ລາຍລະອຽດຂ່າວ
ສຸລິຈັນ ພະສະແຫວງ ສືບຕໍ່ພັດທະນາຕົນເອງຮອດຈຸດສຸດຍອດ ຫວັງຮັບໃຊ້ທີມຊາດ ໃນຕໍ່ໜ້າ
ຂຽນເມື່ອ: 07/01/2021 11:01 | ໂດຍ: ເພຣເມັກເກີ | ອ່ານ: 408 ຄັ້ງ

      2020 ກາຍເປັນປີແຫ່ງຄວາມສໍາເລັດຂອງ ສຸລິຈັນ ພະສະແຫວງ ນັກເຕະຈາກແຂວງເຊກອງ ຄວ້າລາງວັນນັກເຕະດາວຍິງສູງສຸດເຖິງສອງລາຍການ ໂດຍສະເພາະຫຼ້າສຸດລົງແຂ່ງຂັນກິລາຟຸດຊໍ ທົ່ວນະຄອນຫຼວງວຽງຈັນ ຊິງຂັນຫົວໜ້າພະແນກສຶກສາທິການ ແລະ ກີລາ ນະຄອນຫຼວງວຽງຈັນ (ນວ) ຄັ້ງທີ 1 ປະຈຳປີ 2020 ເໝົາຍິງຄົນດຽວ 23 ປະຕູ ພາທີມປີ້ງແບ້ ມາລວຍ ຄອງແຊ໋ມ ແລະ ຕົນເອງກໍຍັງສາມາດຄວ້າດາວຍິງສູງສຸດປະຈໍາລາຍການໄດ້ອີກດ້ວຍ.

      ຕາມການໃຫ້ສຳພາດຂອງ ສຸລິຈັນ ພະສະແຫວງ ໃຫ້ຮູ້ວ່າ: ເປັນຫຍັງນ້ອງຢູ່ແຂວງເຊກອງ ແຕ່ຍັງຕັດສິນໃຈອອກເດີນທາງໄກມາຮ່ວມ 2 ທີມ ກໍຄື ສະໂມສອນ ເອັດທີທີ ເອັບຊີ ເຂົ້າຮ່ວມແຂ່ງຂັນ ຄອມມານໂດ ລາວລີກ 2 ລະດູການ 2020 ດ້ວຍການພາທີມສ້າງຜົນງານຄວ້າອັນດັບທີ 2 ໃນລາຍການດັ່ງກ່າວ ແລະ ພາທີມຮ້ານອາຫານ ປີ້ງແບ້ ມາລວຍ ຄອງແຊ໋ມການແຂ່ງຂັນເຕະບານ ຟຸດຊໍ ທົ່ວນະຄອນຫຼວງວຽງຈັນ ຊີງຂັນທ່ານຫົວໜ້າພະແນກສຶກສາທິການ ແລະ ກິລາ ນະຄອນຫຼວງ ປະຈຳປີ 2020 ໄປຄອງຢ່າງຍິ່ງໃຫຍ່ ນັ້ນກໍຍ້ອນເຫດຜົນ ໃຈນ້ອງມັກຮັກ ແລະ ຫຼົງໄຫໃນການຫຼິ້ນກິລາບານເຕະ ສຳລັບສອງຜົນງານດັ່ງກ່າວ ໃນຄວາມຮູ້ສຶກສ່ວນຕົວ ແມ່ນນ້ອງມີຄວາມພາກພູມໃຈຫຼາຍ ແລະ ຂໍຂອບໃຈມາຍັງຄະນະນຳທັງສອງທີມ ທີ່ໃຫ້ໂອກາດແກ່ຕົວນ້ອງ ສຳລັບປີ 2021ນີ້ ຖ້າຫາກນ້ອງມີໂອກາດອີກ ກໍຈະກັບມາເຄື່ອນໄຫວໃຫ້ທັງສອງທີມຄືເກົ່າ ເປົ້າໝາຍກໍຫວັງຢາກພັດທະນາຕົນເອງ ເພື່ອກ້າວຂຶ້ນໄປຮັບໃຊ້ທີມຊາດໃນອະນາຄົດ. 

      ສຳລັບຄວາມເຄື່ອນໄຫວຫຼ້າສຸດຂອງ ສຸລິຈັນ ລົງແຂ່ງຂັນກີລາຟຸດຊໍ ໃຫ້ກັບທີມປີ້ງແບ້ສະຫັວນ ມາລວຍ ນັບຕັ້ງແຕ່ຕົ້ນເດືອນທັນວາ ຜ່ານມາ ລາຍການດັ່ງກ່າວ ຊຶ່ງມີ 15 ພາກສ່ວນເຂົ້າຮ່ວມ ແບ່ງອອກເປັນ 4 ກຸ່ມ ແຕ່ລະກຸ່ມແຂ່ງຂັນພົບກັນໝົດຄັດເອົາທີ 1-2 ຜ່ານເຂົ້າໄປຫຼິ້ນໃນຮອບຮອງຊະນະເລີດ ສຳລັບກຸມ A ປະກອບມີ ສິງເໜືອຜົ້ງສາລີ, ເຄດີດີ, ເອັສວີເອັສ ແລະ ຄວກ, ກຸ່ມ B ເໜືອ-ໃຕ້, ປີ້ງແບ້ສະຫວັນ ມາລວຍ ແລະ ຄິງດອມ ອິນເຕີເນັດ ສ່ວນກຸ່ມ C ບໍລິສັດ ທີເອັດດີ, ອອລນິວ, ເພື່ອນພັດທະນາ ແລະ ໂຊໄຊຕີ  ແລະ ກຸ່ມ D ເມືອງໄຊເຊດຖາ, ແມວແມວ, ໂດ້ດີ ທີມ ແລະ ເຄພີເອັດ.

