ລາຍລະອຽດຂ່າວ
ເບຍລາວ ອຸປະຖຳ ການແຂ່ງຂັນບານເຕະຊິງຂັນ ເພື່ອຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 45 ປິ 600 ລ້ານກີບ
ຂຽນເມື່ອ: 22/10/2020 10:10 | ໂດຍ: ເພຣເມັກເກີ | ອ່ານ: 128 ຄັ້ງ

      ໃນວັນທີ 21 ຕຸລາ 2020, ທີ່ສະຫະພັນບານເຕະແຫ່ງຊາດລາວ ໄດ້ຈັດງານຖະແຫຼງຂ່າວຮ່ວມກັບບໍລິສັດ ເບຍລາວ ຈໍາກັດ ຜູ້ສະໜັບສະໜູນຫຼັກການແຂ່ງຂັນບານເຕະຊິງຊັນ ເພື່ອຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 45 ປີ ເຂົ້າຮ່ວມພິທີໂດຍທ່ານ ວີເພັດ ສີຫາຈັກຣ, ປະທານສະຫະພັນບານເຕະແຫ່ງຊາດລາວ ແລະ ທ່ານ Henrik Andersen, ຜູ້ອໍານວຍການໃຫຍ່ບໍລິສັດເບຍລາວ ຈໍາກັດ. ການແຂ່ງຂັນລາຍການດັ່ງກ່າວຈະຈັດຂື້ນໃນລະຫວ່າງວັນທີ 06-21 ພະຈິກ 2020 ທີ່ນະຄອນຫຼວງວຽງຈັນ. ການແຂ່ງຂັນຄັ້ງນີ້ ໄດ້ມີທີມເຂົ້າຮ່ວມທັງໝົດ 18 ທີມ ໃນປະເພດຊາຍ (17 ແຂວງ, 1 ນະຄອນຫຼວງ) ແລະ 8 ທີມ ໃນປະເພດຍິງ (17 ແຂວງ, 1 ນະຄອນຫຼວງ) ໂດຍຈະແຂ່ງຂັນກັນຢູ່ 6 ສະໜາມ ເຊິ່ງການແຂ່ງຂັນບານເຕະຊາຍຈະນໍາໃຊ້ສະໜາມກິລາແຫ່ງຊາດ ຫຼັກ 16 (ເດີ່ນໃນ), ສະໜາມບານເຕະ ຫຼັກ 16 (ເດີ່ນນອກ), ສະໜາມກິລາກາງມະຫາວິທະຍາໄລແຫ່ງຊາດລາວ ແລະ ສະໜາມກິລາກອງທັບ ຫຼັກ 5. ສ່ວນການແຂ່ງຂັນບານເຕະຍິງ ຈະຈັດການແຂ່ງຂັນຢູ່ທີ່ 2 ສະໜາມຂອງສູນຝຶກບານເຕະຫ້ວຍຫົງ. ການແຂ່ງຂັນຄັ້ງນີ້ ບໍລິສັດ ເບຍລາວ ຈຳກັດ ເຂົ້າຮ່ວມເປັນຜູ້ສະຫນັບສະຫນູນຫລັກ ເປັນຈຳນວນເງິນ 600.000.000 ກີບ
      ຜ່ານມາ ບໍລິສັດ ເບຍລາວ ກໍໄດ້ໃຫ້ການສະຫນັບສະຫນູນກິລາບານເຕະມາເປັນເວລາດົນນານ ໂດຍສະເພາະແມ່ນການແຂ່ງຂັນກິລາບານເຕະລາວລີກ, ສຳລັບຈຸດປະສົງໃນການຈັດການແຂ່ງຂັນຄັ້ງນີ້ ແມ່ນເພື່ອເປັນການສະເຫລີມສະຫລອງ ວັນຊາດທີ 2 ທັນວາ ຄົບຮອບ 45 ປີ ທີ່ມີຄວາມຫມາຍສຳຄັນຢ່າງຍິ່ງຕໍ່ປວງຊົນລາວທົ່ວປະເທດ. ນອກຈາກນັ້ນກໍແມ່ນສ້າງເວທີກິດຈະກຳບານເຕະໃຫ້ທຸກໆແຂວງ ແລະ ນະຄອນຫລວງ ມາແຂ່ງຂັນກັນ ໂດຍການແຂ່ງຂັນຄັ້ງນີ້ ເປັນເທື່ອທຳອິດ ທີ່ທາງ ສະຫະພັນບານເຕະແຫ່ງຊາດລາວ ໄດ້ສາມາດເຊື້ອເຊີນບັນດາທີມຕົວແທນຈາກທຸກໆ ແຂວງ ແລະ ນະຄອນຫລວງ ເຂົ້າຮ່ວມແຂ່ງຂັນ ເຊິ່ງເປັນຫນຶ່ງໃນວຽກງານຫລັກຂອງ ສະຫະພັນບານເຕະແຫ່ງຊາດລາວ ໃນການພັດທະນາບານເຕະຂັ້ນທ້ອງຖິ່ນ.

      ສໍາລັບ ລາງວັນໃນການແຂ່ງຂັນບານເຕະລາຍການນີ້ ສໍາລັບປະເພດຍິງ ແລະ ຊາຍ ປະກອບມີ ທີມຊະນະເລີດ ຈະໄດ້ຮັບເງິນລາງວັນຈໍານວນ 100,000,000 ກີບ, ຂັນລາງວັນ 1 ໜ່ວຍ ແລະ ຫຼຽນຊະນະເລີດ 30 ຫຼຽນ, ສ່ວນທີມຮອງຊະນະເລີດ ຈະໄດ້ຮັບເງິນລາງວັນຈໍານວນ 40,000,000 ກີບ ແລະ ຫຼຽນຮອງຊະນະເລີດ 30 ຫຼຽນ. ນອກຈາກນັ້ນ ຍັງມີລາງວັນປະເພດບຸກຄົນ ກໍຄືລາງວັນນັກກິລາຍິງປະຕູສູງສຸດ ແລະ ລາງວັນຄູຝຶກດີເດັ່ນ. ສ່ວນທາງດ້ານ ການຈັດການແຂ່ງຂັນ, ທີ່ພັກ, ອາຫານ, ການເດີນທາງ ຕະຫລອດຮອດເດີ່ນຝຶກຊ້ອມ ແມ່ນທາງ ສະຫະພັນບານເຕະແຫ່ງຊາດລາວ ເປັນຜູ້ຮັບຜິດຊອບທັງຫມົດ.

ພາບໂດຍ:  ຂັນທະລີ ຕະຕິເດດ