ລາຍລະອຽດຂ່າວ
ຄອບຄົວເບຍລາວ ຖີບລົດເພື່ອສຸພາບ ສົ່ງເສີມລາວທ່ຽວລາວ
ຂຽນເມື່ອ: 31/12/2020 11:12 | ໂດຍ: ເພຣເມັກເກີ | ອ່ານ: 462 ຄັ້ງ

      ກຸ່ມຮ້ານອາຫານ ນະຄອນຫຼວງວຽງຈັນ-ເບຍລາວ ຫຼື ຄອບຄົວເບຍລາວ 50 ກວ່າຄົນ ຈາກ 50 ກວ່າຮ້ານ ອ້ອມຂ້າງ 9 ຕົວເມືອງ ນະຄອນຫຼວງ ຈັດກິດຈະກຳຖີບລົດຖີບ ດ້ວຍໄລຍະທາງ 60 ກວ່າກິໂລແມັດ ຕັ້ງແຕ່ໂຮງງານບໍລິສັດ ເບຍລາວ ຈຳກັດ ບ້ານສາລະຄຳ ເມືອງຫາດຊາຍຟອງ ຫາ 3 ແຍກ ບ້ານພ້າວ ເມືອງປາກງ່ືມ ໄປ-ກັບ ດ້ວຍໄລຍະທາງ 60 ກວ່າກິໂລແມັດ ເພື່ອເປັນການປຸກລະດົມການທ່ອງທ່ຽວໃນສປປ ລາວ ໂດຍສະເພາະນະຄອນຫຼວງ ກໍຄື ລາວທ່ຽວລາວ ໃຫ້ນັບມື້ເຕີບໃຫຍ່ຂະຫຍາຍຕົວຂຶ້ນເລື້ອຍໆ ພ້ອມທັງເປັນການສ້າງຂະບວນການສະເຫຼີມສະຫຼອງສົ່ງທ້າຍປີເກົ່າ 2020 ຕ້ອນຮັບປີໃໝ່ 2021 ໃຫ້ເປັນຂະບວນການຟົດຟື້ນ.​

            ຈຸດເລີ່ມຕົ້ນ ກິດຈະກຳດັ່ງກ່າວ ໄດ້ມີຂຶ້ນ ເມື່ອວັນທີ 27 ທັນວາ ຜ່ານມາ ຕໍ່ໜ້າໂຮງງານ ບໍລິສັດ ເບຍລາວ ຈຳກັດ ໂດຍພາຍໃຕ້ການເປັນປະທານນຳພາຂອງທ່ານ ຄຳແພງ ເຜົ້າບົວວົງ ປະທານກຸ່ມຮ້ານອາຫານ ນະຄອນຫຼວງວຽງຈັນ-ເບຍລາວ, ທ່ານ ພູວົງ ອິນທະວົງສາ  ແລະ ທ່ານ ຄຳອ໋ອດ ວິສີສົມບັດ ຮອງປະທານກຸ່ມຮ້ານອາຫານ ນະຄອນຫຼວງວຽງຈັນ-ເບຍລາວ ໃຫ້ກຽດເຂົ້າຮ່ວມມີທ່ານ ຈັນສະໝອນ ຜ່ອງຈັນທາ ຜູ້ອຳນວຍການຝ່າຍການຕະຫຼາດ ບໍລິສັດ  ເບຍລາວ ແລະ ທ່ານ ຈັນທະໜອມ ເມກສະຫວັນ ຜູ້ຈັດການຝ່າຍຂາຍ ແລະ ການຕະຫຼາດ ນະຄອນຫຼວງ ບໍລິສັດ ເບຍລາວ ຈຳກັດ ພ້ອມດ້ວຍສະມາຊິກຄອບຄົວກຸ່ມດັ່ງກ່າວ ເຂົ້າຮ່ວມ 50 ກວ່າຄອບຄົວ ຢ່າງເປັນຂະບວນການຟົດຟື້ນ.

