ລາຍລະອຽດຂ່າວ
ນັກກິລາທີມຊາດ ແລະ ລາວລີກ 1 ໝົດສິດເຂົ້າຮ່ວມເຕະບານທົ່ວປະເທດ ສະຫຼອງວັນຊາດ ຄົບຮອບ 45 ປີ
ຂຽນເມື່ອ: 21/10/2020 16:10 | ໂດຍ: ເພຣເມັກເກີ | ອ່ານ: 245 ຄັ້ງ

      ສະຫະພັນບານເຕະແຫ່ງຊາດລາວ (ສຕລ) ປະກາດກຳນົດເງື່ອນໄຂນັກກິລາທີມຊາດຊຸດໃຫຍ່ ປັດຈຸບັນ ແລະ ນັກກິລາທີ່ຄ້າແຄ່ງຫຼິ້ນໃນລີກສູງສຸດຂອງປະເທດ ກໍຄື ລາຍການ ເປບຊີ ລາວລີກ 1 ລະດູການ 2020 ໝົດສິດເຂົ້າຮ່ວມການແຂ່ງຂັນເຕະບານຊາຍ ທົ່ວປະເທດ ເພື່ອສ້າງຂະບວນການຄຳນັບຮັບຕ້ອນວັນຊາດທີ 2 ທັນວາ ຄົບຮອບ 45 ປີ ຈະຈັດຂຶ້ນໃນລະຫວ່າງວັນທີ 7-21 ພະຈິກ 2020 ຊີງເງິນລາງວັນລວມ 280 ລ້ານກີບ. ຂະນະທີ່ ປະເພດຍິງ ອະນຸຍາດໃຫ້ທີມຊາດ ຮ່ວມທີມ 17 ແຂວງ ແລະ 1ນະຄອນຫຼວງວຽງຈັນ ທີມໜຶ່ງໄດ້ພຽງແຕ່ 4 ຄົນເທົ່ານັ້ນ.  

      ອີງຕາມຂໍ້ມູນຈາກສະຫະພັນບານເຕະແຫ່ງຊາດລາວ ເມື່ອວັນທີ 20 ຕຸລາ ຜ່ານມາ ແຈ້ງໃຫ້ຮູ້ວ່າ: ປະກາດກຳນົດເງື່ອນໄຂນັກກິລາທີມຊາດຊຸດໃຫຍ່ ປັດຈຸບັນ ແລະ ນັກກິລາທີ່ຄ້າແຄ່ງຫຼິ້ນໃນລີກສູງສຸດຂອງປະເທດກໍຄື ລາຍການ ເປບຊີ ລາວລີກ 1 ລະດູການ 2020 ໝົດສິດເຂົ້າຮ່ວມການແຂ່ງຂັນເຕະບານຊາຍ ທົ່ວປະເທດ ເພື່ອສ້າງຂະບວນການຄຳນັບຮັບຕ້ອນວັນຊາດທີ 2 ທັນວາ ຄົບຮອບ 45 ປີ ຈະຈັດຂຶ້ນໃນລະຫວ່າງວັນທີ 7-21 ພະຈິກ 2020 ຊີງເງິນລາງວັນລວມ 280 ລ້ານກີບ. ຂະນະທີ່ ປະເພດຍິງ ອະນຸຍາດໃຫ້ທີມຊາດ ໄດ້ພຽງແຕ່ 4 ຄົນເທົ່ານັ້ນ, ໃນນັ້ນ ພາກສ່ວນໜຶ່ງສາມາດສົ່ງທີມເຂົ້າຮ່ວມແຂ່ງຂັນໄດ້ 1 ທີມຊາຍ ແລະ 1 ທີມຍິງ  ແລະ ເງື່ອນໄຂຕ້ອງມີ ຫົວໜ້າຄະນະ 1 ທ່ານ, ຫົວໜ້າຄູຝືກ 1 ທ່ານ (ຕ້ອງມີໃບປະກາດຄູຝຶກ ປະເພດ C ຈາກ AFC ຂຶ້ນໄປ ), ຜູ້ຊ່ວຍຄູຝືກ 1 ທ່ານ (ຕ້ອງມີໃບປະກາດຄູຝຶກ ປະເພດ D ຂຶ້ນໄປ ), ຄູຝືກຜູ້ຮັກສາປະຕູ 1 ທ່ານ (ຕ້ອງມີໃບປະກາດຄູຝຶກ ປະເພດ D ຂຶ້ນໄປ ), ແພດປະຈຳທີມ 1 ທ່ານ (ຕ້ອງມີໃບປະກາດຈົບຫຼັກສຸດການການແພດ), ຜູ້ຈັດການທີມ 1 ທ່ານ ແລະ ຜູ້ຊ່ວຍທົ່ວໄປ 1 ທ່ານ ສ່ວນຈຳນວນນັກກິລາທັງໝົດຕ້ອງບໍ່ຫຼຸດ 18 ຄົນ ແລະ ບໍ່ເກີນ 20 ຄົນ, ໃນນັ້ນຕ້ອງມີຜູ້ຮັກສາປະຕູຢ່າງໜ້ອຍ 2 ຄົນ, ສາ​ມາດລົງ​ທະ​ບຽນ​ນັກ​ກິລາ​ໄດ້​ເບື້ອງ​ຕົ້ນ 30 ຄົນ​ຕໍ່​ທີມ​ໂດຍ​ຕ້ອງ​ມີ​ຜູ້​ຮັກ​ປະ​ຕູ 2 ຄົນ, ກຳ​ນົດ​ການ​ລົງ​ທະ​ບຽນ​ໃນ​ເບື້ອງ​ຕົ້ນ​ແມ່ນ​ເລີ່ມ​ຈາກວັນ​ທີ 1 - 23 ຕຸລາ 2020  ແລະ ຕ້ອງ​ສົ່ງ​ລາຍ​ຊື່​ສຸດ​ທ້າຍ ບໍ່​ເກີນ ວັນ​ທີ 5 ພະ​ຈິກ 2020.

