ລາຍລະອຽດຂ່າວ
ແຂວງ​ຊຽງ​ຂວາງ ພ້ອມຮອບດ້ານ​ຈັດ​ແຂ່ງຂັນງານ​ມະ​ຫາ​ກຳ​ກິ​ລາ​ແຫ່ງ​ຊາດ ຄັ້ງ​ທີ XI
ຂຽນເມື່ອ: 28/08/2020 11:08 | ໂດຍ: ເພຣເມັກເກີ | ອ່ານ: 9600 ຄັ້ງ

      ແຂວງຊຽງຂວາງ ພ້ອມຮອບດ້ານຈະຈັດການແຂ່ງຂັນງານມະຫະກຳກິລາແຫ່ງຊາດ ຄັ້ງທີ Xl ຫຼື ຊຽງຂວາງ ເກມໂດຍສະເພາະທາງດ້ານເນື້ອໃນ, ນິຕິກໍາ ແລະ ເອກະສານຕ່າງໆຂອງ​ທຸກ​ກຳ​ມະ​ການ ແລະ ອະນຸກຳມະການ​ເພື່ອຮັບ​ໃຊ້​ການຈັດງານ ສ່ວນທາງດ້ານສະໜາມພື້ນຖານໂຄ່ງທີ່ຈະນຳໃຊ້ເຂົ້າໃນພິທີເປີດ-ປິດ ແລະ ສະຖານທີ່ພັກເຊົາຂອງຄະນະນຳ, ຄູຝຶກ ແລະ ນັກກິລາ ກໍໄດ້ມີການປັບປຸງແກ້ໄຂຄືນໃໝ່ ແລະ ສໍາເລັດໄປແລ້ວ 100 ເປີເຊັນ ປັດຈຸບັນລໍຖ້າທາງລັດຖະບານ​ ກໍຄື ກະຊວງສຶກສາທິການ ແລະ ກິລາ ອະນຸມັດຈະໃຫ້ເປີດຢ່າງເປັນທາງການໃນວັນເວລາ ຈັດແຂ່ງຂັນ ຊຽງຂວາງ ເກມ ໃນມື້ໃດເທົ່ານັ້ນ.    

        ເນື່ອງໃນໂອກາດເປີດກອງປະຊຸມຜູ້ບໍລິຫານການສຶກສາ ແລະ ກິລາ ທົ່ວປະເທດ ປະຈຳປສົກຮຽນ 2019-2020 ໄດ້ໄຂຂຶ້ນໃນລະຫວ່າງວັນທີ 27-28 ສິງຫາ ຜ່ານມາ ທີ່ສູນຝຶກອົບຮົມແນວລາວສ້າງຊາດ (ຕໍ່ໜ້າສຳນັກງານຫ້ອງການ ໄຟຟ້າ ສີສະເກດ) ເມືອງສີສັດຕະນາກ ນະຄອນຫຼວງວຽງຈັນ ໂດຍພາຍໃຕ້ການເປັນປະທານຂອງທ່ານ ແສງເດືອນ ຫຼ້າ​ຈັນ​ທະ​ບູນ ລັດ​ຖະ​ມົນ​ຕີ​ກະ​ຊວງ​ສຶກ​ສາ​ທິ​ການ ແລະ ກິ​ລາ  ທັງເປັນປະທານຄະນະກຳມະການໂອແລມປີກແຫ່ງຊາດລາວ ໃນໂອກາດດັ່ງກ່າວ, ທ່ານ ບົວລີ ພັນນາວົງ ຫົວໜ້າພະ​ແນກ​ສຶກ​ສາ​ທິ​ການ ແລະ ກິ​ລາ​ແຂວ​ຊຽງ​ຂວາງ ໃນ​ນາມກອງ​ເລ​ຂາ​ຜູ້​ປະ​ຈຳ​ການ ​ຈັດ​ງານ​ມະຫາ​ກໍາ​ກິລາແຫ່ງ​ຊາດ ຄັ້ງ​ທີ XI ກໍໄດ້ໃຫ້ສຳພາດກ່ຽວກັບ ກິດຈະ​ກໍາ​ຕ່າງໆ​ຂອງ​ແຕ່​ລະ​ກໍາມະການ​ທີ່​​ໄດ້​ຫ້າງ​ຫາ​ກະກຽມຈັດ​ຕັ້ງ​ປະຕິບັດສໍາ​ເລັດ, ຍັງບໍ່ທັນ​ສໍາ​ເລັດ ພ້ອມ​ກັບ​ງົບປະມານທີ່​ນໍາ​ໃຊ້ຜ່ານ​ມາ ​ແລະ ​ແຜນ​ວຽກໃນ​ຕໍ່ໜ້າ​ຮັບ​ໃຊ້​ງານ​ມະຫະ​ກໍາ​ກິລາ​ແຫ່ງ​ຊາດ ຄັ້ງ​ທີ XI ໃຫ້ຮູ້ວ່າ: ສຳລັບວຽກ​ທີ່​​ໄດ້​​ຈັດ​ຕັ້ງ​ປະຕິບັດ​ສຳເລັດໄປ​ແລ້ວ ແຕ່ລະກໍາມະການ, ອະນຸກໍາມະການທີ່ຮັບຜິດຊອບແຕ່ລະວຽກແມ່ນໄດ້ເຂົ້າປະຈໍາການມາແຕ່ວັນທີ 13 ມັງ​ກອນ ຫາ​ວັນ​ທິ 17 ມິນາ 2020 ເຫັນ​ວ່າມີຄວາມພ້ອມ ຖ້າງານບໍ່ເລື່ອນສາມາດຂັບເຄື່ອນງານມະຫາກໍາກິລາຄັ້ງນີ້ ໄປດ້ວຍດີ, ທາງດ້ານເນື້ອໃນ, ນິຕິກໍາ, ເອກະສານຕ່າງໆຂອງ​ທຸກ​ກຳ​ມະ​ການ​ເພື່ອຮັບ​ໃຊ້​ການຈັດງານ​ຄັ້ງ​ນີ້ແມ່ນກະກຽມສໍາເລັດ 100% ສ່ວນວຽກກອງ​ເລ​ຂາ ສຳເລັດການຈັດ​ຊື້​ເຄື່ອງຮັບ​ໃຊ້​ບໍ​ລິ​ຫານຫ້ອງການ, ຊື້​ພາ​ຫະ​ນະຮັບໃຊ້ຈຳນວນ 1 ຄັນ, ສໍາເລັດການຈັດ​ຊື້​ເຄື່ອງ​ບ່ອນ​ນອນ​ໃຫ້​ແກ່​ຄູ​ຝຶກ ​ແລະ ນັກ​ກິລາ​, ເຄື່ອງນຸ່ງ​ຮັບ​ໃຊ້​ກໍາມະການ​ຝ່າຍ​ຕ່າງໆ ​ແລະ ການ​ນໍາ​ຂອງ​ແຕ່ລະພາກສ່ວນ, ​ຫລຽນ​ລາງວັນ, ສັດ​ນໍາ​ໂຊກ​ກະຕຸ​ນໂຕ​ໃຫ່ຍ, ກະຕຸ​ນນົກ​ແອ່ນ​ໂຕ​ນ້ອຍ​ຄູ່​ກັບ​ຫຼຽນ, ​ໂລ້​ທີ່​ລະ​ນຶກ,ສາຍ​ບັດ​ຄ້ອງ​ຄໍ ພ້ອມ​ດ້ວຍ​ໂສ​ບຢາງ; ອຸ​ປະ​ກອນ​ປະດັບ​ປະດາ​ພິທີ​ເປີດ - ປິດ ​ແລະ ປະດັບ​ປະດາ​ສະໜາມ​ກິລາປະ​ເພດ​ຕ່າງໆ​, ຕິດ​ຕັ້ງ​ລະບົບ​ອິນ​ເຕີ​ເນັດ​ຮັບ​ໃຊ້​ການ​ອອກ​ບັດ,ຈັດພິມໃບຢັ້ງຢືນມອບຫຼຽນແຕ່ລະປະເພດ ;ການຈັດພິມ​ຮ່າງໃບຍ້ອງຍໍ,ໃບກຽດຕິຄຸນສຳ​ເລັດ 100% ຂຶ້ນທະບຽນອອກບັດ​ໃຫ້ຄະນະຮັບຜິດຊອບຈັດງານ, ຄູຝຶກ, ນັກກິລາຂອງແຕ່ລະແຂວງ, ກະຊວງທີ່ຈະເຂົ້າຮ່ວມງານສໍາເລັດ 90%, ໄດ້ຈັດພິມບັດຄ້ອງຄໍສໍາເລັດໄປແລ້ວຈໍານວນ 2,534 ບັດ ພ້ອມ​ທັງສະ​ຫຼຸບ​ສັງ​ລວມ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ແຕ່​ລະ​ດ້ານ​, ສະ​ຫຼຸບ​ສັງ​ລວມ​ດ້ານ​ງົບ​ປະ​ມານ ລາຍ​ງານ​ເຖິງ ສຳ​ນັກ​ງານ​ນາ​ຍົກ​ລັດ​ຖະ​ມົນ​ຕີ , ກະ​ຊວງ​ສຶກ​ສາທະ​ການ - ກິ​ລາ  ແລະ ກຳ​ມະ​ການ​ຝ່າຍ​ຕ່າງໆຮັບ​ຊາບ.

