ລາຍລະອຽດຂ່າວ
ເຈົ້າຖິ່ນ ຄອງແຊ໋ມເຕະບານ 4 ສາມັກຄີ ຊີງຂັນເຈົ້າເມືອງໄຊທານີ ຕ້ອນຮັບ-ຊົມເຊີຍ ບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ 9
ຂຽນເມື່ອ: 22/02/2021 13:02 | ໂດຍ: revive | ອ່ານ: 42 ຄັ້ງ

          ທີມອົງຄະນະພັກເມືອງໄຊທານີ ໄລ່ເອົາຊະນະ ທີມຝ່າຍການຂາຍ ແລະ ການຕະຫຼາດ ບໍລິສັດ ເບຍລາວ ຈຳກັດ ໄປແບບສຸດມ່ວນ 3-1 ປະຕູ ໃນນັດຊີງຊະນະເລີດ ຄວ້າແຊ໋ມການແຂ່ງຂັນເຕະບານເດີ່ນນ້ອຍ 7 ຮັບ 1 ລາຍການ 4 ສາມັກຄີ ຊີງຂັນທ່ານເຈົ້າເມືອງໄຊທານີ ໄປຄອງ ເພື່ອເພື່ອສ້າງຂະບວນການຕ້ອນຮັບ-ຊົມເຊີຍ​ ບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ 9​ ແລະ​ ສະພາປະຊາຊົນແຂວງ​ ຊຸດທີ​ 2 ເຂດເລືອກຕັ້ງທີ 1 ນະຄອນຫຼວງວຽງຈັນ ພ້ອມທັງເປັນການເປີດສາຍພົວພັນ ມິດຕະພາບທີ່ດີງາມ ລະຫວ່າງ 4 ພາກສ່ວນໃຫ້ມີຄວາມແໜ້ນແຟ້ນ ແລະ ຄວາມສາມັກຄີຮັກແພງໃຫ້ນັບມື້ເຕີບໃຫຍ່ຂະຫຍາຍຕົວຂຶ້ນເລື້ອຍໆ. 

      ການແຂ່ງຂັນເຕະບານ 4 ສາມັກຄີຮັກແພງ ລະຫວ່າງ ທີມອົງຄະນະພັກເມືອງໄຊທານີ, ທີມຝ່າຍການຂາຍ ແລະ ການຕະຫຼາດ ບໍລິສັດ ເບຍລາວ ຈຳກັດ, ທີມກຸ່ມສື່ມວນຊົນສາຍກິລາລາວ ຫຼື ລາວສະປອດມິເດຍ ແລະ ສະມາຄົມນັກທຸລະກິດຮ້ານອາຫານລາວ ໃນຄັ້ງນີ້ ໄດ້ມີຂຶ້ນ ເມື່ອວັນທີ 19 ກຸມພາ ຜ່ານມາ ທີ່ສະໜາມກິລາເຕະບານຫຍ້າທຽມ ດອນໜູນ ເມືອງໄຊທານີ ນະຄອນຫຼວງວຽງຈັນ ໃຫ້ກຽດເຂົ້າຮ່ວມມີທ່ານ ຄຳປະດິດ ເຂັມມານິດ ເຈົ້າເມືອງໄຊທານີ, ທ່ານ ເຮັນຣິກ ໂຈແອນເດີຊັນ ຜູ້ອຳນວຍການບໍລິສັດ ເບຍລາວ ຈຳກັດ ແລະ ທ່ານ ຄຳແພງ ເພົ້າບົວວົງ ປະທານສະມາຄົມນັກທຸລະກິດຮ້ານອາຫານລາວ ທັງເປັນເຈົ້າຂອງຮ້ານອາຫານ ຊີ້ນດາດລັດສະໝີ ຈານໃຫຍ່ ພ້ອມດ້ວຍຄະນະ ແລະ ບັນດາຄະນະນຳແຕ່ລະພາກສ່ວນ ຕະຫຼອດຮອດບັນດາສື່ມວນຊົນສາຍກິລາທຸກຂະແໜງການເຂົ້າຮ່ວມຢ່າງເປັນຂະບວນການຟົດຟື້ນ.

