ລາຍລະອຽດຂ່າວ
ບໍລິສັດ 3ເອັດ ແລະ ໄອ-ສະປອດ ຊຸກຍູ້ເຄື່ອງກິລາ ໃຫ້ ສວສ ກຽມຈັດກິດຈະກຳ ຕ້ອນຮັບກອງປະຊຸມໃຫຍ່ ຄັ້ງທີ lX ອົງຄະນະພັກ ສສກ
ຂຽນເມື່ອ: 04/09/2020 11:09 | ໂດຍ: ເພຣເມັກເກີ | ອ່ານ: 173 ຄັ້ງ

          ບໍລິສັດ 3ເອັດ ເອັດດີຊີ ກໍ່ສ້າງ ແລະ ໄຟຟ້າ ຈຳກັດ ໃຫ້ການອຸປະຖຳເຄື່ອງກິລາ ຈຳນວນ 30 ຊຸດ ລວມມູນຄ່າ 2 ລ້ານກວ່າກີບ ແລະ ຮ້ານຂາຍເຄື່ອງກິລາ ໄອ-ສະປອດ (Ai-Sport) ຊຸກຍູ້ຖົງມືຜູ້ຮັກສາປະຕູ ຈຳນວນ 2 ຄູ່ ຊຶ່ງເປັນແບຣນຂອງຄົນລາວເຮົາເອງ ຄຸນນະພາບດີ ລວມມູນຄ່າ 1 ລ້ານກີບ ໃຫ້ແກ່ສະຖາບັນຄົ້ນຄວ້າວິທະຍາສາດການສຶກສາ ຫຼື ສວສ ເພື່ອກຽມນຳໃຊ້ເຂົ້າໃນການຈັດກິດຈະກຳກິລາ ຮ່ວມກັບ ບໍລິສັດ ລັດວິສາຫະກິດ ໂຮງພິມສຶກສາ ເພື່ອສ້າງຂະບວນການຄຳນັບຮັບຕ້ອນກອງປະຊຸມໃຫຍ່ ຄັ້ງທີ lX ຂອງອົງຄະນະພັກກະຊວງສຶກສາທິການ ແລະ ກິລາ (ສສກ) ທີ່ຈະໄຂຂຶ້ນໃນເດືອນຕຸລານີ້ ໃຫ້ມີບັນຍາກາດຟົດຟື້ນ ແລະ ເບີກບານມ່ວນຊື່ນ.

          ພິທີມອບ-ຮັບເຄື່ອງກິລາຈາກ 2 ພາກສ່ວນດັ່ງກ່າວ ໄດ້ມີຂຶ້ນໃນຕອນບ່າຍວັນທີ 3 ກັນຍາ ຜ່ານມາ ທີ່ຫ້ອງປະຊຸມສູນສົ່ງເສີມພາສາຕ່າງປະເທດ ສະຖາບັນຄົ້ນຄວ້າວິທະຍາສາດການສຶກສາ ນະຄອນຫຼວງວຽງຈັນ, ເປັນກຽດກ່າວມອບຂອງ  ທ່ານ ຄໍາປະສົງ ແກ້ວມະຫາວົງ ຮອງຜູ້ອໍານວຍການບໍລິສັດ 3ເອັດ ເອັດດີຊີ ກໍ່ສ້າງ ແລະ ໄຟຟ້າ ຈໍາກັດ, ທ່ານ ໄພລະຄອນ ບຸນວິຊຽນ ເຈົ້າຂອງຮ້ານຂາຍເຄື່ອງກິລາ ໄອ-ສະປອດ ແລະ ໃຫ້ກຽດກ່າວຮັບແມ່ນ ທ່ານ ຄຳຈັນ ລັດຖະຍອດ ຄະນະພັກຮາກຖານ ສະຖາບັນຄົ້ນຄວ້າວິທະຍາສາດການສຶກສາ, ຜູ້ຊີ້ນຳວຽກງານ 3 ອົງການຈັດຕັ້ງມະຫາຊົນ ທັງເປັນຫົວໜ້າຄະນະຮັບຜິດຊອບຈັດກິດຈະກຳ, ມີທ່ານ ສຸກສາຄອນ ສີປະເສີດ ຜູ້ອຳນວຍການສູນໂຄສະນາຂ່າວສານການສຶກສາ ແລະ ກິລາ, ປະທານສະຫະພັນກຳມະບານ ສວສ ທັງເປັນຮອງຫົວໜ້າຄະນະຮັບຜິດຊອບຈັດກິດຈະກຳ ພ້ອມດ້ວຍຄະນະບໍລິຫານງານ 3 ອົງການຈັດຕັ້ງມະຫາຊົນ ເຂົ້າຮ່ວມເປັນສັກຂີພິຍານ.