        ທ່ານ ບົວລີ ພັນນາວົງ ບອກຕື່ມອີກວ່າ: ທາງດ້ານກຳ​ມະ​ການ​ເຕັກ​ນິກ-ຈັດ​ການ​ແຂ່ງ​ຂັນ ສຳ​ເລັດ​ການ​ກະ​ກຽມ​ນັກ​ກິ​ລາ, ຈັດຊື້​ເຄື່ອງ​ນຸ່ງ​ນັກ​ກິ​ລາ​ແຕ່​ລະ​ປະ​ເພດ ​ແລະ ອຸປະກອນ​ຕ່າງໆ​ຮັບ​ໃຊ້​ໃນການ​ແຂ່ງຂັນ​ກິລາແຕ່ລະ​ປະ​ເພດ, ຈັດພິມປື້ມລະບຽບການແຂ່ງຂັນກິລາແຕ່ລະປະເພດ,ຈັດ​ຊື້ລະບົບ​ໄອ​ທີ​​ແບບ​ອອນ​ລາຍ, ຊື້​ພາ​ຫະ​ນະຮັບໃຊ້ຈຳນວນ 1 ຄັນ, ການ​ຝຶກ​ແອບ ນາງ​ສາວມອບ​ຫຼຽນ​ສໍາເລັດ 95%,ກຳມະການພິທີການ ແລະ ຕ້ອນຮັບແຂກ:  ສໍາເລັດການກະກຽມດ້ານໂຮງແຮມ, ບ້ານພັກ, ຣີສອດ, ຮ້ານອາຫານ, ສະບຽງອາຫານ ຮັບຕ້ອນແຂກ, ການກໍານົດແຂກພາຍໃນ ແລະ ຕ່າງປະເທດທີ່ຈະເຊີນເຂົ້າຮ່ວມງານ ພ້ອມທັງພີ​ມບັດເຊີນສໍາເລັດ100%, ສຳເລັດການສ້າງແຜນວາດບ່ອນນັ່ງຂອງແຂກແຕ່ລະລະດັບ, ຈັດລາຍຊື່ແຂກແຕ່ລະລະດັບເຂົ້າພັກແຕ່ລະບ້ານພັກ - ໂຮງແຮມ, ກຳ​ມະ​ການ​ເປີດ - ປິດ ສຳເລັດການ​ກໍານົດ​ວິທີ​ແຫ່​ທວນ​ໄຟ, ແຫ່​ໄຫ​ຫີນ, ຂໍ​ໄຟ​ສັກສິດ, ວິທີ​ຈູດ​ທວນ​ໄຟສໍາເລັດ 100%; ການ​ຝຶກ​ແອບ​ນັກສະ​ແດງ, ການ​ສວນສະໜາມ, ສຳ​ເລັດ​ການ​ຈັດ​ຊື້​ເຄື່ອງ​ໄຟ ແສງ - ສີ -ສຽງ, ເຄື່ອງ​ນຸ່ງ ແລະ ອຸ​ປະ​ກອນ​ຕ່າງໆ ຮັບ​ໃຊ້​ການ​ສະ​ແດງ ແລະ ສວນສະໜາມ, ກໍາມະການໂຄສະນາ- ຂ່າວສານ: ສໍາເລັດການລົງໂຄສະນາປະຖະກະຖາໃຫ້ມວນຊົນໃນທົ່ວແຂວງ, ວາງທິມງານກະ ກຽມ​ໂຄສະນາ - ຂ່າວສານ, ​ຖ່າຍ​ທອດ​ສົດ​ໂທລະພາບ, ວິທະຍຸ​, ໜັງສືພິມ, ສັງຄົມ​ອອນ​ລາຍ, ການວາງສະ​ແດງ​ຮູບ​ພາບ.

