ລາຍລະອຽດຂ່າວ
ວຽງຈັນ ເອັບທີ ຄອງແຊ໋ມເຕະບານ U-12 ມາສເຕີ ເຊເວັນ ຄລັບ 2021
ຂຽນເມື່ອ: 22/02/2021 13:02 | ໂດຍ: revive | ອ່ານ: 671 ຄັ້ງ

      ສະໂມສອນ ອາຄາເດມີ້ ວຽງຈັນ ເອັບທີ ຕອກຢໍ້າໄຊຊະນະເໜືອ ເຈົ້າພາບ ສະໂມສອນ ມາສເຕີ ເຊເວັນ ເອັັບຊີ ໄປແບບຂາດຮອຍ 6-1 ປະຕູ ຄອງແຊ໋ມ ການແຂ່ງຂັນກິລາເຕະບານ ຮຸ່ນອາຍຸບໍ່ເກີນ 12 ປີ ຫຼື U-12 ລາຍການ ມາສເຕີ ເຊເວັນ ຄັບ 2021 ເພື່ອເປັນການສົ່ງເສີມນັກກິລາເຍົາວະຊົນລາວ ກໍຄື ນະຄອນຫຼວງວຽງຈັນ ໄດ້ມີໂອກາດຫຼິ້ນກິລາເພື່ອພັດທະນາຕົນເອງ ກ້າວຂຶ້ນໄປຕິດທີມຊາດໃນອະນາຄົດ ຢ່າງສົມສັກສີ ແລະ ເປັນແຊ໋ມລາຍການທຳອິດຂອງຕົ້ນປີນີ້.

          ການແຂ່ງຂັນເຕະບານລາຍການ ມາສເຕີ ເຊເວັນ ຄັບ 2021 ຮອບຮອງຊະນະເລີດ ແລະ ນັດຊີງຊະນະເລີດ ໄດ້ຈັດຂຶ້ນ ໃນວັນທີ 20 ກຸມພາ ຜ່ານມາ ພາຍຫຼັງທີ່ໄດ້ເປີດການແຂ່ງຂັນມາແຕ່ວັນທີ 13 ກຸມພາ 2021 ທີ່ສະໜາມກິລາບານເຕະຫຍ້າທຽມ ເປັນຕໍ່ ບ້ານດົງຄຳຊ້າງ ເມືອງຫາດຊາຍຟອງ ນະຄອນຫຼວງວຽງຈັນ ໃຫ້ກຽດເຂົ້າຮ່ວມມອບລາງວັນຂອງທ່ານ ບຸນຖະໜອມ ສີຫາລາດ ຮອງປະທານສະໂມສອນ ມາສເຕີ ເຊເວັນ ເອັບຊີ ມີບັນດາຄະນະນຳແຕ່ລະພາກສ່ວນ, ຄູຝຶກ ແລະ ນັກກິລາ ຕະຫຼອດຮອດພໍ່ແມ່ຜູ້ປົກຄອງນັກກິລາເຂົ້າຮ່ວມຢ່າງຫຼວງຫຼາຍ.

      ການແຂ່ງຂັນລາຍການນີ້ ຊຶ່ງມີບັນດາພາກສ່ວນເຂົ້າຮ່ວມຊີງໄຊທັງໝົດ 8 ສະໂມສອນ ແບ່ງອອກເປັນ 2 ກຸ່ມ ກໍຄື ກຸ່ມ ເອ ແລະ ກຸ່ມ ບີ ສຳລັບ ກຸ່ມ ເອ ສະໂມສອນ ວີ ເອັບຊີ, ສະໂມສອນ ດົງຄຳຊ້າງ ອາຄາເດມີ້, ສະໂມສອນ ແຄນລາວ ແລະ ສະໂມສອນ ໄຊສະຫວ່າງ ສ່ວນກຸ່ມ ບີ ປະກອບມີ ສະໂມສອນ ວຽງຈັນ ອາຄາເດມີ້ ເອັບທີ, ສະໂມສອນ ນາທົມ ອາຄາເດມີ້, ສະໂມສອນ ຄຳເຄນ ແລະ ເຈົ້າພາບ ສະໂມສອນ ມາສເຕີ ເຊເວັນ ເອັບຊີ ສຳລັບຮອບຄັດເລືອກແມ່ນແຂ່ງຂັນສຳເລັດໃນລະຫວ່າງວັນທີ 13-14 ກຸມພາ ຜ່ານມາ ສ່ວນຮອບຮອງຊະນະເລີດ ແລະ ຮອບຊີງອັນດັບທີ 1 ແມ່ນຈັດຂຶ້ນໃນວັນດຽວກັນ ໂດຍໃຊ້ເວລາພຽງເຄິ່ງມື້ສຳເລັດ ໃນວັນທີ 20 ກຸມພາ ຜ່ານມາ ຜ່ານການແຂ່ງຂັນຮອບຮອງຊະນະເລີດ ຜົນປະກົດວ່າ ທີມເຈົ້າພາບ ສະໂມສອນ ມາສເຕີ ເຊເວັນ ເອັບຊີ ສາມາດໄລ່ເອົາຊະນະ ທີມສະໂມສອນ ວີ ເອັບຊີ ໄປແບບຂາດຮອຍ 6-2 ປະຕູ ຜ່ານເຂົ້າຮອບຊີງຊະນະເລີດ ໂຄຈອນໄປພົບກັບ ສະໂມສອນ ອາຄາເດມີ້ ວຽງຈັນ ເອັບທີ ທີ່ສາມາດຖະຫຼົ່ມທະລາຍ ທີມສະໂມສອນ ໄຊສະຫວ່າງ ເອັບຊີ ໄປແບບບໍ່ເຫັນຝຸ່ນ 11-1 ປະຕູ ມາເຊັ່ນກັນ ກ່ອນ ສະໂມສອນ ອາຄາເດມີ້ ວຽງຈັນ ເອັບທີ ຈະຕອກຢໍ້າໄຊຊະນະເໜືອ ເຈົ້າພາບ ໄປແບບຂາດຮອຍ 6-1 ປະຕູ ສົ່ງຜົນໃຫ້ ທີມວຽງຈັນ ເອັບທີ ຄວ້າແຊ໋ມລາຍການດັ່ງກ່າວໄປຄອງ ພ້ອມທຶນການສຶກສາ 9 ແສນກີບ.  

           ໂດຍ: ປາກກາຄຳ

 

         




ຂ່າວຍອດນິຍົມ 7 ວັນລ່າສຸດ