ລາຍລະອຽດຂ່າວ
ຄອລ ຈະຍາດແຍ່ງຫາທຶນຊ່ວຍເຫຼືອຈາກສາກົນ ສຸມໃສ່ພັດທະນາທັບນັກກິລາລາວ ກຽມສ້າງຜົນງານເພື່ອຊາດ  
ຂຽນເມື່ອ: 11/01/2021 15:01 | ໂດຍ: ເພຣເມັກເກີ | ອ່ານ: 249 ຄັ້ງ

       ຄະນະກຳມະການໂອແລມປິກແຫ່ງຊາດລາວ ຫຼື ຄອລ ຈະສູ້ຊົນຍາດແຍ່ງຂໍທຶນຈາກການຊ່ວຍເຫຼືອຈາກອົງການສາກົນ ໂດຍສະເພາະແມ່ນຈາກ ໂອແລມປິກສາກົນ ໃຫ້ຫຼາຍກວ່າເກົ່າ ເພື່ອຈະສຸມໃສ່ການຝຶກແອບ ແລະ ການພັດທະນານັກກິລາລາວ ໃຫ້ເຂັ້ມແຂງ ແລະ ມີຄຸນະພາບທີ່ດີກວ່າເກົ່າເພື່ອກ້າວສູ່ໂອແລມປິກ ທີ່ມີທ່າແຮງ ແລະ ສ້າງຄູຝຶກລະດັບສູງ ລວມເຖິງກໍາມະການຕັດສິນ ລະດັບສູງ ເພື່ອກຽມຄວາມພ້ອມເຂົ້າຮ່ວມສ້າງຜົນງານໃນການແຂ່ງຂັນງານມະຫະກຳກິລາຕ່າງໆທັງໃນລະດັບພາກພື້ນ, ອານຸພາກພື້ນ ແລະ ສາກົນ ໂດຍສະເພາະແມ່ນງານກິລາ ໂອແລມປິກສາກົນ ຈະຈັດຂຶ້ນ ທີ່ນະຄອນຫຼວງ ໂຕກຽວ ປະເທດຍີ່ປຸ່ນ ໃນປີ 2021 ແລະ ງານກິລາຊີເກມ ຄັ້ງທີ 31 ທີ່ ສສ ຫວຽດນາມ ເປັນເຈົ້າພາບ ໃນທ້າຍປີ 2021ນີ້.