      ສ່ວນກຳມະການ ປກສ - ປກຊ :ແມ່ນໄດ້ຈັດການຝຶກແອບ ແລະ ວາງກໍາລັງເປັນລະບົບ​ທັງວົງນອກ ແລະ ວົງໃນມີ​ຄວາມ​ພ້ອມ 100%, ກຳ​ມະ​ການ​ເສດ​ຖະ​ກິດ - ລ​ະ​ດົມ​ທຶນ ສຳ​ເລັດການຈ່າຍເງິນໃຫ້ແຕ່ລະກຳມະການຕາມການຕົກລົງຂອງປະທານ ແລະ ກຳມະການ, ສຳເລັດການ​ປະມູນຈັດ​ຕະຫຼາດນັດ ​ແລະ ການ​ຝາກ​ລົດ​ 100%ເຮັດ​ສັນຍາ​​ຄວາມ​ຕ້ອງການ​ວັດຖຸ​ອຸປະກອນ​ຕ່າງໆ ທີ່​ບໍລິສັດ​ເບຍ​ລາວ​ເປັນ​ຜູ້​ອຸປະຖໍາ​ຫຼັກ​ໃນ​ຈໍາ​ນວນ​ເງິນ 1,5 ຕື້​ ກີບ​ໃຫ້​ແກ່​ງານ​ຄັ້ງ​ນີ້​ສໍາ​ເລັດ100%,ການ​ຕິດ​ປ້າຍ​ໂຄສະນາ​ຕ່າງໆ​ຂອງ​ບໍລິສັດ​ເບຍ​ລາວ​ທີ່ອຸປະຖໍາສໍາເລັດ 90%, ກຳ​ມະ​ການ​ຝ່າຍ​ຂົນ​ສົ່ງ ສຳ​ເລັດການຈັດ​ການ​ປະມູນ​ລົດ​ຮັບ​ໃຊ້ ​ແລະ ສະຕິ​ກ​ເກີຕິ​ດລົດ​ຂອງ​ກໍາມະການ​ຝ່າຍ​ຂົນ​ສົ່ງ​ສໍາ​ເລັດ 100%, ກຳມະການທີ່ພັກ ແລະ ອາຫານ : ສຳເລັດການຈັດທີ່ພັກຂອງນັກກິລາ,ຄູຝຶກ, ລົງຊຸກຍູ້ຂະບວນການຜະລິດສະບຽງອາຫານ ໂດຍສະເພາະການປູກ-ການລ້ຽງ, ສຳເລັດການຈັດຊື້ອຸປະກອນຮັບໃຊ້ທີ່ພັກນັກກິລາ ແລະ ອຸປະກອນອານາໄມ ແລະ ປະດັບປະດາຕົວເມືອງ,ການ​ແຈກ​ຢາຍ​ເຄື່ອງ​ບ່ອນນອນ​ໄປ​ທີ່​ພັກ​ນັກ​ກິ​ລາ​ໄດ້ 13 ແຫ່ງ ປະ​ຈຸ​ບັນ​ໄດ້​ຂົນ​ກັບ​ຄື​ມາ​ມ້ຽນ​ສາງ​ສຳ​ເລັດ​ແລ້ວ,  ການກໍ່​ສ້າງພື້ນຖານ​ໂຄງ​ລ່າງຮັບ​ໃຊ້​ການ​ແຂ່ງຂັນ​ກິ​ລາ ​ແຕ່ລະ​ປະ​ເພດ ​ແມ່ນ​ສໍາ​ເລັດ  98%; ການ​ສ້ອມ​ແປງສະຖານ​ທີ່​ພັກຂ​ອງນັກ​ກິລາ ​ແລະ ຄູ​ຝຶກ​ ​ແມ່ນ​ສໍາ​ເລັດ 100 %,ກໍ່​ສ້າງເສັ້ນທາງ, ລະບົບ​ໄຟຟ້າ, ​ໄຟ​ເຍືອງ​ທາງ, ລະ​ບົບນໍ້າສໍາເລັດ 100%.