່ງເປັນ 2 ກຸ່ມ ແຂ່ງພົບກັນໝົດໃນກຸ່ມ ແບບດີສຸດ 2 ໃນ 3 ຄູ່ ກໍຄື ດ່ຽວ ມື 1 ມື 2 ແລະ ຄູ່ຊາຍ, ແລ້ວຄັດເລືອກເອົາທີ 1 ຂອງສອງກຸ່ມ ມາພົບກັນໃນຮອບເພອ໋ອບ ເພື່ອເອົາທີມຊະນະ ເລື່ອນຊັ້ນສູ່ກຸ່ມທີ 3 ຂອງຂົງເຂດ ແລະ ຄ່ອຍໄຕ່ເຕົ້າໄປສູ່ລະດັບສູງສຸດ ຫຼື World Group Finals ເພື່ອລຸ້ນຊິງຂັນແຊ໋ມ, ສ່ວນທີມທີ່ບໍ່ຕິດອັນດັບ 1 ຂອງກຸ່ມໃນຂົງເຂດອາຊີ-ໂອຊີເນຍ ໄປແຂ່ງຂັນຈັດອັນດັບ ເກັບຄະແນນອັນດັບໂລກ ໂດຍຈະແຂ່ງຂັນໃນລະຫວ່າງວັນທີ 17-22 ຕຸລາ 2022 ລາຍການດັ່ງກ່າວຖືວ່າເປັນໂອກາດທີ່ດີຂອງວົງການເທັນນິດລາວ ກໍຄື ນັກກິລາເທັນນິດລາວ ຈະໄດ້ຖອດຖອນບົດຮຽນ ແລະ ແລກປ່ຽນປະສົບການອັນໃໝ່ໆ ເພື່ອຍົກລະດັບສີມື, ທັກສະຄວາມສາມາດ ໄປເທື່ອລະກ້າວ.

ໂດຍ ສົງການ ພັນແພງດີ