ລາຍລະອຽດຂ່າວ
ສະຫະພັນຊ໋ອບເທັນນິດແຫ່ງຊາດລາວ ປະກາດກົງຈັກການຈັດຕັ້ງຄະນະບໍລິຫານງານຊຸດໃໝ່
ຂຽນເມື່ອ: 08/09/2020 13:09 | ໂດຍ: ເພຣເມັກເກີ | ອ່ານ: 470 ຄັ້ງ

          ປະກາດການປັບປຸງກົງຈັກການຈັດຕັ້ງ ຄະນະບໍລິຫານງານສະຫະພັນຊ໋ອບເທັນນິດແຫ່ງຊາດລາວ ຊຸດໃໝ່ ຢ່າງເປັນທາງການ ໂດຍແມ່ນທ່ານ ໄຊຍະເດດ ວົງໄຊ ເປັນປະທານ ເພື່ອກຽມຄວາມພ້ອມນຳພາທັບນັກກິລາຊ໋ອບເທັນນິດທີມຊາດລາວ ກຽມເຄື່ອນໄຫວເຂົ້າຮ່ວມການແຂ່ງຂັນກິລາຊ໋ອບເທັນນິດ ຊີງແຊ໋ມລະດັບພາກພື້ນ, ອານຸພາກພື້ນ ແລະ ສາກົນ ໂດຍສະເພາະແມ່ນສືບຕໍ່ກຽມສ້າງຜົນງານໃນງານມະຫະກຳກິລາຊີເກມ ຄັ້ງທີ 31 ທີ່ສສ ຫວຽດນາມ ຮັບກຽດເປັນເຈົ້າພາບ ໃນປີ 2021.

          ເມື່ອວັນທີ 7 ກັນຍາ ຜ່ານມາ ທີ່ຫ້ອງການຄະນະກຳມະການໂອແລມປີກແຫ່ງຊາດລາວ (ຄອລ) ຂ້າງສະໜາມກິລາເຈົ້າອານຸວົງ ເມືອງຈັນທະບູລີ ນະຄອນຫຼວງວຽງຈັນ ໄດ້ພິທີປະກາດການປັບປຸງກົງຈັກການຈັດຕັ້ງ ຄະນະບໍລິຫານງານສະຫະພັນຊ໋ອບເທັນນິດແຫ່ງຊາດລາວ ຊຸດໃໝ່ ໂດຍແມ່ນທ່ານ ໄຊຍະເດດ ວົງໄຊ ປະທານກຸ່ມບໍລິສັດ ບອນທູບີ ທັງເປັນປະທານສະຫະພັນຊ໋ອບເທັນນິດແຫ່ງຊາດລາວ ຄົນໃໝ່ ໃຫ້ກຽດເຂົ້າຮ່ວມເປັນສັກຂີພິຍານຂອງທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີກະຊວງສຶກສາທິການ ແລະ ກິລາ (ສສກ), ທ່ານ ສົມພູ ພົງສາ ຜູ້ຊ່ວຍລັດຖະມົນຕີ ກະຊວງ ສສກ, ທັງເປັນຮອງປະທານ ແລະ ເລຂາທິການຄະນະກຳມະການໂອແລມປີກແຫ່ງຊາດລາວ, ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ.