ສະ​ໜາມ​ກິ​ລາ​ທົ່ງ​ໄຫ​ຫີນ (ສະ​ໜາມ ເປີດ - ປິດ ) ໄດ້​ມີ​ການມອບ - ຮັບ ​ຊົ່ວ​ຄາວ​ແລ້ວ ແລະ ກໍາມະການການ​ແພດສຳ​ເລັດການຈັດ​ຊື້​ອຸປະກອນ ​ແລະ​ ຢາ​ຮັບ​ໃຊ້​​ສໍາ​ເລັດ 100%, ຝຶກອົບຮົມ ແລະ ກໍານົດສູນບັນຊາ, ລົດຮັບໃຊ້ຄົນເຈັບ, ແພດປະຈໍາສະໜາມ,ປະຈໍາທີ່ພັກຂອງນັກກີລາ,ຄູຝຶກ,ໂຮງແຮມ,ບ້ານພັກສໍາເລັດ 95%.ຮ່ວມກັບອົງການກາແດງລາວລົງໂຄສະນາການບໍລິຈາກເລືອດເພື່ອກະກຽມຮັບໃຊ້ງານໄດ້ຈຳນວນ 176 ຖົງ, ຝຶກອົບຮົມເລື່ອງຄວາມປອດໄພດ້ານອາຫານໃຫ້ແຕ່ລະພາກສ່ວນກ່ຽວຂ້ອງ,ລົງກວດກາສານປົນເປື້້ອນໃນອາຫານ,ກວດ ກາໂຮງງານນ້ຳດື່ມ ແລະ ບ່ອນຜະລິດນ້ຳກ້ອນ ແລະ ຮ້ານອາຫານ,ຮ້ານກິນດື່ມ ພາຍໃນເທດສະບານແຂວງ, ກຳມະການເຍົາວະຊົນ: ສຳເລັດກອງປະຊຸມປຶກສາຫາລືການເຮັດວຽກຮ່ວມກັນລະຫວ່າງສູນກາງ ແລະ ທ້ອງຖິ່ນ,ລົງຄັດເລືອກເຍົາວະຊົນ7 ເມືອງ,ຝຶກຊ້ອມກອງດູລີຍາງໃກ້ນ້ອງນ້ອຍເຍົາວະຊົນ,

      ຂະນະທີ່ ທາງດ້ານງົບປະມານ ງົບປະມານ​ບໍລິ​ຫານຈັດ​ງານ​ຮັບ​ໃຊ້ 11 ກໍາມະການ ​ແລະ 43 ອະນຸ​ກໍາມະການ​ທີ່ລັດຖະບານອະ​ນຸ​ມັດ​ທັງໝົດຈໍານວນ 47,330,200,000​ ກິບ ​ໃນ​ນີ້​ກະ​ຊວງ​ກາ​ນ​ເງິ​ນ ແລະ ກະ​ຊວງ​ສຶກ​ສາໄດ້​ໂອນ​ມາ​ໃຫ້​​ຄັງ​ເງິນ​ແຫ່ງ​ຊາດ​ປະ​ຈຳ​ແຂວງ​ຊຽງ​ຂວາງທັງ​ໝົດ​ແລ້ວ , ​ການ​ໃຊ້​ຈ່າຍຜ່ານ​ມາ​ທີ່​ມີ​ຂໍ້​ຕົກ​ລົງ​​ອະ​ນຸ​ມັດ​ຈ່າຍ​ຈາກ​ເຈົ້າ​ແຂວງ​, ປະ​ທານ​ຈັດ​ງານ​​ຈຳ​ນວນ 25,585,411,242 ກີບ ກວມ 54,05 % ຍັງ​ເຫຼືອ 21,744,788,758 ກີບ ເທົ່າກັບ 45,94%, ຮ່ວງ​ງົບປະມານ​ຮັບ​ໃຊ້ ການ​ສ້ອມ​ແປງ​ສະຖານ​ທີ່​ພັກ​ຂອງ​ນັກ​ກິລາ ​ແລະ ຄູ​ຝຶກ​ 27 ​ແຫ່ງ, ສະຖານ​ທີ່​ຮັບ​ໃຊ້​ການແຂ່ງຂັນ​ກິລາ​ປະ​ເພດ​ຕ່າງໆ 11 ​ແຫ່ງ ລວມ 38 ​ແຫ່ງ ​ແບ່ງ​ເປັນ 19 ພູດເປັນ​ງົບປະມານ​ທັງ​ໝົດ 9,210,438,000 ກີບທີ່​ໄດ້​ຈ່າຍ​ໄປ​ແລ້ວ 9,197,487,586 ກີບ ຍັງເຫຼືອ 12,950,414 ກີບ, ຮ່ວງເງິນລະດົມທຶນໄດ້ທັງໝົດ 