ລາຍລະອຽດຂ່າວ
ທະນົງລິດ ຟິດເກືອບເຕັມ 100 ພ້ອມຖອມຕົວຫວັງສ້າງຜົນງານຫຼຽນໃດໜຶ່ງ ໃຫ້ເຈົ້າພາບ ໃນຊຽງຂວາງ ເກມ
ຂຽນເມື່ອ: 24/02/2020 14:02 | ໂດຍ: ເພຣເມັກເກີ | ອ່ານ: 471 ຄັ້ງ

       ທ້າວ ທະນົງລິດ ສີລິຜົນ ນັກກິລາຍິງທະນູ ລາວການ ຄອມປ່າວ ດ່ຽວຊາຍ ດີກຣີທະນູທີມຊາດ ເຈົ້າຂອງ 3 ຫຼຽນເງິນ ງານມະຫະກຳກິລາມະຫາວິທະຍາໄລລາວ ປີ 2012 ແລະ ເຈົ້າຂອງຫຼຽນເງິນ ລາຍການຊີງແຊ໋ມນາໆຊາດ ທີ່ນະຄອນ ຢາງກຸ້ງ ສາທາລະນະລັດ ສະຫະພາບ ມຽນມາ ເມື່ອປີ 2016 ປັດຈຸບັນໄດ້ເກັບຕົວຝຶກຊ້ອມຢູ່ທີ່ໂຮງຮຽນພອນສະຫວັນກິລາ-ກາຍະກຳ ແລະ ມີຄວາມພ້ອມເກືອບເຕັມຮ້ອຍແລ້ວ ພ້ອມທັງຖອມຕົວຫວັງສ້າງຜົນງານຄວ້າຫຼຽນໃດຫຼຽນໜຶ່ງໃຫ້ພໍ່ແມ່ປະຊາຊົນຊາວວິລະຊົນທົ່ງໄຫຫີນ ເຈົ້າພາບ ແຂວງຊຽງຂວາງ ໃນງານມະຫາກຳກິລາແຫ່ງຊາດ ຄັ້ງທີ Xl ຫຼື ຊຽງຂວາງ ເກມ ເຊິ່ງຈະເປີດສາກຂຶ້ນໃນວັນທີ 22 ມີນານີ້.

             ຕາມການໃຫ້ສຳພາດຂອງ ທ້າວ ທະນົງລິດ ສີລິຜົນ ບອກວ່າ: ປັດຈຸບັນນ້ອງໄດ້ເກັບໂຕຝຶກຊ້ອມໃນໄລຍະໜຶ່ງແລ້ວ ທີ່ໂຮງຮຽນພອນສະຫວັນກິລາ-ກາຍະກຳ ບ້ານສີເກີດ ເມືອງນາຊາຍທອງ ນະຄອນຫຼວງວຽງຈັນ ສາມາດຕີລາຄາໄດ້ວ່າ ມີຄວາມພ້ອມເກືອບເຕັມ 100 ເປີເຊັນແລ້ວ ຍັງເຫຼືອພຽງແຕ່ປັບເຕັກນິກ ແລະ ສະມາທິ ຄວາມນິ້ງເຂົ້າໃນການແຂ່ງຂັນຕົວຈິງ ສິ່ງທີ່ຢ້ານທີ່ສຸດສຸດ ໃນເວລາເຂົ້າຮ່ວມແຂ່ງຂັນນັ້ນ ແມ່ນຢ້ານຈະມີອາການບາດເຈັບ ແລະ ອຸປະກອນຈະມີບັນຫາເທົ່ານັ້ນ ແຕ່ມີວິທີປ້ອງກັນ 2 ບັນຫາດັ່ງກ່າວແລ້ວ ສ່ວນຄວາມຫວັງ ຈະພະຍາຍາມສູ້ຊົນສ້າງຜົນງານໃຫ້ອອກມາດີທີ່ສຸດ ແນ່ນອນໃນໂອກາດໄດ້ຕາງໜ້າໃຫ້ແຂວງພໍ່ແມ່ປະຊາຊົນຊາວເມືອງວິລະຊົນດິນແດນທົ່ງໄຫຫີນ ກໍຢາກຈະສ້າງຜົນງານຄວ້າຫຼຽນໃດຫຼຽນໜຶື່ງ ເພື່ອຈາລືກໄວ້ໃຫ້ລູກຫຼານຊາວແຂວງຈົດຈຳຜົນງານຂອງນ້ອງທີ່ສ້າງໄວ້ຕະຫຼອດໄປ.