      ໂອກາດນີ້, ທ່ານ ນິກອນ ອານຸວົງ ຮັກສາການປະທານ ແລະ ເລຂາທິການສະຫະພັນຊ໋ອບເທັນນິດແຫ່ງຊາດລາວ ຊຸດເກົ່າ ຂຶ້ນລາຍງານກ່ຽວກັບປະຫວັດຄວາມເປັນມາ ແລະ ວຽກງານການເຄື່ອນໄຫວຂອງກິລາຊ໋ອບເທັນນິດລາວ ໃນໄລຍະຜ່ານມາ ໃຫ້ຮູ້ວ່າ: ກິລາຊ໋ອບເທັນນິດ ກໍຄ້າຍຄືກັນກັບກິລາເທັນນິດທົ່ວໄປ ແຕ່ມີຄວາມແຕກຕ່າງທີ່ການນຳໃຊ້ລູກບານແຂ່ງຂັນ ນັບແຕ່ປີ 2007 ສປປ ລາວ ໄດ້ຮັບການເຜີຍແຜ່ກິລາຊັອບເທັນນິດ ຄັ້ງທຳອິດ ໂດຍທ່ານ Chong Ryul Choi ຕາງໜ້າສະຫະພັນຊັອບເທັນນິດສາກົນ ຈາກ ສ ເກົາຫຼີ ຈາກນັ້ນ ໄດ້ມີການສ້າງຕັ້ງສະຫະພັນຊັອບເທັນນິດແຫ່ງຊາດລາວ ຂຶ້ນ ໃນປີ 2008 ໂດຍທ່ານ ຫົງຄຳ ສຸວັນນະວົງ ເປັນປະທານ ແລະ ຂ້າພະເຈົ້າ ກໍເປັນເລຂາທິການສະຫະພັນ ພ້ອມຄະນະບໍລິຫານລວມທັງໝົດ 11 ຄົນ ພາຍໃຕ້ການຊີ້ນຳຂອງກົມກິລາລະດັບສູງ ແລະ ຄະນະກຳມະການໂອແລມປີກແຫ່ງຊາດ ສ່ວນໃຫຍ່ແມ່ນໄດ້ເຄື່ອນໄຫວຢູ່ຕ່າງປະເທດ ໃນໄລຍະຜ່ານມາໄດ້ເຂົ້າຮ່ວມແຂ່ງຂັນຊ໋ອບເທັນນິດໂລກ ທີ່ ສ ເກົາຫຼີ 2011 ໃນງານມະຫະກຳກິລາຊີເກມ ກໍສາມາດຍາດໄດ້ 2 ຫຼຽນທອງ ໃນງານກິລາຊີເກມ ຄັ້ງທີ 26 ປີ 2011 ທີ່ປະເທດອິນໂດເນເຊຍ ປະເພດທີມຊາຍ ແລະ ປະເພດທີມຍິງ, ປີ 2014 ເຂົ້າຮ່ວມເອຊຽນເກມ ທີ່ເມືອງອິນຊອນ ສ ເກົາຫຼີ, ໄດ້ສົ່ງນັກກິລາເຂົ້າຝຶກແອບປະຈຳປີ ໃນເດືອນສິງຫາ ເປັນໄລຍະ 5 ປີ ທີ່ ສ ເກົາຫຼີ ແລະ ເຂົ້າຮ່ວມແຂ່ງຂັນຊ໋ອບເທັນນິດທຸກໆປີ, ປີ 2015 ເຂົ້າຮ່ວມແຂ່ງຂັນຊັອບເທັນນິດຊີງແຊ໋ມໂລກ ທີ່ອິນເດຍ ສົ່ງນັກກິລາ 5 ຄົນ ແລະ ຊະນະ ນັກກິລາທີມຊາດເຢຍລະມັນ ແລະ ທີມຊາດອັງກິດ ສາມາດສ້າງຜົນງານໄດ້ຜ່ານເຂົ້າຮອບ 3 ແລະ ກໍສືບຕໍ່ເຂົ້າຮ່ວມແຂ່ງຂັນຊີງແຊ໋ມນາໆຊາດ ຢ່າງຕໍ່ເນື່ອງ ແລະ ຫຼ້າສຸດ ກໍສາມາດຍາດໄດ້ 1 ຫຼຽນທອງ ປະເພດທີມຄູ່ຍິງ ໃນງານກິລາຊີເກມ ຄັ້ງທີ 30 ທີ່ປະເທດ ຟິລິບປິນ ເມື່ອນປີ 2019.