      ທ່ານ ສົມພູ ພົງສາ ຜູ້ຊ່ວຍລັດຖະມົນຕີກະຊວງສຶກສາທິການ ແລະ ກິລາ ທັງເປັນຮອງປະທານ ແລະ ເລຂາ ຄອລ ກ່າວລາຍງານໃນກອງປະຊຸມໃຫຍ່ຂອງ ຄອລ ປະຈໍາປີ 2020 ເມື່ອທ້າຍປີທີ່ຜ່ານມາ ໃຫ້ຮູ້ວ່າ: ດັ່ງທີ່ຮູ້ກັນແລ້ວວ່າ ໃນປີ 2020 ສປປ ລາວ ແລະ ທົ່ວໂລກ ໄດ້ຮັບຜົນກະທົບຈາກການແຜ່ລະບາດຂອງ ເຊື້ອພະຍາດສາຍພັນໃໝ່ ໄວຣັສ ໂຄວິດ-19 ຢ່າງໜັກ ໂດຍສະເພາະວົງການກິລາ ເຊັ່ນດຽວກັບ ສປປ ລາວ ພົບບັນຫາຢ່າງໜັກຕໍ່ກັບການພັດທະນາກິລາລາວ ຊຶ່ງບັນຫາ ແລະ ສິ່ງທ້າທາຍໃນປີ 2020 ເກີດຂຶ້ນຍ້ອນສະພາບການແຜ່ລະບາດຂອງ ໂຄວິດ-19 ເຮັດໃຫ້ສະພາບເສດຖະກິດທົດຖອຍ, ບັນຫາໄພພິບັດ ເກີດຂຶ້ນໃນຂອບເຂດທົ່ວປະເທດ. ດັ່ງນັ້ນ, ຈິ່ງມີຜົນກະທົບຕໍ່ການພັດທະນາກິລາລາວ ໂດຍສະເພາະການພັດທະນາບຸກຄະລາກອນດ້ານຕ່າງໆ, ການເຂົ້າຮ່ວມທົດສອບ ແລະ ການເຂົ້າຮ່ວມແຂ່ງຂັນລາຍການໃຫຍ່ໆແມ່ນບໍ່ສາມາດປະຕິບັດໄດ້ ເຮັດໃຫ້ຂະບວນການເຄື່ອນໄຫວກິລາຢຸດສະງັກ. ນອກຈາກນັ້ນ, ການກະກຽມນັກກິລາເຂົ້າຮ່ວມ, ຝຶກແອບ ແລະ ການຄັດເລືອກເຂົ້າຮ່ວມ ໂອແລມປິກ 2020 ທີ່ເລື່ອນໄປຈັດໃນປີ 2021 ແມ່ນໄດ້ຮັບທຶນຊ່ວຍເຫຼືອປົກກະຕິ ແຕ່ນັກກິລາແມ່ນບໍ່ມີໂອກາດເຂົ້າຮ່ວມທົດສອບ ເພື່ອສະສົມຄະແນນ ເນື່ອງຈາກກິລາ ລອຍນໍ້າ ແລະ ແລ່ນ-ລານ ທີ່ຈະເຂົ້າຮ່ວມແຂ່ງຂັນກໍຕ້ອງໄດ້ທົດສອບເບິ່ງສະຖິຕິ ຖ້າຫາກສະຖິຕິບໍ່ດີ ກໍເປັນຜົນຕໍ່ການເຂົ້າຮ່ວມ, ການພັດທະນາຄູຝຶກຂອງບັນດາສະຫະພັນກິລາແຫ່ງຊາດໃນປີ 2020 ແມ່ນບໍ່ສາມາດຈັດຝຶກອົບຮົມໄດ້ເທົ່າທີ່ຄວນ ເຮັດໃຫ້ຂະບວນການຢຸດສະງັກ ຈິ່ງຈໍາຕ້ອງເລື່ອນຈັດໃນປີ 2021.