      ໂອກາດນີ້, ທ່ານ ຄຳແພງ ເພົ້າບົວວົງ ກ່າວວ່າ: ສຳລັບກິດຈະກຳໃນຄັ້ງນີ້ ແມ່ນນອນໃນແຜນການເຄື່ອນໄຫວປີ 2021 ຂອງສະມາຄົມນັກທຸລະກິດຮ້ານອາຫານລາວ ຫຼື ຊື່ເດີມແມ່ນກຸ່ມຮ້ານອາຫານ+ເບຍລາວ ເພື່ອແນໃສ່ເປັນການເປີດສາຍພົວພັນ ມິດຕະພາບທີ່ດີງາມ ລະຫວ່າງ 4 ພາກສ່ວນໃຫ້ມີຄວາມແໜ້ນແຟ້ນ ແລະ ຄວາມສາມັກຄີຮັກແພງໃຫ້ນັບມື້ເຕີບໃຫຍ່ຂະຫຍາຍຕົວຂຶ້ນເລື້ອຍໆ ພໍດີແທດເໝາະກັບການສ້າງຂະບວນການຕ້ອນຮັບ-ຊົມເຊີຍ​ ບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ 9​ ແລະ​ ສະພາປະຊາຊົນແຂວງ​ ຊຸດທີ​ 2 ເຂດເລືອກຕັ້ງທີ 1 ນະຄອນຫຼວງວຽງຈັນ ໃຫ້ເປັນຂະບວນການຟົດຟື້ນ. ເຖິງຢ່າງໃດກໍຕາມ, ຕະຫຼອດໄລຍະທີ່ຜ່ານມາ ພວກເຮົາຄະນະບໍລິຫານງານສະມາຄົມນັກທຸລະກິດຮ້ານອາຫານລາວ ແມ່ນມີຄວາມພາກພູມໃຈທີ່ສຸດ ນອກຈາກໄດ້ມີໂອກາດເຕົ້າໂຮມຄວາມສາມັກຄີ ແລະ ແລກປ່ຽນບົດຮຽນໃນການເຮັດທຸລະກິດຮ້ານດ້ວຍກັນ ກໍຍັງມີສ່ວນຮ່ວມຄຽງບ່າຄຽງໄຫຼ່ໃນການປະກອບສ່ວນຊ່ວຍເຫຼືອສັງຄົມລາວ ຕະຫຼອດມາ ໂດຍສະເພາະຫຼ້າສຸດ ກໍໄດ້ຊ່ວຍເຫຼືອພໍ່ແມ່ປະຊາຊົນເຂດເມືອງສອງຄອນ ແຂວງສະຫວັນນະເຂດ ທີ່ໄດ້ປະສົບໄພນໍ້າຖ້ວມເມື່ອປີ 2020 ຜ່ານມາ ແລະ ປີນີ້ ກໍຍັງມີແຜນຈະສືບຕໍ່ລະດົມທຶນ ແລະ ວັດຖຸປັດໄຈ ຕະຫຼອດຮອດເຄື່ອງຕ່າງໆ ໄປຊ່ວຍເຫຼືອພໍ່ແມ່ປະຊາຊົນເຂດພາກເໜືອອີກດ້ວຍ ແລະ ຄາດວ່າໃນທ້າຍເດືອນມີນານີ້ ຈະຂຶ້ນໄປແຂວງອຸດົມໄຊ.

      ການແຂ່ງຂັນເຕະບານ 4 ສາມັກຄີຮັກແພງ ລະຫວ່າງ ທີມອົງຄະນະພັກເມືອງໄຊທານີ, ທີມຝ່າຍການຂາຍ ແລະ ການຕະຫຼາດ ບໍລິສັດ ເບຍລາວ ຈຳກັດ, ທີມກຸ່ມສື່ມວນຊົນສາຍກິລາລາວ ຫຼື ລາວສະປອດມິເດຍ ແລະ ສະມາຄົມນັກທຸລະກິດຮ້ານອາຫານລາວ ແມ່ນໄດ້ມີການຈັບສະຫຼາກປະກົບຄູ່ແຂ່ງຂັນ ຄັດເລືອກເອົາທີມທີ່ຊະນະຜ່ານເຂົ້າໄປຫຼິ້ນໃນຮອບຊີງຊະນະເລີດ ຜ່ານການແຂ່ງຂັນຄູ່ຊີງຊະນະເລີດຜົນປະກົດວ່າ: ທີມອົງຄະນະພັກເມືອງໄຊທານີ ສາມາດໄລ່ເອົາຊະນະ ທີມຝ່າຍການຂາຍ ແລະ ການຕະຫຼາດ ບໍລິສັດ ເບຍລາວ ຈຳກັດ ໄປແບບສຸດມ່ວນ 3-1 ປະຕູ ຄວ້າແຊ໋ມໄປຄອງ ສ່ວນທີມຝ່າຍການຂາຍ ແລະ ການຕະຫຼາດ ໄດ້ພຽງອັນດັບທີ 2 ແລະ ອັນດັບທີ 3 ຮ່ວມ ແມ່ນທີມກຸ່ມສື່ມວນຊົນສາຍກິລາລາວ ແລະ ສະມາຄົມນັກທຸລະກິດຮ້ານອາຫານລາວ.    

ຂ່າວໂດຍ: ປາກກາຄຳ