      ໃນໂອກາດດັ່ງກ່າວ, ທ່ານ ໄຊຍະເດດ ວົງໄຊ ກໍໄດ້ຮັບໜ້າທີ່ໃໝ່ພ້ອມທັງກ່າວວ່າ: ເພື່ອເປັນການຮັບປະກັນເຮັດສົມກັບຂັ້ນເທິງ ກໍຄື ກະຊວງ ສສກ ແລະ ຄະນະກຳມະການໂອແລມປີກແຫ່ງຊາດ ທີ່ໄດ້ໄວ້ເນື້ອເຊື່ອໃຈໃຫ້ພວກເຮົາໄດ້ມາຮັບໜ້າທີ່ໃໝ່ ເປັນຄະນະບໍລິຫານງານສະຫະພັນຊັອບເທັນນິດແຫ່ງຊາດ ເພື່ອນຳພາທັບນັກກິລາກຽມສ້າງຜົນງານເປັນກຽດສັກສີ ແລະ ຊື່ສຽງ ມາສູ່ປະເທດຊາດ. ດັ່ງນັ້ນ, ພວກເຮົາຈຶ່ງໄດ້ວາງແຜນໄວ້ໃສ່ 2 ເປົ້າໝາຍ ຄື: ເພື່ອເຮັດແນວໃດໃຫ້ສະຫະພັນຊັອບເທັນນິດແຫ່ງຊາດລາວ ໄດ້ເຊື່ອມໂຍງກັບສະຫະພັນຊັອບເທັນນິດ ອາຊີ ແລະ ສືບຕໍ່ຍາດແຍ່ງເອົາການສະໜັບສະໜູນຈາກ ສ ເກົາຫຼີ ເຖິງວ່າປັດຈຸບັນໄດ້ຮັບການຊ່ວຍເຫຼືອ ທາງດ້ານງົບປະມານ ແລະ ທາງດ້ານວິຊາການ ກໍຕາມ ພ້ອມທັງສືບຕໍ່ເຄື່ອນໄຫວ ໃຫ້ມີການເຄື່ອນໄຫວປົກກະຕິ ກັບ ສາກົນ, ຈະສ້າງເງື່ອນໄຂໃຫ້ເດັກນ້ອຍຮຸ່ນໃໝ່ ທີ່ມີໃຈມັກຮັກໃນການຫຼິ້ນກິລາເທັນນິດ ຫຼື ຊັອບເທັນນິດ ສາມາດເຂົ້າຝຶກແອບໄດ້ເລີຍ ແລະ ວາງແຜນຈະໃຫ້ໄດ້ມີການແຂງຂັນປະຈໍາປີຢ່າງໜ້ອຍໃຫ້ໄດ້ປີລະ 2 ຄັ້ງ. ນອກນັ້ນ, ກໍຢາກຂໍສະເໜີຂໍຄວາມຮ່ວມມືກັບສະຫະພັນເທັນນິດແຫ່ງຊາດລາວ ເພື່ອສ້າງສູນຝຶກຊ້ອມນັກກິລາຮ່ວມກັນ ທີ່ສະໜາມກິລາແຫ່ງຊາດ (ຫຼັກ 16) ເພື່ອສ້າງນັກກິລາໃຫ້ມີການພັດທະນາ ແລະ ມີຄວາມແຂງແກ່ນ ສາມາດຕິດທີມຊາດ, ໃນນັ້ນ ຜູ້ໃດມີທ່າແຮງທີ່ຈະຫຼິ້ນກິລາເທັນນິດ ກໍໄປເທັນນິດ ແລະ ຊັອບເທັນນິດ ກໍໄປຊັອບເທັນນິດ ສົ່ງເຂົ້າຮ່ວມຍາດແຍ່ງເອົາໄຊຊະນະເພື່ອໃຫ້ໄດ້ຫຼຽນໃດຫຼຽນໜຶ່ງມາໃຫ້ໄດ ໃນງານລະດັບພາກພື້ນ, ອານຸພາກພື້ນ ແລະ ສາກົນ.

