ລາຍລະອຽດຂ່າວ
ສຕລ ຮ່ວມກັບ ລາວສຕາຣ, TVe9 ແລະ ລາວໂທລະຄົມ ຖະແຫຼງຂ່າວ ຄວາມພ້ອມການຖ່າຍທອດສົດ ຊີງຂັນວັນຊາດ ຄົບຮອບ 45 ປີ
ຂຽນເມື່ອ: 22/10/2020 22:10 | ໂດຍ: ເພຣເມັກເກີ | ອ່ານ: 189 ຄັ້ງ

       ໃນຕອນບ່າຍຂອງວັນທີ  22 ຕຸລາ 2020, ທີ່ສະຫະພັນບານເຕະແຫ່ງຊາດລາວ(ສຕລ) ໄດ້ມີການຈັດງານຖະແຫຼງຂ່າວ ຮ່ວມກັນລະຫວ່າງ ສຕລ ສະຖານີໂທລະພາບ ລາວສຕາຣ, ສະຖານີໂທລະພາບນະຄອນຫຼວງວຽງຈັນ (Vte9) ແລະ ບໍລິສັດ ລາວໂທລະຄົມມະນາຄົມ ມະຫາຊົນ ຜູ້ສະໜັບສະໜູນການຖ່າຍທອດສົດການແຂ່ງຂັນກິລາບານເຕະ ເພື່ອຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 45 ປີ ເຂົ້າຮ່ວມພິທີໂດຍທ່ານ ວີເພັດ ສີຫາຈັກຣ ປະທານສະຫະພັນບານເຕະແຫ່ງຊາດລາວ, ທ່ານ ນາງ ກັນຍາ ແກ້ວມະນີ ເລຂາທິການ ສຕລ, ທ່ານ ສີສຸກ ທອງປັດສາ ຜູ້ອໍານວຍການໃຫຍ່ ບໍລິສັດ ລາວສຕາຣ ອິນເຕີເນຊັ່ນແນລ ຈໍາກັດ ຜູ້ດຽວ, ທ່ານ ພອນປະເສີດ ອິນທະສອນ ປະທານບໍລິຫານ ສະຖານີໂທລະພາບນະຄອນຫຼວງວຽງຈັນ, ທ່ານ ລັດຖະປັນຍາ ຂຽວວົງພະຈັນ ຮອງອຳນວຍການໃຫຍ່ ບໍລິສັດ ລາວໂທລະຄົມມະນາຄົມ ມະຫາຊົນ.

       ການແຂ່ງຂັນຄັ້ງນີ້ ຈະມີການຖ່າຍທອດສົດທຸກໆນັດສໍາລັບບານເຕະຍິງ ແລະ ຊາຍ ໂດຍແບ່ງເປັນການຖ່າຍທອດສົດຜ່ານໂທລະພາບ ກໍຄື ຊ່ອງລາວສະຕາ ຈະຖ່າຍທອດສົດທັງໝົດຈໍານວນ 12 ນັດ, ຊ່ອງນະຄອນຫຼວງວຽງຈັນ ຈະຖ່າຍທອດສົດທັງໝົດຈໍານວນ 10 ນັດ ຈະຖ່າຍທັງໝົດ ແລະ ການຖ່າຍທອດສົດອອນລາຍຜ່ານທາງແອັບພລີເຄຊັນ Mycujoo ອີກ 33 ນັດ ລວມທັງໝົດ 54 ນັດ ໃນນັ້ນ ບໍລິສັດ ລາວໂທລະຄົມ ຈະສະໜັບສະໜູນດ້ານອິນເຕີເນັດໃນການຖ່າຍທອດສົດທັງໝົດ ຄິດເປັນມູນຄ່າ 504,848,000 ກີບ.

      ໃນພິທີທັງ 2 ສະຖານີກໍ່ສະແດງຄວາມໝັ້ນໃຈວ່າ ຮອດປະຈຸບັນແມ່ນມີຄວາມພ້ອມ 100% ໃນການຖ່າຍທອດສົດ ມີທັງການກະກຽມທາງດ້ານ ເຕັກນິກ ແລະ ທີມງານບັນຍາຍລະດັບຄຸນນະພາບ, ແລະຫວັງຈະສ້າງສີສັນພ້ອມທັງເປັນການສົ່ງເສີມການພັດທະນາກິລາບານເຕະໃຫ້ມີຄວາມໃກ້ຄຽງກັບບັນດາປະເທດຕ່າງໆທັງພາກພື້ນແລະສາກົນ. ສ່ວນບໍລິສັດລາວໂທລະຄົມ ກໍ່ພ້ອມທີ່ຈະສະໜອບເຄື່ອຄ່າຍອິນເຕີເນັດລະດັບຄຸນນະພາບສູງເພື່ອເຮັດໃຫ້ການຖ່າຍທອດສົດດຳເນີນໄປດ້ວຍດີ.

ຮຽບຮຽງຂ່າວໂດຍ: ນັກຂຽນເງົາ