ລາຍລະອຽດຂ່າວ
ພາຍໃນປີ 2021ນີ້ ສຕລ ຈະສ້າງ​ຄູ​ຝຶກສາຍເລືອດໃໝ່ເຖິງ 665 ຄົນ ໃນລະດັບ D ຈົນເຖິງ A ລາຍເຊັນ
ຂຽນເມື່ອ: 11/01/2021 15:01 | ໂດຍ: ເພຣເມັກເກີ | ອ່ານ: 71 ຄັ້ງ

      ພາຍໃນປີ 2021ນີ້ ສະຫະພັນບານເຕະແຫ່ງຊາດລາວ ຫຼື ສຕລ ຈະພະຍາຍາມສ້າງຄູຝຶກສາຍເລືອດໃໝ່ໃຫ້ໄດ້ເຖິງ 665 ຄົນ ຈາກ 4 ລະດັບ ກໍຄື ຄູຝຶກ ລະດັບ ເອ ລາຍເຊັນ, ບີ ລາຍເຊັນ, ຊີ ລາຍເຊັນ ແລະ ດີ ລາຍເຊັນ ເພື່ອສົ່ງເສີມກາ່ນພັດທະນາວົງການກິລາບານລາວ ໃຫ້ເຕີບໃຫຍ່ຂະຫຍາຍຕົວຂຶ້ນກວ່າເກົ່າ ແນໃສ່ສ້າງການແຂ່ງຂັນລາຍການຕ່າງໆ ໂດຍສະເພາະ ລາວລີກ 1 ແລະ ລາວລີກ 2 ກ້າວສູ່ການເປັນມືອາຊີບໃນອະນາຄົດ.

      ຕາມການໃຫ້ສຳພາດຂອງທ່ານ ກັນລະຍາ ສີສົມຫວັງ ອະດິດນັກກິລາເຕະບານທີມຊາດລາວ ທັງເປັນຫົວໜ້າໜ່ວຍງານພັດທະນາບານເຕະຂັ້ນພື້ນຖານ ຂອງພະແນກເຕັກນິກວິທະຍາ ສຕລ ລາຍງານໃຫ້ຮູ້ວ່າ: ໂຄງການຝຶກອົບຮົມຍົກລະດັບຄູຝຶກຂອງສະຫະພັນບານເຕະແຫ່ງຊາດລາວ ແມ່ນໄດ້ເລີ່ມຕົ້ນດຳເນີນໂຄງການຝຶກອົບຮົມຄູຝຶກບານເຕະມາແຕ່ປີ 2015 ເປັນຕົ້ນມາ ສະເພາະປີນີ້ ສະຫະພັນບານເຕະອາຊີ ຫຼື ເອເອັບຊີ ແມ່ນໄດ້ກຳນົດ ເອ ລາຍເຊັນ ແລະ ບີ ລາຍເຊັນ ແມ່ນ ເອເອັບຊີ ເປັນຜູ້ຮັບຜິດຊອບຖ່າຍທອດຄວາມຮູ້ຄວາມສາມາດໃຫ້ສະເພາະ ສ່ວນ ລະດັບ ຊີ ລາຍເຊັນ ແລະ ດີ ລາຍເຊັນ ແມ່ນສະຫະພັນບານເຕະແຫ່ງຊາດ ເປັນເຈົ້າການ. ເຖິງຢ່າງໃດກໍດີ, ສຳລັບແຜນ​ການ​ຝຶກ​ອົບ​ຮົມ​ຄູ​ຝຶກ ຂອງ​ ສະ​ຫະ​ພັນ​ບານ​ເຕະ​ແຫ່ງ​ຊາດ​ລາວ ປະ​ຈຳ​ປີ 2021ນີ້ ຈະພະຍາຍາມສ້າງຄູຝຶກສາຍເລືອດໃໝ່ໃຫ້ໄດ້ທັງໝົດ 665 ຄົນ ຈາກ 4 ລະດັບ ເພື່ອເປັນການສົ່ງເສີມກາ່ນພັດທະນາວົງການກິລາບານລາວ ໃຫ້ເຕີບໃຫຍ່ຂະຫຍາຍຕົວດີຂຶ້ນກວ່າເກົ່າ ແນໃສ່ສ້າງການແຂ່ງຂັນລາຍການຕ່າງໆ ໂດຍສະເພາະ ການແຂ່ງຂັນ ລາວລີກ 1 ແລະ ລາວລີກ 2 ກ້າວສູ່ການເປັນມືອາຊີບໃນອະນາຄົດ ໃຫ້ໄດ້ໄວທີ່ສຸດຢ່າງສຸດຄວາມສາມາດ. 

      ສຳລັບເປົ້າໝາຍໃນການຈັດຝຶກອົບຮົມຄູຝຶກລະດັບ A ລາຍເຊັນ ແມ່ນຈະໃຫ້ໄດ້ ຈຳນວນ 1 ຄັ້ງ ແລະ ກຳນົດນັກສໍາມະນາກອນ ຈຳນວນ 25 ຄົນ ຄາດວ່າຈະຈັດຂຶ້ນເດືອນກໍລະກົດນີ້, ຈະຈັດຝຶກອົບຮົມຄູຝຶກລະດັບ B ລາຍເຊັນ ໃຫ້ໄດ້ 1 ຄັ້ງ ກຳນົດນັກສໍາມະນາກອນທັງໝົດ 25 ຄົນ ຄາດວ່າຈະຈັດຂຶ້ນທ້າຍເດືອນພະຈິກ ຫຼື ຕົ້ນເດືອນທັນວາ, ຈະຈັດຝຶກອົບຮົມຄູຝຶກລະດັບ C ລາຍເຊັນ ຈຳນວນ 3 ຄັ້ງ ກຳນົດນັກສໍາມະນາກອນ 75 ຄົນ ຄາດວ່າຈະຈັດຂຶ້ນເດືອນກຸມພານີ້  ແລະ ຈະຈັດຝຶກອົບຮົມຄູຝຶກບານຂັ້ນພື້ນຖານ ລະດັບ D ລາຍເຊັນ ຢູ່ທີ່ 17 ແຂວງ ແລະ 1 ນະຄອນຫຼວງວຽງຈັນ ເປົ້າໝາຍຈໍານວນນັກສໍາມະນາກອນເຂົ້າຮ່ວມ 540 ຄົນ ຄາດວ່າຈະຈັດເດືອນມີນານີ້ ເປັນຕົ້ນໄປ.​ ແນວໃດກໍຕາມ, ປັດ​ຈຸ​ບັນ ສະຫະພັນບານເຕະແຫ່ງຊາດລາວ ມີຄູ​ຝຶກ​ລະ​ດັບ A ລາຍເຊັນແລ້ວ ຈຳນວນ 6 ຄົນ (ຍິງ 2 ທ່ານ ),  ຄູ​ຝຶກ​ລະ​ດັບ B ລາຍເຊັນ ມີ 40 ທ່ານ (ຍິງ 2 ທ່ານ), ຄູ​ຝຶກ​ລະ​ດັບ  C ລາຍເຊັນ ມີ 105 ທ່ານ (ຍິງ 11 ທ່ານ) ແລະ ຄູ​ຝຶກ​ລະ​ດັບ D ລາຍເຊັນ ມີ 1,456 ທ່ານ (ຍິງ 34 ທ່ານ).

ໂດຍ: ປາກກາຄຳ