ລາຍລະອຽດຂ່າວ
ກອງປະຊຸມຫົວໜ້າຄະນະກິລາຊີເກມ ໄດ້ສະເໜີໃຫ້ ສປປ ລາວ ເປັນເຈົ້າພາບ ຊີເກມ ຄັ້ງທີ 35 ໃນປີ 2029
ຂຽນເມື່ອ: 12/04/2022 11:04 | ໂດຍ: revive | ອ່ານ: 161 ຄັ້ງ

      ໃນກອງປະຊຸມຫົວໜ້າຄະນະກິລາຊີເກມ ໄດ້ສະເໜີ ໃຫ້ ສປປ ລາວ ເປັນເຈົ້າພາບ ຈັດງານມະຫະກຳກິລາຊີເກມ ຄັ້ງທີ 35 ເຊິ່ງຈະຈັດໃນປີ 2029, ຖັດຈາກ ປະເທດອິນໂດເນເຊຍ ເປັນເຈົ້າພາບ ຈັດແຂ່ງຂັນຄັ້ງທີ 34 ໃນປີ 2027 ສຳເລັດ. ກອງປະຊຸມຫົວໜ້າຄະນະກິລາຊີເກມ ຄັ້ງທີ 32 ຈັດຂຶ້ນ ເມື່ອວັນທີ 8-9 ເມສາ ຜ່ານມາ ທີ່ຣາຊະອານາຈັກ ກຳປູເຈຍ ເພື່ອກຽມຮັບກຽດເປັນເຈົ້າຈັດງານມະຫະກຳກິລາຊີເກມ ຄັ້ງທີ 32 ໃນປີ 2023 ພາຍໃຕ້ການເປັນປະທານຂອງທ່ານ ທອງຄູນ ຮອງລັດຖະມົນຕີກະຊວງວັດທະນະທຳ ແລະ ການທ່ອງທ່ຽວ ຣາຊະອານາຈັກກຳປູເຈຍ, ໃນນັ້ນ ມີບັນດາຕາງໜ້າຄະນະນຳຈາກ 11 ຊາດ ໃນອາຊຽນເຂົ້າຮ່ວມ ສະເພາະຄະນະມົນຕີຊີເກມສປປ ລາວ ນຳໂດຍທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ, ທ່ານ ປອ. ສອນເພັດ ຈັນດານຸວົງ ຫົວໜ້າພາກວິຊາ ກິລາ-ກາຍະກຳ ສະຖາບັນກິລາ-ກາຍະກຳ ແລະ ທ່ານ ປອ. ຈັນທະວົງ ປັນຍາສີລິ ຫົວໜ້າພະແນກຈັດການແຂ່ງຂັນກິລາ.