      ສໍາລັບ ການແຂ່ງຂັນບານເຕະທົ່ວປະເທດຊີງຂັນວັນຊາດ ທີ 2 ທັນວາ 2020 ປະເພດທີມຊາຍມີທັງໝົດ 17 ແຂວງ ແລະ 1 ນະຄອນຫຼວງວຽງຈັນ ແບ່ງອອກເປັນ 4 ກຸ່ມ ປະກອບມີ ສາຍ ກ ແຂວງຄໍາມ່ວນ, ແຂວງສາລະວັນ, ແຂວງໄຊສົມບູນ, ນະຄອນຫຼວງວຽງຈັນ ແລະ ແຂວງຊຽງຂວາງ, ສາຍ ຂ ແຂວງຈໍາປາສັກ, ແຂວງອຸດົມໄຊ, ແຂວງວຽງຈັນ, ແຂວງຜົ້ງສາລີ ແລະ ແຂວງເຊກອງ ສ່ວນສາຍ ຄ ແຂວງຫຼວງນໍ້າທາ, ແຂວງໄຊຍະບູລີ , ແຂວງຫຼວງພະບາງ ແລະ ແຂວງອັດຕະປື ແລະ ສາຍ ງ ແຂວງສະຫວັນນະເຂດ, ແຂວງບໍ່ແກ້ວ, ແຂວງບໍລິຄໍາໄຊ ແລະ ແຂວງຫົວພັນ ຂະນະທີ່ປະເພດທີມຍິງ ກໍປະກອບມີ 8 ທີມ ແບ່ງອອກເປັນ 2 ກຸ່ມ ສຳລັບສາຍ ກ ແຂວງຊຽງຂວາງ, ແຂວງຈໍາປາສັກ ແຂວງວຽງຈັນ ແລະ ແຂວງໄຊຍະບູລີ ແລະ ສາຍ ຂ ແຂວງສະຫວັນນະເຂດ, ແຂວງອຸດົມໄຊ, ແຂວງຫຼວງນໍ້າທາ ແລະ ນະຄອນຫຼວງວຽງຈັນ ທັງສອງປະເພດດັ່ງກ່າວ ແຕ່ລະກຸ່ມແຂ່ງຂັນພົບກັນໝົດຄັດເອົາທີ 1-2 ຜ່ານເຂົ້າໄປຫຼິ້ນໃນຮອບຕໍ່ໄປ ຊະນະເລີດ ທັງສອງເພດດັ່ງກ່າວແມ່ນໄດ້ເທົ່າກັນ ທີ 1 ຈະໄດ້ຮັບຂັນແຊ໋ມພ້ອມລາງວັນເງິນສົົດ ທີມລະ 100 ລ້ານກີບ ແລະ ທີ 2 ຈະໄດ້ຮັບເງິນລາງວັນທີມລະ 40 ລ້ານກີບ ສໍາລັບ ການແຂ່ງຂັນຈະເປີດສາກຂຶ້ນລະຫວ່າງວັນທີ 7-21 ພະຈິກ 2020 ໂດຍໃຊ້ 6 ສະໜາມແຂ່ງຂັນ ປະກອບມີ ສະໜາມກິລາແຫ່ງຊາດ (ຫຼັກ16) ສະໜາມໃນ ແລະ ນອກ, ສະໜາມກິລາສູນຝຶກບານເຕະແຫ່ງຊາດ (ຫ້ວຍຫົງ= ສະໜາມ 1 ແລະ ສະໜາມ 2, ສະໜາມກິລາກະຊວງປ້ອງກັນປະເທດ ຫຼື ກອງທັບ (ຫຼັກ5) ແລະ ສະໜາມກິລາກາງ ມະຫາວິທະຍາໄລແຫ່ງຊາດ ວິທະຍາເຂດດົງໂດກ.

  ໂດຍ: ປາກກາຄຳ