ລາຍລະອຽດຂ່າວ
My way Sportswear Laos ຊຸກຍູ້ເຄື່ອງກິລາ ໃຫ້ສື່ມວນຊົນສາຍກິລາ
ຂຽນເມື່ອ: 22/10/2020 22:10 | ໂດຍ: ເພຣເມັກເກີ | ອ່ານ: 140 ຄັ້ງ

          ບໍລິສັດ ໝາຍເວ ສະປອດແວ ລາວ ຜູ້ຜະລິດຕະພັນເສື້ອພິມລາຍ ທີ່ຄຸນນະພາບລະດັບສາກົນ ໃຫ້ການສະໜັບສະໜູນເຄື່ອງນຸ່ງກິລາພິມລາຍງາມໆ ຈຳນວນ 30 ກວ່າຊຸດ ລວມມູນຄ່າ 3 ລ້ານກວ່າກີບ ໃຫ້ແກ່ກຸ່ມສື່ມວນຊົນສາຍກິລາ ເພື່ອສ້າງໂອກາດໃຫ້ໄດ້ເຄື່ອນໄຫວຫຼິ້ນກິລາກັບບັນດາພາກສ່ວນຕ່າງໆທີ່ຂຶ້ນກັບພາກລັດ ແລະ ເອກະຊົນ ເນື່ອງໃນໂອກາດສະເຫຼີມສະຫຼອງ ແລະ ຄຳນັບຕ້ອນວັນສຳຄັນຕ່າງໆຂອງຊາດ ເວົ້າລວມ, ເວົ້າສະເພາະແມ່ນວັນຊາດທີ 2 ທັນວາ ຄົບຮອບ 45 ປີ ທີ່ຈະບັນຈົບຄົບຮອບມາເຖິງໃນມໍ່ໆນີ້ ໃຫ້ເປັນຂະບວນການຟົດຟື້ນ.

          ພິທີມອບ-ຮັບເຄື່ອງນຸ່ງກິລາພີມລາຍ ຈາກບໍລິສັດ ໝາຍເວ ສະປອດແວ ລາວ ໄດ້ມີຂຶ້ນ ເມື່ອວັນທີ 21 ຕຸລາ ຜ່ານມາ ທີ່ສະໜາມກິລາເຕະບານຫຍ້າທຽມ ໝາຍເວ (ຫຼັງກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ) ບ້ານປາກທ້າງ ເມືອງສີໂຄດຕະບອງ ນະຄອນຫຼວງວຽງຈັນ ໂດຍເປັນການກ່າວມອບໂດຍທ່ານ ພຸດທະພອນ ສີວິໄຊ ປະທານບໍລິສັດ ໝາຍເວ ສະປອດແວ ລາວ ແລະ ກ່າວຮັບແມ່ນທ່ານ ຕຸໄລເພັດ ພິມເມືອງ ຮອງປະທານກຸ່ມສື່ມວນຊົນສາຍກິລາ ມີທ່ານ ສຸກສາຄອນ ສີປະເສີດ ຜູ້ອຳນວຍການສູນໂຄສະນາຂ່າວສານການສຶກສາ ແລະ ກິລາ ສະຖາບັນຄົ້ນຄວ້າວິທະຍາສາດການສຶກສາ ກະຊວງສຶກສາທິການ ແລະ ກິລາ ທັງເປັນຫົວໜ້າບັນນາທິການ ໜັງສືພິມສຶກສາ-ກິລາ ລາຍວັນ ແລະ ທ່ານ ລຳພຽງ ຄັດຕິຍະລາດ ຜູ້ບໍລິຫານບໍລິສັດ ບໍລິສັດ ໝາຍເວ ສະປອດແວ ລາວ ພ້ອມດ້ວຍສະມາຊິກຂອງທັງສອງພາກສ່ວນ ຕະຫຼອດຮອດສື່ມວນຊົນສາຍກິລາທຸກຂະແໜງການເຂົ້າຮ່ວມເປັນສັກຂີພິຍານ.