       ທ່ານ ປອ. ຈັນທະວົງ ປັນຍາສີລິ ໄດ້ໃຫ້ຮູ້ວ່າ ຄະນະຮັບຜິດຊອບຈັດງານຊີເກມ ຄັ້ງທີ 32 ທີ່ປະເທດກຳປູເຈຍ ໄດ້ລາຍງານ 3 ວຽກຫຼັກໆ ກໍຄື ລາຍການແຂ່ງຂັນຕ່າງໆ ຈັດເປັນ 3 ໝວດ ປະກອບມີ ໝວດກິລາພາກບັງຄັບ, ໝວດກິລາທົ່ວປະເທດ ແລະ ໝວດກິລາທີ່ເຈົ້າພາບສະເໜີເຂົ້າຮ່ວມແຂ່ງຂັນເພື່ອຫາສຽງສະໜັບສະໜູນຈາກບັນດາປະເທດສະມາຊິກ, ນອກນັ້ນ ທາງເຈົ້າພາບ ໂດຍສະເພາະຄະນະກຳມະການກ່ຽວກັບການຖ່າຍທອດສົດ ກໍໄດ້ເຮັດເວີກຊ໋ອບ ເພື່ອອະທິບາຍໃຫ້ຊາດສະມາຊິກຮັບຮູ້ ການຫ້າງຫາກະກຽມການໃນການຖ່າຍທອດສົດ ແລະ ລິກຄະສິດຕ່າງໆ ລວມເຖິງການເຮັດແອັບຟິເຄເຊິນ ເພື່ອໃຫ້ບັນດາຊາດສະມາຊິກໃນອາຊຽນ ສາມາດຕິດຕາມຂໍ້ມູນຂ່າວສານການແຂ່ງຂັນກິລາຊີເກມ ຜ່ານມືຖືໄດ້ຢ່າງສະດວກສະບາຍ. ພ້ອມກັນນັ້ນ, ທາງກຳມະການສານຕ້ອງຫ້າມ ກໍໄດ້ມາອະທິບາຍ ແລະ ກ່ຽວກັບການກິລາ. ຜ່ານການດຳເນີນກອງປະຊຸມສອງວັນທາງເຈົ້າພາບກໍໄດ້ມີການສະເໜີແຜນການຈະຈັດແຂ່ງຂັນ ພ້ອມທັງປະກອບຄຳຄິດຄຳເຫັນແລກປ່ຽນບົດຮຽນໃຫ້ເຊິ່ງກັນ ແລະ ກັນ ໂດຍສະເພາະ ມາເລເຊຍ ແລະ ອິນໂດເນເຊຍ ກໍໄດ້ສະເໜີເອົາກິລາປັນຈັກສີລັດບັນຈຸເຂົ້າແຂ່ງຂັນ ແລະ ທາງສປປ ລາວ ກໍໄດ້ສະໜັບສະໜູນທຸກປະເພດກິລາທີ່ທາງເຈົ້າພາບ ໄດ້ຫ້າງຫາກະກຽມໄວ້ ພິເສດ ກໍໄດ້ສະເໜີໃຫ້ບັນຈຸກິລາວູຊູ ເຂົ້າແຂ່ງຂັນເຊັ່ນກັນ ສ່ວນທາງເຈົ້າພາບກໍໄດ້ສະເໜີຈະຈັດການແຂ່ງຂັນຢູ່ 4 ຈຸດໃຫຍ່ໆ ໃນຣາຊະອານາຈັກ ກຳປູເຈຍ.

      ມາຮອດປັດຈຸບັນ ເຈົ້າພາບ ປະເທດກຳປູເຈຍ ໄດ້ມີຄວາມຄືບໜ້າ ແລະ ມີຄວາມພ້ອມຫຼາຍດ້ານໃນການຈັດງານ ໂດຍສະເພາະທາງດ້ານການປ້ອງກັນໂຄວິດ-19 ປະເທດເຈົ້າພາບ ໄດ້ມີການລະດົມປະຊາຊົນໃຫ້ມີການສັກວັກຊີນເປັນທີ່ຮຽບຮ້ອຍ ແລະ ມີແນວໂນມດີຂຶ້ນເລື້ອຍໆ ແລະ ບັນຫາສຸດທ້າຍ ທາງຄະນະກຳມະການຕ່າງໆ ກໍໄດ້ລາຍງານໃຫ້ປະທານຮັບຊາບ ບັນດາປະເທດທີ່ເຂົ້າຮ່ວມແຂ່ງຂັນ ພ້ອມທັງໄດ້ຄົ້ນຄວ້າຈັດການແຂ່ງຂັນຄັ້ງຕໍ່ໄປ ແນ່ນອນໃນປີໜ້າແມ່ນ ກຳປູເຈຍ ຄັ້ງທີ 32 ສ່ວນ ຄັ້ງຕໍ່ໄປ ປີ 2025 ແມ່ນໄທ ເປັນເຈົ້າພາບ ແລະ ຄັ້ງທີ 34 ປີ 2027 ແລະ ຄັ້ງທີ 35 ປີ 2029 ທາງກອງປະຊຸມກໍໄດ້ສະເໜີໃຫ້ ປະເທດອິນໂດເນເຊຍ ແລະ ສປປ ລາວ ຮັບກຽດເປັນເຈົ້າພາບ ແຕ່ໃນທັງນັ້ນ ທັງນີ້ ທາງອິນໂດ ແລະ ລາວ ກໍຂໍເອົາຄຳສະເໜີຕ່າງໆ ກັບໄປສະເໜີຕໍ່ລັດຖະບານ ແລະ ຈະໄດ້ຕອບໃນກອງປະຊຸມຄະນະມົນຕີຊີເກມໃນຄັ້ງຕໍ່ໄປ ຊຶ່ງຈະຈັດຂຶ້ນໃນກາງເດືອນມິຖຸນາ ປີນີ້. ໂດຍ ສົງການ ພັນແພງດີ
                                                                                                                                                   ໂດຍ ສົງການ ພັນແພງດີ

                                                                                                                                                    ຂໍ້ມູນ ມົນຕີຊີເກມ ລາວ