ລາຍລະອຽດຂ່າວ
ພຸດທະໄຊ ຕ້ອງການຢາກຫຼິ້ນເກມບຸກ ໃນ Suzuki cup ຫວັງສ້າງຄວາມສຸກໃຫ້ແຟນບານ
ຂຽນເມື່ອ: 30/11/2021 22:11 | ໂດຍ: ເພຣເມັກເກີ | ອ່ານ: 534 ຄັ້ງ

      ໃນຕອນແລງຂອງວັນທີ 30 ພະຈິກ 2021, ພຸດທະໄຊ ໂຄຈະເລີນ ເຈົ້າຂອງສາຍາ ນາກະຕະ ເມືອງລາວ ໄດ້ໃຫ້ສຳພາດກັບສື່ມວນຊົນສາຍກິລາ ຜ່ານທາງອອນລາຍ. ໂດຍ ພຸດທະໄຊ ກອງກາງໂຕບຸກຈາກ ສະໂມສອນ ສະມຸດປາການ ທີມຈາກໄທລີກ ປະເທດໄທໄດ້ກ່າວວ່າປະຈຸບັນສະພາບຮ່າງກາຍ ແມ່ນປາສະຖາອາການບາດເຈັບ ແລະ ພ້ອມ 100​ % ທີ່ຈະຮັບໃຊ້ທີມຊາດ.

      ສ່ວນຜົນງານຂອງຕົນເອງໃນລີກກໍ່ຖືວ່າເຮັດໄດ້ຂ້ອນຂ້າງດີ ແລະ ສະພາບຮ່າງກາຍແມ່ນພ້ອມເຕັມທີ່ເວົ້າໄດ້ວ່າ 100​ %.

     ເມື່ອຖືກຖາມວ່າໃນລາຍຊື່ 30​ ນັກເຕະທີ່ຕິດທີມຊາດຊຸດນີ້ ພຸດທະໄຊ ຄິດວ່າໜ້າເສຍດາຍນັກເຕະຄົນໃດບໍ່ທີ່ບໍ່ຕິດທີມຊາດຊຸດນີ້, ພຸດທະໄຊ ໃຫ້ທັດສະນະວ່າ ໜ້າເສຍດາຫຼາຍທີ່ ສຸກທະວີ ສູນດາລາ ຜູ້ຮັກສາປະສົບການສູງແລະ ຝີມືດີບໍ່ໄດ້ຕິດທີມໃນຊຸດນີ້ເພາະສ່ວນຕົວເຊື່ອໝັ້ນວ່າປະສົບການຂອງລາວສາມາດຊ່ວຍທີມໃນເກມລະດັບນີ້ໄດ້, ແຕ່ກໍ່ເຄົາລົບການຕັດສິນໃຈຂອງທີມງານຄູຝືກ ທີ່ເລືອກນັກກິລາຕາມແຜນການຫຼິ້ນທີ່ວາງໄວ້.

      ເມື່ອຖືກຖາມວ່າ ຄິດແນວໃດການປະກົດການທີ່ທີມຊາດລາວມີການເສີມທີມນັກກິລາທີ່ເປັນເຊື້ອສາຍລາວ ແລະ ເຄີຍເຕະບານຢູ່ລີກຕ່າງຊາດ, ພຸດທະໄຊ ກ່າວວ່າເປັນປະກົດການໃໝ່ທີ່ຖືໄດ້ວ່າເປັນທິດທາງການພັດທະນາທີ່ດີເຊິ່ງພວກເຂົາເລົ່ານັ້ນຈະສາມາດເສີມຄວາມແຂງແກ່ນໃຫ້ທີມຊາດລາວໄດ້ຫຼາຍ, ສ່ວນຕົວແມ່ນຮູ້ສຶກຕື່ນເຕັ້ນທີ່ຈະໄດ້ລົງຫຼິ້ນຮ່ວມກັບນັກເຕະທີ່ມີປະສົບການສູງລະດັບລີກຂອງປະເທດຝລັ່ງ ຄືກັນກັບ ບິນລີ້, ແລະ ບິນລີ້ ເອງ ກໍ່ກາຍເປັນແຮງກະຕຸ້ນໃຫ້ເພື່ອນຮ່ວມທີມໄປແລ້ວ ທັງຈະເປັນຄວາມຫວັງຂອງທີມຊາດລາວ ແລະເຂົ້າມາແກ້ໄຂຈູດບອດຂອງທີມຊາດລາວທີ່ເຄີຍມີປັນຫາໃນການຈົບສະກໍໄດ້.

     ທີມງານ Laosportnews ໄດ້ຖາມວ່າໃນຄວາມຄິດສ່ວນຕົວຂອງ ພຸດທະໄຊ ຄິດວ່າເກມການແຂ່ງຂັນຂອງທີມຊາດລາວເຮົາໃນລາຍການ Suzuki Cup ຄວນຈະຫຼິ້ນເກມແບບໃດ. ພຸດທະໄຊ ຕອບວ່າໃຈແທ້ໆ ແມ່ນຢາກເປີດເກມບຸກໃສ່ເລີຍໃນທຸກນັດ ລະບົບທີ່ຢາກຫຼິ້ນແມ່ນ 4-3-3 ໄປເລີຍເພາະການຕັ້ງຮັບຫຼາຍເກີນໄປ ໂອກາດທີ່ຈະຍິງປະຕູຂອງຄູ່ຕໍ່ສູ້ກະໜ້ອຍ, ອີກຢ່າງໜຶ່ງຕາມລາຍຊື່ທີ່ຕິດ 30 ​ຄົນຊຸດນີ້ຖືກວ່າ ທຸກຄົນມີສັກກະຍະພາບສາມາດສູ້ໄດ້ກັບທຸກທີມ. ແຕ່ໃນເກມຕົວຈິງກະຕ້ອງໄດ້ເບິ່ງວ່າຄູຝຶກເພິ່ນຈະວາງເກມແນວໃດ.

      ສຳລັບອານາຄົດການຄ້າແຂ່ງຂອງ ພຸດທະໄຊ, ຄິດວ່າຖ້າຫາກໝົດສັນຍາກັບຕົ້ນສັງກັດໃນປະຈຸບັນກະມີຄວາມຫວັງຢາກໄປຄ້າແຂ່ງຢູ່ຕ່າງປະເທດ ໂດຍສະເພາະແມ່ນ ລີກຂອງປະເທດຈີນ ເພາະໂດຍສ່ວນຕົວແລ້ວກໍ່ສາມາດເວົ້າພາສາຈີນໄດ້ແດ່.

    ສຸດທ້າຍ ພຸດທະໄຊ ໄດ້ຝາກເຖິງແຟນບານຂໍໃຫ້ຊ່ວຍສົ່ງກຳລັງໃຈ ແລະ ເຊຍທີມຊາດລາວດ້ວຍ, ໂດຍສ່ວນຕົວແມ່ນຈະເຮັດເຕັມທີ່.

    ສຳລັບ ພຸດທະໄຊ ແລະ ນັກເຕະລາວທີ່ຄ້າແຂ່ງໃນໄທລີກຈະອອກເດີນທາງໃນວັນທີ 1​ທັນວາ ບິນໄປເຖິງສິງກະໂປໃນຕອນຄ່ຳເວລາ 9 ໂມງ ແລະ ຈະລົງຊ້ອມກັບທີມໃນວັນທັດໄປ.

ຂ່າວໂດຍ: ນັກຂ່າວເງົາ

ພາບຈາກ: ສຕລ