          ການແຂ່ງຂັນກິລາຍິງທະນູ ຊຽງຂວາງ ເກມ ຄັ້ງນີ້ ເປັນຄັ້ງທຳອິດທີ່ຖືກບັນຈຸເຂົ້າໃນງານກິລາແຫ່ງຊາດ ເຊິ່ງຈະມີການຊີງໄຊກັນທັງໝົດ 10 ຫຼຽນຄຳ, 10 ຫຼຽນເງິນ ແລະ 10 ຫຼຽນທອງ, ໃນນັ້ນ 5 ລາຍການ ປະກອບມີ ປະເພດທະນູຄອມປ່າວ ປະເພດດ່ຽວຍິງ-ດ່ຽວຊາຍ, ທີມຄູ່ປະສົມ, ຄະແນນສະສົມສູງສຸດຂອງບຸກຄົນຍິງ ແລະ ບຸກຄົນຊາຍ ສ່ວນອີກ 5 ລາຍການ ແມ່ນທະນູລີເຄີບ ປະເພດດ່ຽວຍິງ-ດ່ຽວຊາຍ, ທີມຄູ່ປະສົມ, ຄະແນນສະສົມສູງສຸດຂອງບຸກຄົນຍິງ ແລະ ບຸກຄົນຊາຍ ໂດຍມີ 6 ແຂວງ, 1 ກະຊວງ ແລະ 1 ນະຄອນຫຼວງ ແຈ້ງເຈດຈຳນົງເຂົ້າຮ່ວມຊີງໄຊ ປະກອບມີ ເຈົ້າພາບ ແຂວງຊຽງຂວາງ, ນະຄອນຫຼວງ, ກະຊວງປ້ອງກັນຄວາມສະຫງົບ ຫຼື ປກສ, ແຂວງອຸດົມໄຊ, ແຂວງຫຼວງນໍ້າ, ແຂວງອັດຕະປື, ແຂວງສະຫວັນນະເຂດ ແລະ ແຂວງໄຊສົມບູນ, ໃນນັ້ນ ສະເພາະເຈົ້າພາບ ສົ່ງນັກກິລາເຂົ້າຮ່ວມ 5 ຄົນ, ຍິງ 2 ຄົນ ລົງແຂ່ງຂັນຄົບທຸກລາຍການ.

ສຳລັບຜົນງານຂອງ ທ້າວ ທະນົງລິດ ສີລິຜົນ ໄດ້1ຫຼຽນທອງແດງ ລາຍການມິກທີມຊາຍ-ຍິງ ທະນູທົດກຳລັງ ຫຼື ຄອມປ່າວ ລາຍການ ຊິງແຊມນາໆຊາດຢູ່ນະຄອນຢ່າງກຸ້ງ ສະຫະພາບ ມຽນມາ ເມື່ອປີ 2008, ຄວ້າ 3 ຫຼຽນເງິນ ງານມະຫະກຳກິລາມະຫາວິທະໄລລາວ ລາຍການດ່ຽວຊາຍ ທີມຊາຍ ມິກທີມຊາຍ-ຍິງ (ປະເພດທະນູທົດກຳລັງ) ແລະ ທະນູຄອມປາວ ເມື່ອປີ 2012 ແລະ ຄວ້າຫຼຽນເງິນ ລາຍການ ຊິງແຊມນາໆຊາດຢູ່ນະຄອນຢາງກຸ້ງ ສະຫະພາບ ມຽນມາ ລາຍການທີມຊາຍ (ທະນູທົດກຳລັງ) ເມື່ອປີ  2016.

ໂດຍ: ປາກກາດຳ