          ໂອກາດນີ້, ທ່ານ ຄຳແພງ ເພົ້າບົວວົງ ກ່າວວ່າ: ປີນີ້ ເປັນປີທີ່ມີຄວາມໝາຍຄວາມສຳຄັນຫຼາຍ ໂດຍສະເພາະ ຄອບຄົວເບຍລາວ ໂດຍກຸ່ມຮ້ານອາຫານນະຄອນຫລວງວຽງຈັນ ເຫັນໄດ້ຄວາມເຖີງສຳຄັນໃນການສົ່ງເສີມການທ່ອງ ທ່ຽວ ລາວທ່ຽວລາວ ຫຼັງຈາກສະຖານະການ ພະຍາດໂຄວິດ-19 ຢູ່ໃນ ສປປລາວ ດີຂື້ນພ້ອມທັງເປັນການປະຕິບັດຕາມການແຈ້ງການຂອງ ທ່ານລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ໃນໂຄງການ ລາວທ່ຽວລາວ ແລະ ພວກເຮົາກໍໄດ້ສືບຕໍ່ຈັດກິດຈະກຳໄປຕາມໂຄງການດັ່ງກ່າວ ຫຼາຍກິດຈະກຳ ເປັນຕົ້ນແມ່ນ ເມື່ອຕົ້ນເດືອນ ສິງຫາ ຜ່ານມາ ຄອບຄົວເບຍລາວ ໄດ້ຈັດກິດຈະກຳ ຄາລາວານທ່ອງທ່ຽວ ລາວທ່ຽວລາວ ຈາກນະຄອນຫລວງວຽງຈັນ ໄປທີ່ເມືອງທ່າແຂກ, ເມືອງນາກາຍ, ເມືອງຍົມມະລາດ ແຂວງຄຳມ່ວນ ໂດຍມີບັນດາສະມາຊິກໃນກຸ່ມຮ້ານອາຫາເຂົ້າຮ່ວມ 38 ຮ້ານ ຈຳນວນ 100 ກວ່າຄົນ ຕະຫຼອດໄລຍະການເດີນທາງ ຄະນະໄດ້ໄປສະຖານທີ່ທ່ອງທ່ຽວ ທີ່ສຳຄັນຂອງແຂວງ ໂດຍສະເພາະ ພູຫີນ ໜາມໜໍ່ ພູຜາມ່ານ ສະຖານທີ່ ທີ່ສຳຄັນທາງພຸດທະສາດສະໜາ ແລະ ຈຸດຊົມວີວທີ່ສຳຄັນຂອງ ເມືອງ ນາກາຍ ແລະ ເມືອງ ຍົມມະລາດ ອັນເປັນສະຖານທີ່ທ່ອງທ່ຽວທີ່ໄດ້ຮັບຄວາມນິຍົມຈາກນັກທ່ອງທ່ຽວ ຊຶ່ງກິດຈະກຳໃນຄັ້ງນັ້ນ ໄດ້ສ້າງຄວາມທັບໃຈໃຫ້ກັບຜູ້ເຂົ້າຮ່ວມ ເປັນຢ່າງຍິ່ງ ແລະ ໄດ້ສຳຜັດກັບທຳມະຊາດອັນສວຍງາມ ພ້ອມກັບໄດ້ຮັບຄວາມສົນໃຈຈາກພໍ່ແມ່ ປະຊາຊົນຊາວຄ້າຂາຍ ໂດຍສະເພາະ ໄດ້ມີການຈັບຈ່າຍຊື້ເຄື່ອງຂອງເຄື່ອງທີ່ລະນືກອາຫານການກິນເຮັດໃຫ້ພໍ່ແມ່ພີ່ນ້ອງໃນເຂດດັ່ງກ່າວໄດ້ມີລາຍຮັບເພີ່ມຂື້ນຈາກການໃຫ້ບໍລິການ.