          ໂອກາດນີ້, ທ່ານ ລຳພຽງ ຄຳຕິຍະລາດ ກ່າວວ່າ: ຕະຫຼອດໄລຍະການສ້າງ ບໍລິສັດ ບໍລິສັດ ໝາຍເວ ສະປອດແວ ລາວ ສອງປີຜ່ານມາ ພວກເຮົາໄດ້ມີສ່ວນຮ່ວມໃນການສະໜັບສະໜູນຫຼາຍໆພາກສ່ວນ ສະເພາະໃນວົງການບານລາວ ກໍໄດ້ຮ່ວມຊຸກຍູ້ຄົບຊຸດ ທັງຊຸດແຂ່ງຂັນ, ຊຸດຊ້ອມ, ຖົງຕີນ ແລະ ໂສ້ງ ໃຫ້ແກ່ ສອງສະໂມສອນ ທີ່ຄ້າແຄ່ງໃນລາຍການ ຄອມມານໂດ ລາວລີກ 2 ລະດູການ 2020 ກໍຄື ສະໂມສອນ ເຄພີເອັດ ທີມທີ່ຄວ້າອັນດັບທີ 4 ແລະ ສະໂມສອນ ວຽງຈັນ ຢູໄນເຕັດ ນອກນັ້ນ ກໍໄດ້ຊຸກຍູ້ເຄື່ອງກິລາໃຫ້ແກ່ກຳມະການຕັດສິນ ໃນການແຂ່ງຂັນເຕະບານຟຸດຊໍ ທົ່ວແຂວງຫຼວງພະບາງ ແລະ ບັນດາຫ້ອງການຕ່າງໆທີ່ຂຶ້ນກັບພາກລັດອີກດ້ວຍ ມື້ນີ້ ກໍເປັນໂອກາດທີ່ດີ ແລະ ກໍດີໃຈທີ່ສຸດທີ່ທາງບໍລິສັດພວກເຮົາ ໄດ້ເປັນສ່ວນໜຶ່ງໃນການສະໜັບສະໜູນໃຫ້ແກ່ທີມສື່ມວນຊົນສາຍກິລາລາວ ໄດ້ນຳໃຊ້ເຄື່ອງນຸ່ງກິລາງາມໆຂອງ ໝາຍເວ ເພື່ອເຄື່ອນໄຫວຫຼິ້ນກິລາ ສ້າງໃຫ້ມີສຸຂະພາບແຂງແຮງ ແລະ ສືບຕໍ່ເປັນກະບອກສຽງສຳຄັນໃນການນຳສະເໜີຂ່າວການເຄື່ອນໄຫວວົງການກິລາລາວ ໃຫ້ພໍ່ແມ່ປະຊາຊົນຮັບຮູ້ຢ່າງທົ່ວເຖີງ ແລະ ຂໍໃຫ້ຄຳໝັ້ນສັນຍາວ່າ ບໍລິສັດ ບໍລິສັດ ໝາຍເວ ສະປອດແວ ລາວ ຈະຂໍຄຽງບ່າຄຽງໄຫຼ່ເພື່ອຊຸກຍູ້ທີມນັກຂ່າວສາຍກິລາ ຕະຫຼອດໄປ. ແນວໃດກໍດີ, ໃນຕໍ່ໜ້າບໍລິສັດ ກໍໄດ້ມີວິໄສທັດ ແລະ ເປົ້າໝາຍຫຼັກແມ່ນຈະບຸກບືນສູ້ຊົນໃຫ້ຜະລິດຕະພັນເຄື່ອງພິມລາຍ ຂຶ້ນໄປຢືນໃນລະດັບແຖວໜ້າ ຕິດ 1 ໃນ 3 ຂອງສປປ ລາວ ເພື່ອຄຽງຄູ່ ແລະ ຮັບໃຊ້ສັງຄົມລາວ ຕະຫຼອດໄປ.

          ໃນໂອກາດດຽວກັນ, ທ່ານ ຕຸໄລເພັດ ພິມເມືອງ ກໍໄດ້ກ່າວສະແດງຄວາມຮູ້ບຸນຄຸນ ແລະ ຂອບໃຈເປັນຢ່າງສູງມາຍັງບໍລິສັດດັ່ງກ່າວ ທີ່ໄດ້ໃມຫ້ການຊຸກຍູ້ກຸ່ມນັກຂ່າວສາຍກິລາລາວ ໄດ້ມີໂອກາດນຳໃຊ້ເຄື່ອງກິລາທີ່ມີຄຸນະພາບທີ່ດີ ແລະ ເປັນຜະລິດຕະພັນຂອງຄົນລາວຢ່າງແທ້ຈິງມີຄຸນະພາບລະດັບສາກົນ ເພື່ອເຄື່ອນໄຫວຫຼິ້ນກິລາກັບດາພາກສ່ວນຕ່າງໆ ຕາມເງື່ອນໄຂຕົວຈິງ ໃນໂອກາດນີ້, ກໍຂໍອວຍພອນໄຊອັນປະເສີດມາຍັງບໍລິສັດ ໝາຍເວ ສະປອດແວ ລາວ ຈົ່ງປະສົບຜົນສຳເລັດໃນການດຳເນີນທຸລະກິດຕະຫຼອດໄປ ແລະ ຫວັງຢ່າງຍິ່ງວ່າໃນອະນາຄົດ ທີມສື່ມວນຊົນສາຍກິລາວຂອງພວກເຮົາຈະໄດ້ຮັບການສະໜູນນຳບໍລິສັດຕື່ມອີກ.

          ຫຼັງຈາກພິທີມອບ-ຮັບໄດ້ສຳເລັດລົງ ໃນບັນຍາກາດດັ່ງກ່າວ ກໍໄດ້ມີການແຂ່ງຂັນເຕະບານ ນັດພິເສດ ເພື່ອຜູກແໜ້ນຄວາມສາມັກຄີຮັກແພງໃຫ້ສະມາຊິກພະນັກງານ ແລະ ນັກຂ່າວທັງສອງພາກສ່ວນແໜ້ນແຟ້ນຂຶ້ນຕື່ມອີກ ກໍໄດ້ມີການແຂ່ງຂັນເຕະບານ 3 ຕັ້ງ ຕັ້ງລະ 25 ນາທີ ຜ່ານການແຂ່ງຂັນຜົນປະກົດວ່າ ທັງສອງພາກສ່ວນບໍ່ສາມາດເອົາຊະນະກັນໄດ້ ສະເໝີກັນໄປແບບສຸດມ່ວນ 8-8 ປະຕູ.

ຂ່າວໂດຍ: ສົງການ

ພາບໂດຍ: Dee Sa Rer