          ໂອກາດນີ້, ທ່ານ ຄຳຈັນ ລັດຖະຍອດ ກໍໄດ້ສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງສູງມາຍັງ 2 ພາກສ່ວນດັ່ງກ່າວ ທີ່ມີນໍ້າໃຈຊຸກຍູ້ເຄື່ອງກິລາໃຫ້ແກ່ພວກເຮົາ ແລະ ເຄື່ອງດັ່ງກ່າວກໍລ້ວນແຕ່ມີຄວາມໝາຍຄວາມສຳຄັນຫຼາຍທີ່ຈະປະກອບສ່ວນເຂົ້າໃນການຈັດກິດຈະກຳແຂ່ງຂັນກິລາ ລະຫວ່າງ ສະຖາບັນຄົ້ນຄວ້າວິທະຍາສາດການສຶກສາ ກັບ ບໍລິສັດ ລັດວິສາຫະກິດ ໂຮງພິມສຶກສາ ໃນວັນທີ 4 ກັນຍາ 2020 ທີ່ສະໜາມກິລາຫຍ້າທຽມ ວິກຕໍຣີ ເພື່ອສ້າງຂະບວນການຄຳນັບຮັບຕ້ອນກອງປະຊຸມໃຫຍ່ ຄັ້ງທີ lX ຂອງອົງຄະນະພັກກະຊວງສຶກສາທິການ ແລະ ກິລາ (ສສກ) ທີ່ຈະໄຂຂຶ້ນໃນເດືອນຕຸລານີ້ ໃຫ້ມີບັນຍາກາດຟົດຟື້ນ ແລະ ເບີກບານມ່ວນຊື່ນ. ສະນັ້ນ, ຂໍໃຫ້ເຊື່ອໝັ້ນວ່າພວກເຮົາຈະນຳເອົາເຄື່ອງຈຳນວນນີ້ໄປໝູນໃຊ້ໃຫ້ຖືກຕາມວັດຖຸປະສົງ ແລະ ເກີດປະໂຫຍດຢ່າງແນ່ນອນ ພ້ອມຫວັງວ່າ ໃນໂອກາດຕໍ່ໄປຈະໄດ້ຮັບການຊ່ວຍເຫຼືອຕື່ມອີກຈາກທັງ 2 ພາກສ່ວນ.

          ຢ່າງໃດກໍຕາມ, ເພື່ອເປັນການສະແດງຄວາມຮູ້ບຸນມາຍັງທັງ 2 ພາກສ່ວນ ທີ່ໄດ້ໃຫ້ການຊຸກຍູ້ເຄື່ອງກິລາໃຫ້ ທີມກິລາ ສວສ ໄດ້ມີຄວາມພ້ອມເຂົ້າຮ່ວມກິດຈະກຳດັ່ງກ່າວ, ທ່ານ ຄຳຈັນ ລັດຖະຍອດ ກໍໄດ້ຕາງໜ້າຄະນະພັກຮາກຖານ ກໍຄື 3 ອົງການຈັດຕັ້ງມະຫາຊົນ ສວສ ໄດ້ມອບໃບກຽດຕິຄຸນໃຫ້ແກ່ທັງ 2 ພາກສ່ວນ ພ້ອມທັງອວຍໄຊໃຫ້ພອນແກ່ 2 ບໍລິສັດ ຈົ່ງມີແຕ່ໂຊກມີໄຊ ແລະ ປະສົບຜົນສຳເລັດໃນໜ້າທີ່ການງານ ແລະ ທຸລະກິດຈະເລີນຮຸ່ງເຮື່ອງຕະຫຼອດໄປ.  

ຂ່າວໂດຍ: ປາກກາຄຳ