      ທ່ານ ຄຳແພງ ເພົ້າບົວວົງ ກ່າວຕື່ມອີກວ່າ: ນອກຈາກນັ້ນ ຄອບຄົວເບຍລາວ ຍັງມີກິດຈະກຳຖີບລົດ ແລະ ແຂ່ງຂັນກິລາບານເຕະມິດຕະພາບກັບທີມ ຄອບຄົວເບຍລາວ ກຸ່ມຮ້ານອາຫານແຂວງຄຳມ່ວນ ພິເສດຍັງມີຄອບຄົວເບຍລາວ ຈາກແຂວງສະຫວັນນະເຂດ ກໍໄດ້ເດີນທາງມາຮ່ວມສ້າງຄວາມສາມັກຄີໃນງານດັ່ງກ່າວ ໃນໂອກາດດຽວກັນ ຄອບຄົວເບຍລາວ ກໍໄດ້ເດີນທາງໄປມອບໂຕະຕັ່ງອຸປະກອນການຮຽນໃຫ້ກັບ 2 ໂຮງຮຽນ ປະກອບມີ ໂຮງຮຽນ ມຕ ອຸດົມສຸກ ເມືອງນາກາຍ ໂຕະຕັ້ງ ຈຳນວນ 30 ຊຸດ ແລະ ໂຮງຮຽນ ມປ ໜອງບົວຄຳ ເມືອງນາກາຍ ຈຳນວນ 20 ຊຸດ ລວມມູນຄ່າ 16 ລ້ານກວ່າກີບ ເພື່ອເປັນການປະກອບສ່ວນເຂົ້າໃນວຽກງານການສົ່ງເສີມການສຶກສາຂອງນ້ອງໆນັກຮຽນ ໃນໂອກາດເປີດສົກຮຽນໄຫມ່ 2020-2021 ອີກດ້ວຍ. ນອກຈາກນັ້ນ, ຍັງໄດ້ຈັດກິດຈະກຳສົ່ງເສີມການທ່ອງທ່ຽວກິລາ ແລະ ການສຶກສາ ມາຫຼາຍປີຕິດຕໍ່ ແລະ ປີ 2020 ກໍເປັນອີກໜື່ງປີ ສືບຕໍ່ເດີນໜ້າຈັດກິດຈະກຳ ທີ່ດີ ໂດຍສະເພາະໄດ້ປຸກລະດົມຂົນຂວາຍນໍ້າໃຈຂອງສະມາຊິກມີທັງວັດຖຸປັດໄຈ ແລະ ເຄື່ອງອຸປະໂພກ-ບໍລິໂພກ ລວມມູນຄ່າຫຼາຍກວ່າ 35 ລ້ານກີບ ໄປຊ່ວຍເຫຼືອພໍ່ແມ່ປະຊາຊົນຊາວເມືອງສອງຄອນ ແຂວງສະຫວັນນະເຂດ ຈຳນວນເກືອບ 700 ຄອບຄົວ ຈາກ 6 ກຸ່ມບ້ານ ທີ່ປະສົບໄພນໍ້າຖ້ວມອີກດ້ວຍ ຕໍ່ທຸກກິດຈະກຳຕ່າງໆ ພວກເຮົາທຸກຄົນໃນຄອບຄົວເບຍລາວມີຄວາມພາກພູມໃຈທີ່ໄດ້ຊ່ວຍເຫຼືອສັງຄົມລາວ ແລະ ສ້າງຄວາມສາມັກຄີພາຍໃນກຸ່ມ ແລະ ໃນປີໜ້າ 2021 ພວກເຮົາຈະສືບຕໍ່ເສີມຂະຫຍາຍມູນເຊື້ອ ແລະ ຈັດກິດຈະກຳຫຼາຍຂຶ້ນກວ່າເກົ່າອີກ ເພື່ອເປັນສ່ວນໜຶ່ງໃນການປະກອບສ່ວນຊ່ວຍເຫຼືອສັງຄົມລາວ ກໍຄື ນະຄອນຫຼວງ ໂດຍສະເພາະເຂດທີ່ຫ່າງໄກສອກຫຼີກທີ່ມີຄວງາມຮຽກຮ້ອງຕ້ອງການຄວາມຊ່ວຍເຫຼືອຢ່າງຫຼວງຫຼາຍ.

ພາບ ແລະ ຂ່າວໂດຍ ປາກກາດຳ

  




ຂ່າວຍອດນິຍົມ 7 ວັນລ່າສຸດ