3.412.517.000 ກີບ,ຈ່າຍໄປແລ້ວ 3.085.573 200 ກີບ, ຍັງເຫຼືອຕົວຈິງ  326.943.800 ກີບ. ຂະນະທີ່ ແຜນ​ໃນ​ຕໍ່ໜ້າ ຈະສືບ​ຕໍ່​ປົກ​ປັກ​ຮັກສາ​ພື້ນຖານ​ໂຄງ​ລ່າງ​ບັນດາ​ສະໜາມ, ທີ່ພັກ​ຕ່າງໆທີ່ໄດ້ກໍ່ສ້າງສ້ອມແປງໄປແລ້ວ  ​ແລະ ສິ່ງເອື້ອອຳນວຍຄວາມສະດວກໃນຕົວເມືອງ ແລະ ສະໜາມເປີດ - ປິດ, ນຳສະ​ເໜີ​ປະ​ທານຈັດງານ​​ຂໍເບີກ​ຈ່າຍ​ເງິນ​ຂອງກໍາມະການເປີດ - ປິດ ​ທີ່​ໄດ້​ປະຕິບັດ​ສໍາ​ເລັດ​ໄປ​ແລ້ວ​ນັ້ນ ​ຄື: ການ​ຈັດ​ຊື້-ຈັດ​ຈ້າງ ເຄື່ອງ​ໄຟ ແສງ-ສີ-ສຽງ , ເຄື່ອງ​ນຸ່ງ​ນັກ​ສະ​ແດງ ເຊິ່ງ​ໄລ​ຍະ​ຜ່ານ​ມາ​ແມ່ນ​ກຳ​ມະ​ການ​ບໍ່​ສົ່ງ​ຕົວ​ເລກ​ເຂົ້າ​ໄປ​ສັງ​ລວມ​ແຜນ​ຈ່າຍ​ຢູ່​ທ້ອງ​ຖິ່ນ, ສືບ​ຕໍ່​ສ້າງ​ແຜນ​ງົບປະມານບໍລິຫານ​ຂອງ​ແຕ່​ລະ​ກໍາມະການ​ ທີ່​ໄດ້​ໃຊ້​ຈ່າຍ​ຜ່ານ​ມາ​​ແລ້ວເພື່ອ​ສະ​ເໜີຂໍ​ງົບປະ ມານ​ນໍາ​ລັດຖະບານຕື່ມ​ອີກ​ທົດ​ແທ​ນ​ຮ່ວງທີ່ໄດ້ໃຊ້ຈ່າຍໄປແລ້ວໃນ​ສິ່ງ​ທີ່​ຈຳ​ເປັນ, ສືບ​ຕໍ່​ຄຸ້ມ​ຄອງ​​ເຄື່ອງ, ວັດຖຸ​ອຸປະກອນ​ຕ່າງໆ​ທີ່​ໄດ້​ດໍາ​ເນີນ​ການຈັດ​ຊື້​ໄປ​ແລ້ວ​ນັ້ນ​​ຢູ່​ໃນ​ສາງ, ​ຮັບປະກັນ​ບໍ່​ໃຫ້​ຕົກ​ເຮ່ຍ​ເສຍ​ຫາຍ ​ແລະ ສາມາດ​ນໍາ​ໃຊ້​​ເຂົ້າ​ໃນ​ງານ​ດັ່ງກ່າວໄດ້, ສືບ​ຕໍ່ປັບ​ປຸງ​ຂໍ້​ຕົກ​ລົງ​ຄະ​ນະ​ຮັບ​ຜິດ​ຊອບແຕ່​ລະ​ພາກ​ສ່ວນ ແລະ ​ປັບ​ປຸງ​ແຜນ​ດຳ​ເນີນ​ງານ, ເອ​ກະ​ສານ​ນິ​ຕິ​ກຳ​ຕ່າງໆ​ທີ່​ມີ​ການ​ຄາດ​ເຄື່ອນ ແລະ ບໍ່​ເໝາະ​ສົມຄືນ​ໃໝ່ ແລະ ໃນຕອນທ້າຍທ່ານຫົວໜ້າພະແນກສຶກສາທິການ ແລະ ກິລາ ແຂວງຊຽງຂວາງ ກໍຍັງສະ​ເໜີ ຈັດ​ກອງ​ປະ​ຊຸມ​ຮ່ວມ​ກັບ​ຄະ​ນະ​ລະ​ດັບ​ຊາດ​ ​ເພື່ອກໍານົດ​ວັນ​ເວລາ​ຈັດ​ງານ​ມະຫາ​ກໍາ​ກິລາ​ແຫ່ງ​ຊາດ ຄັ້ງ​ທີ XI ສະ​ເໜີ​ຕໍ່​ລັດຖະບານ​ໃນ​ເວລາ​ອັນ​ຄວນ.               ​

ໂດຍ: ປາກກາຄຳ