ລາຍລະອຽດຂ່າວ
ລົດແກ້ວ ກັບບາດກ້າວ ປັ້ນນັກແລ່ນປອດເຫຼັກ
ຂຽນເມື່ອ: 22/05/2020 11:05 | ໂດຍ: ເພຣເມັກເກີ | ອ່ານ: 36 ຄັ້ງ

       ນັກແລ່ນ ຊື່ດັງໃນວົງການແລ່ນໄລຍະໄກລະດັບອາຊຽນ ລົດແກ້ວ ອິນທະກຸມມານ  ເຈົ້າຂອງຫຼຽນທອງປະຫວັດສາດຍິງລາວຄົນທຳອິດ ໃນງານມະຫະກຳກິລາຊີເກມ ຄັ້ງທີ 29 ທີ່ນະຄອນກົວລາລຳເປີ ປະເທດມາເລເຊຍ ແລະ 2 ຫຼຽນຄຳ ອຸດົມໄຊ ເກມ ເມື່ອປີ 2014 ພ້ອມຈະນຳໃຊ້ປະສົບການ ແລະ ບົດບາດທີ່ສ້າງຊື່ສຽງກວາດແຊ໋ມຢ່າງຫຼວງຫຼາຍຕະຫຼອດໄລຍະຫຼາຍປີຜ່ານມາ ຖ່າຍທອດຄວາມຮູ້ຄວາມສາມາດໃຫ້ແກ່ນັກກິລາເຍົາວະຊົນ ແລະ ຊາວໜຸ່ມໃນຮຸ່ນສືບທອດ ຫວັງປັ້ນເຂົາເຈົ້າກາຍເປັນນັກກິລາລະດັບຊາດ ແນໃສ່ສ້າງຜົນງານໃຫ້ແກ່ປະເທດໃນອະນາຄົດ.

      ຕາມການໃຫ້ສຳພາດຂອງ ລົດແກ້ວ ໃຫ້ຊາບວ່າ: ໂຄງການສ້າງຝັນ ສົ່ງເສີມນ້ອງໆເຍົາວະຊົນ ແລະ ຊາວໜຸ່ມ ເພື່ອກ້າວສູ່ການເປັນນັກກິລາແລ່ນລະດັບຊາດ ເພື່ອຮັບປະກັນສາມາດສ້າງຜົນງານໃຫ້ໄດ້ຄືກັບນ້ອງໄດ້ສ້າງຜົນງານທີ່ຜ່ານມາ ແມ່ນໄດ້ເລີ່ມໂຄງການມາແຕ່ເດືອນກັນຍາ ປີ 2018 ຜ່ານມາ ນັບມາຮອດປັດຈຸບັນມີນ້ອງໆນັກກິລາເຂົ້າຮ່ວມໂຄງການທັງໝົດ 20 ກວ່າຄົນ ໂດຍໂຄງການດັ່ງກ່າວ ແມ່ນສອນຟຣີ ບໍ່ມີການຄິດໄລ່ຄ່າບໍລິການແຕ່ຢ່າງໃດ, ໃນນັ້ນ ມີນັກກິລາຈາກໂຮງຮຽນສາມັນສຶກສາ ປະກອບມີ ມສ ລາວ-ຫວຽດ, ມສ ຮຸ່ງເຮື່ອງ, ມສ ສົດທະຈິດ, ມສ ເພຍວັດ, ມສ ຫງຽນຢູ, ມະຫາວິທະຍາໄລແຫ່ງຊາດ (ມຊ), ວິທະຍາໄລພະລະສຶກສາ ແລະ ສະຖາປັດ ມຊ ຕາມການຕິດຕາມ ແລະ ປະເມີນຜົນຂອງນັກກິລາທຸກໆຄົນແມ່ນມີຄວາມຕັ້ງໃຈ ແລະ ເອົາໃຈໃສ່ຝຶກຝົນຫຼໍ່ຫຼອມເຂົ້າໃນການຝຶກຊ້ອມຢ່າງເອົາຈິງເອົາຈັງ ມື້ໜຶ່ງຊ້ອມແລ່ນ 6 ກິໂລແມັດ ແລະ 21 ກິໂລແມັດ ທີ່ສະໜາມກິລາເຈົ້າອານຸວົງ ເປັນຫຼັກ.