ຫຼັງຈາກນັ້ນ, ທ່ານ ນາງ ຂັນທະລີ ສີຣິພົງພັນ ກໍໄດ້ເນັ້ນໃຫ້ຄະນະບໍລິຫານງານສະຫະພັນຊັອບເທັນນິດແຫ່ງຊາດລາວ ພ້ອມກັນສືບຕໍ່ຖອດຖອນບົດຮຽນ ນຳຄະນະຊຸດເກົ່າ ເພື່ອພ້ອມກັນສືບຕໍ່ພັດທະນາວົງການກິລາຊັອບເທັນນິດລາວເຮົາ ໃຫ້ເປັນຂະບວນການຟົດຟື້ນ ທາງດ້ານປະລິມານ ແລະ ຄຸນນະພາບ ສູ້ຊົນຍາດເອົາຫຼຽນຕ່າງໆ ໃນລະດັບອານຸພາກພື້ນ, ພາກພື້ນ ແລະ ສາກົນ ຈຶ່ງສະເໜີຄຳເຫັນ ເພື່ອເປັນທິດເຢື່ອງທາງໃຫ້ຄະນະບໍລິຫານງານສະຫະພັນຊຸດໃໝ່ ໃນການຈັດຕັ້ງປະຕິບັດວຽກງານ ໃຫ້ເປັນໄປຕາມແນວທາງນະໂຍບາຍ ແລະ ແຜນຍຸດທະສາດພັດທະນາວຽກງານກິລາລາວກ້າວສູ່ຜົນສຳເລັດໃນໄລຍະໃໝ່, ໃນນັ້ນ ກໍຕ້ອງເພີ່ມທະວີເອົາໃຈໃສ່ວຽກງານແນວຄິດ, ຄວາມສາມັກຄີປືກແຜ່ນໃນໝູ່ຄະນະຢ່າງໜັກແໜ້ນ ປະຕິບັດລະບອບປະຊາທິປະໄຕລວມໝູ່ ຕົກລົງເປັນໝູ່ຄະນະ, ເຄົາລົບກົດໝາຍ, ລະບຽບການຕ່າງໆ ພ້ອມທັງປະສານສົມທົບກັບອົງການຈັດຕັ້ງພັກ-ລັດ ເວົ້າລວມ, ເວົ້າສະເພາະ ກົມກິລາລະດັບສູງ, ຄະນະກຳມະການໂອແລມປີກແຫ່ງຊາດ ແລະ ອົງການຈັດຕັ້ງອື່ນໆທີ່ກ່ຽວຂ້ອງ, ເອົາໃຈໃສ່ແກ້ໄຂ ແລະ ຂໍ້ຄົງຄ້າງທີ່ເກີດຂຶ້ນໃນໄລຍະທີ່ຜ່ານມາ ຢ່າງຈິງຈັງ ເສີມຂະຫຍາຍຈຸດດີບໍ່ໃຫ້ມີອັນຄ້ອງຄາຢ່າງໜັກແໜ້ນ, ຊອກສ້າງທຸກເງື່ອນໄຂ ເພື່ອສຸມໃສ່ການພັດທະນາບຸຄະລາກອນ, ກຳມະການຕັດສິນ, ການສ້າງນັກກິລາແຕ່ລະຮຸ່ນໃຫ້ມີຄວາມຮູ້ຄວາມສາມາດທາງດ້ານເຕັກນິກ, ຍຸດທະວິທີ ຫຍັບເຂົ້າໃກ້ມາດຕະຖານພາກພື້ນ ແລະ ສາກົນເທື່ອລະກ້າວ, ສືບຕໍ່ຂະຫຍາຍສາຍພົວພັນຮ່ວມມື ຍາດແຍ່ງເອົາທຶນຮອນຈາກອົງການຈັດຕັ້ງກິລາຊັອບເທັນນິດພາກພື້ນ ແລະ ສາກົນ ໂດຍສະເພາະດ້ານການສ້າງບຸກຄະລາກອນ, ຂະຫຍາຍຕາໜ່າງກິລາຊັອບເທັນນິດລົງສູ່ທ້ອງຖິ່ນ, ບັນດາແຂວງ ເພື່ອຊ່ວຍເຫ໌ືອການພັດທະນາກິລາ ເຊິ່ງຈະເປັນກຳລັງແຮງໃຫ້ແກ່ສູນກາງ ແລະ ເພີ່ມທະວີການຕິດຕາມ, ກວດກາ ແລະ ປະເມີນຜົນການຈັດຕັ້ງປະຕິບັດວຽກງານໃຫ້ເປັນປົກກະຕິ ແລະ ເຂັ້ມງວດ.

       ສຳລັບຄະນະບໍລິຫານງານສະຫະພັນຊ໋ອບເທັນນິດແຫ່ງຊາດລາວ ຊຸດໃໝ່ ປະຈຳປີ 2020-2024 ເຊິ່ງປະກອບມີ ທ່ານ ດາວວອນ ພະຈັນທະວົງ ເປັນປະທານທີ່ປືກສາ, ທ່ານ ສຸລະສິດ ອຸປຣະວັນ ເປັນຮອງປະທານທີ່ປືກສາ ແລະ ທ່ານ ນິກອນ ອານຸວົງ ເປັນຄະນະ ສ່ວນທ່ານ ໄຊຍະເດດ ວົງໄຊ ເປັນປະທານຄະນະບໍລິຫານງານສະຫະພັນຊ໋ອບເທັນນິດແຫ່ງຊາດລາວ ຄົນໃໝ່ ແລະ ທ່ານ ພຸດທະວົງ ບຸນທົງວົງສາລີ ເປັນຮອງປະທານ ແລະ ນາຍຄັງ, ທ່ານ ບຸນທະມາລີ ຫຼວງໂຄດ ເປັນຮອງປະທານ ແລະ ເລຂາທິການ, ທ່ານ ຈົງ ລຸຍ ຈອຍ ເປັນຮອງປະທານ ແລະ ທ່ານ ນາງ ບຸນມະນີຄຳ ສຸທຳມະວົງ ເປັນຮອງເລຂາທິການ   

ພາບແລະຂ່າວໂດຍ: ປາກກາຄຳ




ຂ່າວລ່າສຸດ