      ຕໍ່ສະພາບການດັ່ງກ່າວນັ້ນ, ທ່ານ ສົມພູ ພົງສາ  ກໍຍັງໄດ້ສະເໜີວິທີແກ້ໄຂ ແລະ ທາງອອກຕໍ່ກັບ ສິ່ງທ້າທາຍທີ່ກ່າວມານັ້ນ ທາງຄະນະກໍາມະການໂອແລມປິກແຫ່ງຊາດລາວ ຈະຕ້ອງໄດ້ສັງລວມທັງໝົດ ຕໍ່ກັບໂຄງການທີ່ຍັງບໍ່ທັນບັນລຸ ເພື່ອຊອກທາງອອກ, ການຈັດຕັ້ງປະຕິບັດໃຫ້ສອດຄ່ອງ ແລະ ສໍາເລັດຮ່ວມກັບພາກສ່ວນຕ່າງໆ, ສະເໜີໃຫ້ບັນດາສະຫະພັນກີລາແຫ່ງຊາດ ແຕ່ງຕັ້ງຜູ້ປະສານງານສະເພາະຕໍ່ວຽກບໍລິຫານງານຢ່າງໜ້ອຍ 1-2 ທ່ານ ແລະ ມີຫ້ອງການສະເພາະ, ສ້າງສະຫະພັນກິລາທີ່ມີແລ້ວໃຫ້ເຂັ້ມແຂງ ພ້ອມກັນໄປຕາມທາງດຽວກັນ ໂດຍອີງໃສ່ຍຸດທະສາດການພັດທະນາກິລາລາວເປັນບ່ອນອີງ ໂດຍນໍາໃຊ້ທຸກທ່າແຮງພ້ອມກັບການພັດທະນານັກກິລາ, ການພັດທະນາຄູຝຶກ ແລະ ກໍາມະການຕັດສິນ ຢ່າງໜ້ອຍປີລະ 2 ຄັ້ງ. ຄຽງຄູ່ກັນນັ້ນ, ຄະນະກໍາມະການໂອແລມປິກແຫ່ງຊາດລາວ ຈະຕ້ອງໄດ້ຮ່ວມມືກັບອະນຸກໍາມະການຝ່າຍຕ່າງໆ ທີ່ໄດ້ຖືກແຕ່ງຕັ້ງຂຶ້ນ, ສ້າງແຜນການເຄື່ອນໄຫວປະຈໍາ 4 ປີ ເພື່ອຊຸກຍູ້ວຽກງານການເຄື່ອນໄຫວຂອງ ໂອແລມປິກ ໃຫ້ເປັນໄປຕາມແຜນການ, ຖືກຕ້ອງ ແລະ ມີຄວາມໝາຍ ຈິ່ງເຮັດໃຫ້ມີປະສິດທິຜົນໃນຕໍ່ໜ້າ, ຄະນະກໍາມະການໂອແລມປິກແຫ່ງຊາດລາວ ຮ່ວມກັບ ກົມກິລາລະດັບສູງ ແລະ ສະຫະພັນກິລາທີ່ກ່ຽວຂ້ອງ ລວມເຖິງກົມທີ່ກ່ຽວຂ້ອງ ຈະຕ້ອງເພີ່ມທະວີຄວາມແຂງແຮງສ້າງບຸກຄະລະກອນ ສະເພາະດ້ານ, ສ້າງນັກກິລາສູ່ໂອແລມປິກ ທີ່ມີທ່າແຮງ ແລະ ສ້າງຄູຝຶກລະດັບສູງ ລວມເຖິງກໍາມະການຕັດສິນ ລະດັບສູງ ພ້ອມທັງສະເໜີ ຈະຂໍທຶນຈາກ ຄະນະໂອແລມປິກສາກົນ ເພື່ອແນໃສ່ສົ່ງເສີມວຽກງານການພັດທະນາສາຍບໍລິຫານ, ທຶນຊ່ວຍເຫຼືອການບໍລິຫານ, ທຶນລິເລີ່ມຄຸ້ມຄອງ ຄອລ ແລະ ທຶນພັດທະນາຍຸດທະສາດໃຫ້ໄປຕາມແຜນ, ທຶນການຝຶກແອບ ແລະ ການພັດທະນານັກກິລາ ຈະມີທຶນສໍາລັບນັກກິລາ ທີ່ຈະໄປຮ່ວມ ໂອແລມປິກ 2021, ທຶນສະໜັບສະໜູນນັກກີລາຈາກພາຍໃນ ແລະ ທຶນຈາກພາກພື້ນ ກໍຄື ກຽມເຂົ້າຮ່ວມງານກິລາ ເອຊຽນ ເກມ 2021 ແລະ ເອຊຽນ ເກມ ຫາດຊາຍ 2021 ໂດຍສະເພາະແມ່ນງານກິລາ ໂອແລມປິກສາກົນ ຈະຈັດຂຶ້ນ ທີ່ນະຄອນຫຼວງ ໂຕກຽວ ປະເທດຍີ່ປຸ່ນ ໃນປີ 2021 ແລະ ງານກິລາຊີເກມ ຄັ້ງທີ 31 ທີ່ ສສ ຫວຽດນາມ ເປັນເຈົ້າພາບ ໃນທ້າຍປີ 2021ນີ້.

ໂດຍ: ປາກກາຄຳ




ຂ່າວຍອດນິຍົມ 7 ວັນລ່າສຸດ