      ລົດແກ້ວ  ບອກຕື່ມອີກວ່າ: ຜ່ານການຝຶກຊ້ອມຕະຫຼອດໄລຍະຜ່ານມາ ກໍສາມາດສັງເກດເຫັນວ່າມີນັກກິລາບາງຈຳນວນ ມີທ່າແຮງທີ່ໂດດເດັ່ນ ແລະ ມີການພັດທະນາໄປໄກຫຼາຍສາມາດກ້າວຂຶ້ນມາທົດແທນນ້ອງໃນຕໍ່ໜ້າໄດ້. ເຖິງຢ່າງໃດກໍດີ, ໃນໄລຍະພັກການເຄື່ອນໄຫວ ນ້ອງຈະໃຊ້ຄວາມສາມາດ ແລະ ປະສົບການທີ່ເຄີຍຜ່ານຜ່າ ມາຝຶກຝົນຫຼໍ່ຫຼອມຕົນເອງໃຫ້ມີການພັດທະນາທີ່ດີ ເປົ້າໝາຍແມ່ນກະກຽມເຂົ້າຮ່ວມແຂ່ງຂັນລາຍການຊີງແຊ໋ມນາໆຊາດ ທີ່ຈະຈັດຂຶ້ນໃນຕໍ່ໜ້ານີ້ ແລະ ສິ່ງສຳຄັນທີ່ສຸດໃນຊີວິດແຫ່ງການລໍຄ່ອຍ ທີ່ຢາກຈະສ້າງຜົນງານຄວ້າຫຼຽນຄຳຄັ້ງປະຫວັດສາດໃຫ້ແກ່ປະເທດຊາດ ໃນງານມະຫະກຳກິລາຊີເກມ ຄັ້ງທີ 31 ທີ່ສສ ຫວຽດນາມ ຮັບກຽດເປັນເຈົ້າພາບ ໃນປີ 2021.

       ນາງ ລົດແກ້ວ ອິນທະກຸມມານ ເລີ່ມຫຼິ້ນກິລາແລ່ນ-ລານມາແຕ່ອາຍຸ 15 ປີ ເລີ່ມແຕ່ປີ 2010 ຄວ້າ 1 ຫຼຽນເງິນຈາກການແລ່ນ 1,500 ແມັດ ແລະ 1 ຫຼຽນທອງ ຈາກລາຍການເຕັ້ນສູງ ທີ່ງານກິລານັກຮຽນ ທົ່ວແຂວງຈໍາປາສັກຄັ້ງທີ 9 ເມື່ອປີ 2011, ໄດ້ເຂົ້າຮ່ວມແຂ່ງຂັນກິລາມັດທະຍົມສຶກສາທົ່ວປະເທດທີ່ແຂວງສະຫວັນນະເຂດ ສາມາດຄວ້າໄດ້ 1 ຫຼຽນຄໍາຈາກການແລ່ນ 1500 ແມັດ, 1 ຫຼຽນຄໍາຈາກການແລ່ນ 3,000 ແມັດ ແລະ 1 ຫຼຽນເງິນຈາກລາຍການ 5,000 ແມັດ ທ້າຍປີດຽວກັນໄດ້ເຂົ້າຮ່ວມກິລາແຫ່ງຊາດຄັ້ງທີ 9 ທີ່ແຂວງຫຼວງພະບາງ ໄດ້ 2 ຫຼຽນທອງແດງຈາກການແລ່ນ 1500 ແລະ 5000 ແມັດ. ປີ 2012 ໄດ້ເຂົ້າຮ່ວມການແຂ່ງຂັນກິລາ ວັນຄົບຮອບກິລາລາວທີ່ແຂວງຄໍາມ່ວນ ໄດ້ 2 ຫຼຽນຄໍາ ຈາກການແລ່ນ 1,500 & 3,000 ແມັດ. ພ້ອມກັນນັ້ນ, ທ້າຍປີ 2012 ກໍ່ໄດ້ເຂົ້າຮ່ວມແຂ່ງຂັນກິລາມະຫາໄລອາຊຽນຄັ້ງທີ 16, ສາມາດຍາດໄດ້ 1 ຫຼຽນທອງ ຈາກການແລ່ນ 10,000ແມັດ, ກາງປີ 2013 ໄດ້ເຂົ້າຮ່ວມແຂ່ງຂັນຊິງແຊ໋ມອາຊີ ທີ່ປະເທດອິນເດຍ ແລ່ນລາຍການ 800 ແມັດ ເຂົ້າຮອບຄັດເລືອກ ທ້າຍປີ 2013 ເຂົ້າຮ່ວມແຂ່ງຂັນກິລາຊີເກມຄັ້ງທີ 27 ທີ່ປະເທດມຽນມາ ໄດ້ຫຼຽນທອງ ຈາກລາຍການແລ່ນ 10,000 ແມັດ. ມາຮອດປີ 2014 ເຂົ້າຮ່ວມແຂ່ງຂັນກິລາເອຊຽນເກມທີ່ ອິນຊອນ ສ. ເກົາຫຼີ ແລະ ງານກິລາແຫ່ງຊາດຄັ້ງທີ 10 ທີ່ແຂວງອຸດົມໄຊ ໄດ້ 2 ຫຼຽນຄໍາ ຈາກລາຍການແລ່ນ 1500 ແລະ 3000 ແມັດ, ພ້ອມເຂົ້າຮ່ວມແຂ່ງຂັນກິລາມະຫາວິທະຍາໄລອາຊຽນຄັ້ງທີ 17 ທີ່ປາແລມບັງ, ອິນໂດເນເຊຍ, ໄດ້ 1 ຫຼຽນຄໍາ ( 10,000 ແມັດ), 1 ຫຼຽນເງິນ (5000 ແມັດ), 1 ຫຼຽນທອງ (1500 ແມັດ). ໃນເດືອນ ກໍລະກົດ 2016 ເຂົ້າຮ່ວມງານກິລາມະຫາວິທະຍາໄລອາຊຽນຄັ້ງທີ 18 ຢູ່ສິງກະໂປ, ໄດ້ 1 ຫຼຽນຄໍາ (ແລ່ນໄລຍະ 800 ແມັດ) ແລະ 1 ຫຼຽນເງິນ(ແລ່ນໄລຍະ 5000 ແມັດ) ປີ 2016 ເຂົ້າຮ່ວມແຂ່ງຂັນກິລາມະຫາວິທະຍາໄລລາວຄັ້ງທີ 1 ທີ່ມະຫາວິທະຍາໄລແຫ່ງຊາດ, ໄດ້ 2 ຫຼຽນຄໍາ ຈາກລາຍການແລ່ນ 800 & 3000 ແມັດ . ເຂົ້າຮ່ວມແຂ່ງຂັນກິລາຊີເກມຄັ້ງທີ 29 ທີ່ປະເທດມາເລເຊຍ ສາມາດຍາດໄດ້ຫຼຽນທອງ ໃນລາຍການ ແລ່ນ 1500 ແມັດ, ໃນເດືອນສິງຫາ ປີ 2017 ທີ່ຜ່ານມານີ້.

