ລາຍລະອຽດຂ່າວ
ຈະກັບມາຄືກຄັກອີກຄັ້ງໄວໆນີ້ ດອກປີກໄກ່ ເບຍລາວ ໂອເພັນ 2020 ຊີງຂັນປະທານສະພາແຫ່ງຊາດ ຄັ້ງທີ 20  
ຂຽນເມື່ອ: 01/08/2020 13:08 | ໂດຍ: ເພຣເມັກເກີ | ອ່ານ: 284 ຄັ້ງ

           ຫຼັງຈາກຫ່າງຫາຍໄປໃນໄລຍະໜຶ່ງ ຍ້ອນການປ້ອງກັນເຊື້ອພະຍາດໂຄວິດ-19 ການແຂ່ງຂັນກິລາດອກປີກໄກ່ ທົ່ວປະເທດ ຊີງໄຊ ຈຳນວນ 13 ຮຸ່ນ ຊີງຂັນທ່ານປະທານສະພາແຫ່ງຊາດ ຄັ້ງທີ 20 ປະຈຳປີ 2020 ຫຼື ລາຍການ BeerLao Open 2020 Coming soon ຈະກັບມາເປີດສາກລະເບີດຄວາມມັນແຂ່ງຂັນອີກຄັ້ງ ລະຫວ່າງວັນທີ 20-23 ສິງຫານີ້ ເພື່ອສ້າງຂະບວນການຂໍ່ານັບຮັບຕ້ອນວັນລັດຖະທຳມະນູນແຫ່ຊາດ (23 ສິງຫາ 2020).

          ຕາມການລາຍງານຂອງ ທ່ານ ສົມສະແຫວງ ແສງສີລາວົງ ຮອງປະທານ ແລະ ເລຂາທິການສະຫະພັນດອກປີກໄກ່ແຫ່ງຊາດລາວ ແຈ້ງໃຫ້ຊາບວ່າ: ປັດຈຸບັນໄດ້ເຮັດໃບສະເໜີຫາຂັ້ນເທິງກະຊວງສຶກສາທິການ ແລະ ກິລາ ເປັນທີ່ຮຽບຮ້ອຍແລ້ວ ເພື່ອຂໍອານຸມັດໃຫ້ສະຫະພັນດອກປີກໄກ່ແຫ່ງຊາດ ສືບຕໍ່ຈັດການແຂ່ງຂັນກິລາດອກປີກໄກ່ ລາຍການ ທົ່ວປະເທດ  ຊີງຂັນທ່ານປະທານສະພາແຫ່ງຊາດ ຄັ້ງທີ 20 ປະຈຳປີ 2020 ຫຼື ລາຍການ ເບຍລາວ ໂອເພັນ 2020 ເພື່ອເປັນການສ້າງຂະບວນການຂໍ່ານັບຮັບຕ້ອນວັນລັດຖະທຳມະນູນແຫ່ງຊາດ (23 ສິງຫາ 2020) ພ້ອມທັງເປັນການສືບຕໍ່ສົ່ງເສີມນັກກິລາດອກປີກໄກ່ຮຸ່ນສືບທອດ ກ້າວສູ່ທີມຊາດ ໂດຍແຜນຫ້າງຫາກະກຽມເບື້ອງຕົ້ນ ແມ່ນຈະຈັດໃນລະຫວ່າງວັນທີ 20-23 ສິງຫານີ້ ສ່ວນສະຖານທີ່ ກຳນົດຈະແຂ່ງຂັນທີ່ສະໂມສອນໃດນັ້ນ ຍັງບໍ່ທັນຊັດເຈນເທື່ອ ເພາະມີຫຼາຍສະໂມສອນໃນນະຄອນຫຼວງງວຽງຈັນ ທີ່ໄດ້ມາດຕະຖານມີຫຼາຍພາກສ່ວນ ສະນັ້ນ ຈະຂໍແຈ້ງໃຫ້ທ່ານຊາບຕາມພາຍຫຼັງຕື່ມອີກ ສຳລັບກົດລະບຽບການແຂ່ງຂັນລາຍການນີ້ ນັກກິລາຕ້ອງຢູ່ໃນເກນອາຍຸທີ່ກຳນົດໄວ້ເທົ່ານັ້ນ ຈຶ່ງຈະສາມາດລົງສະໝັກຮ່ວມແຂ່ງຂັນໄດ້ (ຫຼັກຖານຢັ້ງຢືນໃນການສະໝັກ ຄື ບັດປະຈຳຕົວ ແລະ ໜັງສືເດີນທາງ), ດອກປີກໄກ່ທີ່ນຳໃຊ້ເຂົ້າໃນການແຂ່ງຂັນແມ່ນ ຂອງ ຈີເອັກເອັດ ບັ້ງສີຂຽວ ສະປິດ 76, ລາຍການດັ່ງກ່າວຖ້າຫາກແຕ່ລະລາຍການມີນັກກິລາສະໝັກບໍ່ຮອດ 8 ຄູ່ຕໍ່ຄົນແມ່ນຈະບໍ່ຈັດການແຂ່ງຂັນ ແລະ ຖ້າຫາກຮອດ 16 ຄູ່ຕໍ່ຄົນ ແມ່ນຈະຫຼຸດເງິນລາງວັນເຄິ່ງໜຶ່ງຂອງລາຍການ.​

          ສຳລັບເງື່ອນໄຂນັກກິລາ ປະເພດດ່ຽວເຍົາວະຊົນຮຸ່ນອາຍຸບໍ່ເກີນ 14 ປີ ຍິງ-ຊາຍ ຕ້ອງເກີດວັນທີ 1 ສິງຫາ 2006 ຈຶ່ງເຂົ້າຮ່ວມແຂ່ງຂັນໄດ້, ສ່ວນປະເພດດ່ຽວເຍົາວະຊົນຊາຍ-ຍິງ ຮຸ່ນ 17 ປີ ຕ້ອງເກີດວັນທີ 1 ສິງຫາ 2003, ປະເພດຄູ່ ຕ້ອງເກີດວັນທີ 1 ສິງຫາ 2003, ຄູ່ສະໝັກຫຼິ້ນຍິງ-ຊາຍ ອາຍຸ 17-45 ປີ ທີ່ບໍ່ແມ່ນນັກກິລາທີມຊາດ ແລະ ບໍ່ໄດ້ຮັບລາງວັນຕາມລຳດັບ ທີ 1,​ ທີ 2 ແລະ ທີ 3 ໃນການແຂ່ງຂັນລາຍການນີ້ ໃນຄັ້ງທີ່ຜ່ານມາ, ປະເພດດ່ຽວຍິງ-ຊາຍ ທົ່ວໄປ ບໍ່ຈຳກັດອາຍຸ ແລະ ນັກກິລາທີມຊາດ ສາມາດລົງແຂ່ງຂັນໄດ້ ແລະ ປະເພດຄູ່ຊາຍທົ່ວໄປ,​ ຄູ່ຍິງທົ່ວໄປ ແລະ ຄູ່ປະສົມ ແມ່ນບໍ່ຈຳກັດອາຍຸ ແລະ ນັກກິລາທີມຊາດ ສາມາດລົງແຂ່ງຂັນໄດ້ ນັກກິລາ 1 ຄົນ ສາມາດລົງແຂ່ງຂັນໄດ້ສູງສຸດ 2 ລາຍການ ແລະ ສາມາດຂ້າມຮຸ່ນໄດ້.

 ໂດຍ ປາກກາຄຳ




ຂ່າວລ່າສຸດ