ລາຍລະອຽດຂ່າວ
ດອກປີກໄກ່ ບຶງຂະຫຍອງ ຄຳເສັງ ຈະຈັດແຂ່ງຂັນ 3 ລາຍການໃຫຍ່ ໄວໆນີ້
ຂຽນເມື່ອ: 20/04/2021 11:04 | ໂດຍ: ເພຣເມັກເກີ | ອ່ານ: 401 ຄັ້ງ

      ສະໂມສອນ ດອກປີກໄກ່ ບຶງຂະຫຍອງ ຄຳເສັງ ມີແຜນຈະເປີດການແຂ່ງຂັນກິລາດອກປີກໄກ່ ໃນຮຸ່ນເຍົາວະຊົນ-ໄວໜຸ່ມ ແລະ ອາວຸໂສ 3 ລາຍການໃຫຍ່ ກໍຄື ລາຍການ ຊີງຂັນສະຫາຍ ເລຂາຄະນະພັກນະຄອນຫຼວງວຽງຈັນ, ຊີງຂັນທ່ານເຈົ້າຄອງນະຄອນຫຼວງວຽງຈັນ ແລະ ຊີງຂັນຮອງເຈົ້າຄອງນະຄອນຫຼວງວຽງຈັນ ທັງເປັນປະທານສະມາຄົມກິລາ-ກາຍະກຳນະຄອນຫຼວງວຽງຈັນ ເພື່ອເປັນການສົ່ງເສີມວົງການກິລາດອກປີກໄກ່ລາວ ກໍຄື ນະຄອນຫຼວງ ໃຫ້ນັບມື້ເຕີບໃຫຍ່ຂະຫຍາຍຕົວຂຶ້ນເລື້ອຍໆ ພ້ອມທັງສ້າງໂອກາດໃຫ້ນັກກິລາຮຸ່ນສືບທອດກ້າວສູ່ທີມຊາດ ໃນອະນາຄົດ ຄາດວ່າ 3 ລາຍການດັ່ງກ່າວ ຈະຈັດຂຶ້ນພາຍໃນປີ 2021 ຫຼື ລາຍການໃດໜຶ່ງໃນໄວໆນີ້.

      ຕາມການໃຫ້ສຳພາດຂອງທ່ານ ຄຳເສັງ ສູນດາລາ ປະທານບໍລິສັດ ຄຳເສັງ ຈຳກັດ ທັງເປັນປະທານສະໂມສອນ ດອກປີກໄກ່ ບຶງຂະຫຍອງ ຄຳເສັງ ເມື່ອບໍ່ດົນມານີ້ ໃຫ້ຮູ້ວ່າ: ແຕ່ກ່ອນ ສະໂມສອນແຫ່ງນີ້ ເປັນສະໂມສອນກິລາອາເນກປະສົງ ສະຖານທີ່ແຫ່ງນີ້ຫຼັກໆ ແມ່ນຈັດແຂ່ງຂັນກິລາມວຍລາວ ຊຶ່ງມີການເຕົ້າໂຮມມວນຊົນກັນຫຼາຍ ສະນັ້ນ ເພື່ອເປັນການປະຕິບັດຕາມຄຳສັ່ງ ແລະ ແຈ້ງການໂຈະຊົວຄາວ ຈຶ່ງຫັນປ່ຽນມາເປັນສະໜາມກິລາດອກປີກໄກ່ເພື່ອໃຫ້ບໍລິການແກ່ພໍ່ແມ່ປະຊາຊົນຊາວນະຄອນຫຼວງ ຜູ້ມັກຮັກໃນການຫຼິ້ນກິລາແທນ ຊຶງການເປີດບໍລິການແມ່ນເລີ່ມຕັ້ງແຕ່ 10 ໂມງເຊົ້າ ຫາ 10 ໂມງກາງຄືຶນ, ໃນນັ້ນ ກໍໄດ້ມີການປະຕິບັດຕາມາດຕະການຂອງຂັ້ນເທິງວາງອອກ ກໍຄື ມີເຈວລ້າງມື, ມີເຄື່ອງສະແກນອຸນນະພູມ ແລະ ອື່ນໆອີກ. ເຖິງຢ່າງໃດກໍດີ, ພາຍຫຼັງທີ່ໄດ້ເປີດບໍລິການແກ່ສັງຄົມໄດ້ຫຼາຍອາທິດຜ່ານມາ ກໍເຫັນວ່າມີມວນຊົນທີ່ີມັກຮັກໃນການຫຼິ້ນກິລາດອກປີກໄກ່ ພາກັນມາອອກກຳລັງກາຍຢູ່ທີ່ສະໂມສອນຂອງພວກເຮົາຢ່າງເປັນປົກກະຕິ ແລະ ເປັນຂະບວນການຄືກຄື້ນ ສະນັ້ນ ໃນຕໍ່ໜ້າ ກໍມີແຜນຈະຜັນຂະຫຍາຍໃນໜ້າວຽກຕ່າງໆ ເປັນຕົ້ນແມ່ນການສ້າງແຄັມຝຶກສອນນັກກິລາໃນຮຸ່ນສືບທອດ ຕື່ມອີກ ແລະ ໃນມໍ່ໆນີ້ ກໍມີແຜນຈະຈັດການແຂ່ງຂັນກິລາດອກປີກໄກ່ ໃນຮຸ່ນເຍົາວະຊົນ-ຊາວໜຸ່ມ ແລະ ອາວຸໂສ 3 ລາຍການໃຫຍ່ ກໍຄື ລາຍການ ຊີງຂັນສະຫາຍ ເລຂາຄະນະພັກນະຄອນຫຼວງວຽງຈັນ, ຊີງຂັນທ່ານເຈົ້າຄອງນະຄອນຫຼວງວຽງຈັນ ແລະ ຊີງຂັນຮອງເຈົ້າຄອງນະຄອນຫຼວງວຽງຈັນ ທັງເປັນປະທານສະມາຄົມກິລາ-ກາຍະກຳນະຄອນຫຼວງວຽງຈັນ ເພື່ອເປັນການສົ່ງເສີມວົງການກິລາດອກປີກໄກ່ລາວ ກໍຄື ນະຄອນຫຼວງ ໃຫ້ນັບມື້ເຕີບໃຫຍ່ຂະຫຍາຍຕົວຂຶ້ນເລື້ອຍໆ ພ້ອມທັງສ້າງໂອກາດໃຫ້ນັກກິລາຮຸ່ນສືບທອດກ້າວສູ່ທີມຊາດໃນອະນາຄົດ ອີກກດ້ວຍ ເວົ້າສະເພາະແລ້ວ ກໍຍັງເປັນການກະກຽມຄວາມພ້ອມໃຫ້ແກ່ຄູຝຶກ, ກຳມະການຕັດສິນ ແລະ ນັກກິລາຜູ້ທີ່ຕາງໜ້າໃຫ້ທັບນັກກິລານະຄອນຫຼວງ ເຂົ້າຮ່ວມ ງານມະຫະກຳກິລາແຫ່ງຊາດ ຈະຈັດຂຶ້ນໃນມໍ່ໆນີ້ ທີ່ແຂວງຊຽງຂວາງ ຮັບກຽດເປັນເຈົ້າພາບ ອີກດ້ວຍ.