      ນອກຈາກການສ້າງຜົນງານການແລ່ນຢູ່ໃນສະໜາມແລ້ວ ຍັງມີຜົນງານການແລ່ນນອກສະໜາມເຊັ່ນ: ເລີ່ມເຂົ້າຮ່ວມແຂ່ງຂັນງານ Tournament ຕ່າງໆ ນັບແຕ່ຕົ້ນປີ 2013 ເປັນຕົ້ນມາ ແລະ ລາຍການທີ່ເຂົ້າຮ່ວມສ່ວນຫຼາຍແມ່ນຢູ່ປະເທດໄທ, ໄດ້ແຊ້ມງານ Khonkaen International Marathon  ຄັ້ງທີ 12 ໃນປີ 2015, ລາຍການ 11,5 ກິໂລແມັດ,​ ແຊ້ມ ງານແລ່ນວຽງຈັນຄລັສິກ 2 ສະໄໝ (2016, 2017), ແລ່ນ 10 ກິໂລແມັດ, ແຊ້ມງານແລ່ນວຽງຈັນ ນາໆຊາດ ຮາຟມາລາທອນ ຄັ້ງທີ 2 Vientiane International Half Marathon 2017, ແລ່ນ 21 ກິໂລແມັດ ແລະ ຫຼ້າສຸດແມ່ນ ໄດ້ແຊັ້ມເປັນສະໄໝທີ 2 ຈາກງານແລ່ນ Burriram International Marathon 2018 (2017, 2018), ແລ່ນ 10 ກິໂລແມັດ ແລະ ຍັງມີຫຼາຍລາຍການທີ່ສາມາດສ້າງຜົນງານດີເດັ່ນໃນການແລ່ນຢູ່ນອກສະໜາມ ມີທັງພາຍໃນ ແລະ ຕ່າງປະເທດ.

ໂດຍ: ປາກກາດຳ