      ຫຼ້າສຸດໃນນັດຊີງຊະນະເລີດ ຈັດຂຶ້ນ ເມື່ອວັນທີ 26 ທັນວາ ຜ່ານມາ ສຸລິຈັນ ສາມາດພາທີມ ທີມປີ້ງແບ້ສະຫວັນ ມາລວຍ ຖະຫຼົ່ມ ທີມເພື່ອນພັດທະນາ 11-2 ປະຕູ, ໃນນັ້ນ ສຸລິຈັນ ເໝົາຍິງຄົນດຽວເຖິງ 6 ປະຕູ ພາທີມຄວ້າແຊ໋ມ ແລະ ໄດ້ຮັບຂັນລາງວັນ ພ້ອມເງິນສົດ 5 ລ້ານກີບໄປຄອງ ສ່ວນທີມ ເພື່ອນພັນທະນາ ອັນດັບທີ 2 ໄດ້ຮັບຂັນ ພ້ອມເງິນສົດ 3 ລ້ານກີບ, ອັນດັບທີ 3 ທີມ ເໝືອ-ໃຕ້ ໄດ້ຮັບຂັນ ພ້ອມເງິນສົດ 2 ລ້ານກີບ ແລະ ອັນດັບທີ 4 ທີມ ໂຊໄຊຕີ້ໄດ້ຮັບລາງວັນຊົມເຊີຍ 1,5 ລ້ານກີບ.

     ສະເພາະ 6 ປະຕູ ເຮັດໃຫ້ຍອດລວມປະຕູ ຂອງ ສຸລິຈັນ ຍິງໄດ້ໃນລາຍການດັ່ງກ່າວລວມທັງໝົດ 23 ປະຕູ ຄວ້າລາງວັນດາວຍິງສູງສຸດຮ່ວມກັບ ລິຄິດ ສຸວັນ ຈາກທີມເພື່ອນພັດທະນາ ທີ່ຍິງປະຕູໄດ້ເທົ່າກັນ, ສ່ວນລາງວັນນັກເຕະດີເດັ່ນເປັນຂອງ ສຸກອຳພັນ ພົມມະລີວົງ, ລາງວັນຜູ້ຮັກສາປະຕູດີເດັ່ນ ອານຸລັກ ວິລະຜົນ ແລະ ລາງວັນຄູຝຶກດີເດັ່ນ ທ່ານ ແກ້ວພູທອນ ຊຶ່ງຜົນງານດັ່ງກ່າວຖືເປັນຄວາມສໍາເລັດອີກລາຍການໜຶ່ງທີ່ ສຸລິຈັນ ພະສະແຫວງ ສາມາດຄວ້າລາງວັນດາວຍິງສູງສຸດ ກ່ອນໜ້ານີ້ແມ່ນຄວ້າດາວຍິງສູງສຸດໃນ ລາວລີກ 2 ປະຈໍາປີ 2020 ພ້ອມກັບພາທີມ ເອັດທີທີ ເອັບຊີ ຄວ້າຮອງແຊ໋ມໃນລາຍການ ລາວລີກ 2 ໄປຄອງ.

      ປະຫວັດຄວາມເປັນມາຂອງ ສຸລິຈັນ ພະສະແຫວງ ແມ່ນເກີດວັນທີ 12 ກໍລະກົດ 1994 ທີ່ເມືຶອງລະມານ ແຂວງເຊກອງ ຖືເປັນນັກກິລາຟຸດຊໍທີ່ດີທີ່ສຸດຂອງ ສປປ ລາວ; ໃນປີ 2020 ໄດ້ລົງຫຼິ້ນໃຫ້ກັບ ເອັດທີທີ ເອັບຊີ ກໍສາມາດຄວ້າ 2 ລາງວັນຄືລາງວັນນັກເຕະດີເດັ່ນ ແລະ ລາງວັນດາວຍິງສູງສຸດໃນລາວລີກ 2 ລະດູການ 2020 ຈາກຜົນງານຍິງໄປທັງໝົດ 17 ປະຕູ.

ໂດຍ: ປາກກາຄຳ




ຂ່າວຍອດນິຍົມ 7 ວັນລ່າສຸດ