      ທ່ານ ຄຳເສັງ ສູນດາລາ ບອກຕື່ມອີກວ່າ: ສຳລັບສະໂມສອນດອກປີກໄກ່ ບຶງຂະຫຍອງ ຄຳເສັງ ທີ່ຖືກປັບປຸງຂຶ້ນມາໃໝ່ແຫ່ງນີ້ ມີທັງໝົດ 4 ຂອດ ແລະ ທັງ 4 ຂອດ ແມ່ນປູດ້ວຍຢາງທີ່ໄດ້ມາດຕະຖານລະດັບເກດ A ຊຶ່ງສັ່ງໂດຍກົງມາຈາກໂຮງງານ ສປ ຈີນ ສະເພາະ ຫຼາຍຄົນທີ່ມາໃຊ້ບໍລິການໄດ້ອອກສຽງດຽວວ່າຄັກພື້ນຢາງໜຸ້ມບໍ່ມີຜົນກະທົບຕໍ່ການອອກກຳລັງກາາຍ ສຳລັບເດີ່ນເປີດໃຫ້ບໍລິການຊົວໂມງລະ 50.000 ກີບຕໍ່ໜຶ່ງເດີ່ນ ພິເສດທີ່ສຸດ ນັບແຕ່ມື້ນີ້ ເປັນຕົ້ນໄປ ຈົນສິ້ນເດືອນເມສາ ແມ່ນມີໂປໂມຣຊັ່ນ ຊົວໂມງລະ 40.000 ກີບ ຕໍ່ໜຶ່ງເດີ່ນ ແຖມສະປອນເຊີອີກ 1 ຂວດ ຖ້າຫາກວ່າບັນດາພາກສ່ວນ ໂດຍສະເພາະແມ່ນທີ່ຂຶ້ນກັບອົງການຈັດຕັ້ງລັດ ແມ່ນຈະຫຼຸດລາຄາພິເສດໃຫ້. ແນວໃດກໍດີ, ໃນໄລຍະນີ້ ມີກະແສພະຍາຍາດໂຄວິດ ກັບມາແຜ່ລະບາດອີກຄັ້ງ ຫຼັງຈາກກະແສຜ່ອນລົງ ກໍຄາດວ່າຈະສືບຕໍ່ຈັດການແຂ່ງຂັນ 3 ລາຍການດັ່ງກ່າວ ໃຫ້ເກີດຜົນເປັນຈິງ.      

ໂດຍ: ປາກກາຄຳ