ລາຍລະອຽດຂ່າວ
ແປັກກີ້ ສາວຍອດນັກສູ້ ຫວນຄືນກິລາເທຄວັນໂດ
ຂຽນເມື່ອ: 22/05/2020 11:05 | ໂດຍ: ເພຣເມັກເກີ | ອ່ານ: 189 ຄັ້ງ

  ນາງ ມາລາ ຈັນທະລັກສາ ຫຼື ສາວແປັກກີ້ ຄວາມສາມາດຫຼິ້ນໄດ້ຫຼາຍໆປະເພດກິລາ ຜູ້ສ້າງຜົນງານກວາດແຊ໋ມລາຍການຕ່າງໆທັງພາຍໃນ ແລະ ຕ່າງປະເທດ ເຈົ້າຂອງຫຼຽນຄຳ ກິລາ ໂວວີນາມ ງານມະຫະກຳກິລາຊີເກມ ຄັ້ງທີ 27 ທີ່ປະເທດມຽນມາ ຫຼ້າສຸດຫັນຈາກກິລາດັ່ງກ່າວ ຫວນຄືນຫຼິ້ນກິລາເທຄວັນໂດ ຫວັງຈະສ້າງຜົນງານລ່າຫຼຽນຄຳ ໃຫ້ກະຊວງພະລັງງານ ແລະ ບໍ່ແຮ່ ໃນງານມະຫາກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ຮັບກຽດເປັນເຈົ້າພາບ.

   ສາວ ແປັກກີ້ ໃຫ້ສຳພາດວ່າ: ເສັ້ນທາງໃນການເປັນນັກກິລາເລີ່ມຕົ້ນແມ່ນນ້ອງໄດ້ໄປຫຼິ້ນກິລາເທຄວັນໂດ ກັບທີມມະຫາວິທະຍາໄລແຫ່ງຊາດ ພ້ອມທັງເຄີຍຍາດໄດ້ຫຼຽນຄໍາ ໃນງານມະຫາວິທະຍາໄລລາວ ຄັ້ງທໍາອິດ ໃນປີ 2013 ກ່ອນທີ່ຈະແຈ້ງເກີດໃຫ້ກິລາ ໂວວິນາມ ແລະ ທ່ານ ອາຈານ ວຽງສຸກ ກໍໄດ້ຮຽກຕົວໃຫ້ມາຫຼິ້ນກິລາໂວວິນາມ ຕັ້ງແຕ່ນັ້ນມາ ກໍເລີຍມັກ ແລະ ໄດ້ເຂົ້າຮ່ວມແຂ່ງຂັນຫຼາຍງານ ສາມາດຍາດໄດ້ຫຼຽນລາງວັນຫຼາຍລາຍການ ໂດຍສະເພາະແມ່ນຫຼຽນຄໍາງານມະຫະກຳກິລາ ຊີເກມ ຄັ້ງທີ 27 ປີ 2013 ທີ່ປະເທດມຽນມາ ປັດຈຸບັນ ນ້ອງກະຊ້ອມເບົາໆ ເນື່ອງຈາກໄດ້ຮັບບາດເຈັບຫົວເຂົ່າ ໃນຊີເກມ 2019 ທີ່ຜ່ານ ຫຼັງຈາກທີ່ໃນປີນີ້ໄດ້ກັບມາຊ້ອມໜັກ ເຮັດໃຫ້ກັບມາເຈັບອີກຄັ້ງ ສໍາລັບ ກີລາແຫ່ງຊາດຄັ້ງທີ 11 ທີ່ແຂວງຊຽງຂວາງ ນ້ອງແມ່ນຈະໄດ້ລົງແຂ່ງຂັນໃນປະເພດກິລາເທຄວັນໂດ ໃຫ້ກັບກະຊວງພະລັງງານ ແລະ ບໍ່ແຮ່ ແນ່ນອນປັດຈຸບັນກໍໄດ້ຊ້ອມຢ່າງເປັນປົກກະຕິ ເພື່ອຄວາມຫວັງລ່າຫຼຽນຄຳ ໃຫ້ບັນລຸເປົ້າໝາຍທີ່ວາງໄວ້ ເນື່ອງຈາກງານກິລາແຫ່ງຊາດ ອຸດົມໄຊ ເກມ 2014 ພາດໂອກາດໄປຢ່າງໜ້າເສຍດ່າຍ ໃນຄັ້ງນັ້ນຕົນເອງບໍ່ສະບາຍ ຈິ່ງບໍ່ສາມາດລົງແຂ່ງຂັນໄດ້.   

ສໍາລັບ ສາວແປັກກີ້ ເລີ່ມເປັນທີ່ຮູ້ຈັກກັນໃນວົງການກິລາລາວ ຫຼັງຍາດໄດ້ຫຼຽນທອງ ໃນລາຍການວໍວິນາມຊີງແຊ໋ມອາຊຽນ ລະຫວ່າງວັນ 7-12 ສິງຫາ 2018 ທີ່ປະເທດມຽນມາ ກ່ອນທີ່ ໃນລາຍການຊີງແຊ໋ມອາຊີ ລາຍການ There are 18 countries for 4th AVF Vovinam Championship 2018 in Bali-Indonesia ທີ່ເກາະບາຫຼີ ປະເທດອິນໂດເນເຊຍ ລະຫວ່າງວັນທີ 2-7 ພະຈິກ 2018 ສາມາດຍາດໄດ້ຫຼຽນຄໍາປະເພດຟ້ອນຄູ່ ໂດຍຟ້ອນຄູ່ກັບ ນາງ ພິກສະໄໝ ຈາກດາບຄູ່ຍິງ ຂະນະທີ່ ຜົນງານຫຼ້າສຸດໃນ ຊີເກມ 2019 ແມ່ນສາມາດຍາດໄດ້ 1 ຫຼຽນທອງ ຈາກກິລາຄິກບ໊ອກຊິງ.

    ແປັກກີ້ ເກີດເມື່ອວັນທີ 22 ກໍລະກົດ ປີ 1994 ທີ່ບ້ານຫ້ວຍຫົງ ເມື່ອຈັນທະບູລີ ນະຄອນຫຼວງວຽງຈັນ ປັດຈຸບັນເປັນນັກສຶກສາຢູ່ ວິທະຍາໄລ ລາວ-ອາເມຣິກາ ປີສຸດທ້າຍ ລວມທັງຍັງເປັນອາຈານສອນກິລາ ໂວວິນາມ ໂດຍສອນໃຫ້ກັບໂຮງຮຽນຕ່າງໆແບບບໍ່ມີຄ່າເມື່ອຍ ໂດຍສະເພາະສອນຢູ່ທີ່ໂຮງຮຽນ ມສ ວຽງຈັນ ໃນໄລຍະພັກແລ້ງ.

 ໂດຍ ປາກກາດຳ