ລາຍລະອຽດຂ່າວ
ບິນລີ້ ເກດແກ້ວພົມພອນ ພ້ອມເຕັມທີ່ໃນການເດີນທາງມາຮັບໃຊ້ ທີມຊາດ ລາວ
ຂຽນເມື່ອ: 28/11/2021 22:11 | ໂດຍ: ເພຣເມັກເກີ | ອ່ານ: 1514 ຄັ້ງ

      ໃນຕອນຄ່ຳເວລາ 21:00​ ຂອງວັນທີ 28 ພະຈິກ 2021, ບິນລີ້ ເກດແກ້ວພົມພອນ ໄດ້ເປີດໂອກາດໃຫ້ນັກຂ່າວສາຍກິລາຮ່ວມກັນສຳພາດເຖິງຄວາມພ້ອມໃນການເດີນທາງເຂົ້າຮ່ວມແຂ່ງຂັນລາຍການບານເຕະ Suzuki Cup ທີ່ຈະເລີ່ມແຂ່ງຂັນໃນຕົ້ນເດືອນ ທັນວາ 2021 ນີ້ ຜ່ານທາງອອນລາຍ. ສຳລັບໂຕ ບິນລີ້ ເອງຕອນນີ້ແມ່ນມີຄວາມພ້ອມຢ່າງເຕັມທີ່, ຫຼັງຈາກທີ່ໄດ້ຮັບຂ່າວວ່າຕົນເອງຈະໄດ້ຮັບໃຊ້ ທີມຊາດລາວ ເຂົາກໍ່ມີຄວາມດີໃຈເຕັມທີ່ ຫຼັງຈາກທີ່ເມື່ອ 4-5 ປີກ່ອນແມ່ນເຄີຍໝົດຄວາມຫວັງທີ່ຈະໄດ້ ລົງສະໜາມໃນນາມທີມຊາດລາວ ແລະ ມື້ທີ່ເຂົາໄດ້ຮັບ ໜັງສືເດີນທາງ(Passport) ຢູ່ທີ່ສະຖານທູດລາວປະຈຳ ປະເທດຝລັ່ງ ຈະເປັນມື້ທີ່ລາວບໍ່ມີວັນລືມໃນຊີວິດ.

    ການເດີນທາງມາຮ່ວມແຂ່ງຂັນໃນຄັ້ງນີ້ນອກຈາກເຂົາຈະເປັນຕົວແທນໃຫ້ທີມຊາດລາວແລ້ວ ເຂົາເອງກໍ່ຍັງຂໍເປັນຕົວແທນໃຫ້ຄົນເຊື້ອຊາດລາວທີ່ຢູ່ຕ່າງປະເທດ ໃນການປະກອບສ່ວນຊ່ວຍປະເທດລາວຂອງພວກເຮົາ. ບິນລີ ມີຄວາມເຊື່ອໝັ້ນສູງວ່າ ດ້ວຍປະສົບການ ແລະຄວາມສາມາດຂອງເຂົາ ບວກກັບພະລັງຂອງນັກເຕະໜຸ່ມພາຍໃນທີມທີ່ມີຄວາມກະຫາຍໃນໄຊຊະນະຈະສາມາດຊ່ວຍໃຫ້ທີມປະສົບຜົນສຳເລັດໄດ້.

     ບິນລີ້ ຍັງໄດ້ເປີດເຜີຍອີກວ່າ ທີ່ມາຂອງເສື້ອໝາຍເລກ 21 ແມ່ນໄດ້ມາຈາກເລກວັນເກີດຂອງລູກຊາຍຂອງເຂົາ. ແລະ ກໍ່ຈະເປັນການດີ ຖ້າເຂົາຈະສາມາດສ້າງຕຳນານໃຫ້ກັບເສືອໝາຍເລກ 21​ໄດ້.

ສຸດທ້າຍ ບິນລີ້ ຝາກເຖິງແຟນບານ ຂໍໃຫ້ຊ່ວຍສົ່ງແຮງໃຈ ແລະເປັນກຳລັງໃຈໃຫ້ກັບນັກກິລາ ຊຸດ Suzuki cup ທຸກຄົນໃຫ້ສາມາດປສົບຜົນສຳເລັດໃນການລົງແຂ່ງຂັນໃນຄັ້ງນີ້.

 

ຂ່າວໂດຍ: ນັກຂ່າວເງົາ