ລາຍລະອຽດຂ່າວ
STT ຜ່ານເຂົ້າໄປຊີງ ກັບ ກອງທັບ ເຕະບານ ຄອມມານໂດ ລາວລີກ 2 ລະດູການ 2020
ຂຽນເມື່ອ: 05/10/2020 22:10 | ໂດຍ: ເພຣເມັກເກີ | ອ່ານ: 161 ຄັ້ງ

          ພາຍຫຼັງທີ່ໄດ້ມີການແຂ່ງຂັນເຕະບານທີມຊາຍ ຄອມມານໂດ ລາວລີກ 2 ລະດູການ 2020 ເມື່ອວັນທີ 25 ກໍລະກົດ ຜ່ານມາ ນັບມາຮອດປັດຈຸບັນ ກໍສາມາດໄດ້ 2 ສະໂມສອນ ຜ່ານເຂົ້າຊີງຊະນະເລີດ ເປັນທີ່ຮຽບຮ້ອຍ ເປັນການພົບກັນລະຫວ່າ ສະໂມສອນ ເອັດທີທີ ເອັບຊີ ສະໂມສອນ ກອງທັບ ເອັບຊີ ໃນນັດຊີງຊະນະເລີດ ແລະ ຊີງອັນດັບທີ 3 ຈະສືບຕໍ່ເລີ່ມຂຶ້ນ ໃນວັນທີ 17 ຕຸລານີ້ ທີ່ສະໜາມກິລາບານເຕະສູນຝຶກບານເຕະແຫ່ງຊາດ ສະໜາມ 1 ແລະ ສະໜາມ 2.​  

      ການແຂ່ງຂັນລາຍການ ຄອມມານໂດ ລາວລີກ 2 ລະດູການ 202​0 ນັດທີ 2 ແລະ ເປັນນັດສຸດທ້າຍຂອງຮອບ 4 ທີມ  ລະຫວ່າງ ຄູ່ທີ 1 ເອັດທີທີ ເອັບຊີ ພົບກັບ ເຄພີເອັດ ເອັບຊີ (ໃນນັດທີ 1 ເອັດທີທີ ອອກນໍາໄປກ່ອນ 4-1 ປະຕູ) ແລະ ເມືອງຫາດ ຢູໄນເຕັດ ພົບກັບ ກອງທັບ ເອັບຊີ (ຊຶ່ງນັດທຳອິດ ກອງທັບ ຊະນະດ້ວຍສະກໍ 2-1) ໄດ້ມີຂຶ້ນ ເມື່ອວັນທີ 3 ຕຸລາ ຜ່ານມາ ທີ່ສະໜາມກິລາຫຍ້າທຽມສູນຝຶກບານເຕະແຫ່ງຊາດ ບ້ານຫ້ວຍຫົງ ເມືອງຈັນທະບູລີ ນະຄອນຫຼວງວຽງຈັນ ໃນນັດດັ່ງກ່າວ ຖ້າຫາກ ທີມໃດຊະນະ ກໍໄດ້ຜ່ານເຂົ້າຊີງຊະນະເລີດ ລາຍການ ຄອມມານໂດ ລາວລີກ 2 ລະດູການ 2020 ເພື່ອຄວ້າສິດເລື່ອນຊັ້ນໄປຫຼິ້ນໃນລີກສູງສຸດຂອງ ສປປ ລາວ ຫຼື ເປບຊີ ລາວລີກ 1 ໃນລະດູການໜ້າ ທັນທີ່.

      ຜ່ານການແຂ່ງຂັນຜົນປະກົດວ່າ: ເປັນໄປຕາມຄາດໝາຍ ເຖິງແມ່ນວ່າ ສະໂມສອນ ເອັດທີທີ ເອັບຊີ ຈະພາດທ່າເສຍໃຫ້ ເຄພີເອັດ ເອັບຊີ 2-0 ປະຕູ ກໍຕາມ ແຕ່ລວມສະກໍ 2 ນັດ ເອັດທີທີ ຊະນະ 4-3 ປະຕູ ຜ່ານເຂົ້າຮອບຊີງຊະນະເລີດ ພົບກັບສະໂມສອນ ກອງທັບ ເອັບຊີ ທີ່ໄລ່ເອົາຊະນະ ສະໂມສອນ ເມືອງຫາດ ຢູໄນເຕັດ 3-1 ປະຕູ ລວມຜົນ 2 ນັດ ກອງທັບ ຊະນະ 5-2 ປະຕູ ສົ່ງຜົນໃຫ້ທັນສອງສະໂມສອນດັ່ງກ່າວ ຜ່ານເຂົ້າຮອບຊີງຊະນະເລີດ ສ່ວນ ເມືອງຫາດ ແລະ ເຄພີເອັດ ໄປຊີງອັນດັບທີ 3 ໃນການແຂ່ງຂັນເຕະບານ ລາຍການ ຄອມມານໂດ ລາວລີກ 2 ລະດູການ 2020 ໃນວັນທີ 17 ຕຸລານີ້.

      ລາຍການ ຄອມມານໂດ ລາວລີກ 2 ລະດູການ 202​0 ປີນີ້ ມີ 14 ສະໂມສອນ ເຂົ້າຮ່ວມແຂ່ງຂັນ ແບ່ງອອກເປັນ 2 ກຸ່ມ ກໍຄື ກຸ່ມ ເອ ແລະ ກຸ່ມ ບີ ກຸ່ມ ເອ ປະກອບມີ ວຽງຈັນ ຢູໄນເຕັດ, ເຄພີເອັດ ເອັບຊີ, ກອງທັບ ເອັບຊີ, ກາຣູດາ 369 ເອັບຊີ, ເຮັດບີທີ 941 ເອັບຊີ, ແຄນລາວ ຢູໄນເຕັດ ແລະ ນະຄອນຫລວງ ເອັບຊີ ສ່ວນກຸ່ມ ບີ ເມືອງຫາດ ຢູໄນເຕັດ, ວິທະຍາໄລ ລາວ - ທ໋ອບ ເອັບຊີ, ວິທະຍາໄລ ເຄວສ ຢູໄນເຕັດ, ບີແກນ ຢູໄນເຕັດ, ເອັດທີທີ ເອັບຊີ, ທຣີນີຕີ ເອັບຊີ ແລະ ເອັດຊີອີ ຢູໄນເຕັດ ການແຂ່ງຂັນ ແຕ່ລະກຸ່ມແຂ່ງຂັນແບບພົບກັນໝົດຄັດເລືອກເອົາທີມທີ່ມີຄະແນນດີທີ່ສຸດອັນດັບທີ 1-2 ຜ່ານເຂົ້າໄປຫຼິ້ນໃນຮອບ 4 ທີມສຸດທ້າຍ ຈາກນັ້ນ ໃນຮອບຮອງຊະນະເລີດ ກໍມາແຂ່ງຂັນ 2 ນັດໄປ-ກັບ (Championship Format) ສ່ວນການແຂ່ງຂັນຊີງອັນດັບທີ 3 ແລະ ຊີງຊະນະເລີດແມ່ນແຂ່ງຂັນແບບນັດດຽວ.

ພາບແລະຂ່າວໂດຍ ປາກກາຄຳ