ລາຍລະອຽດຂ່າວ
ໄຊສົມພອນ ຕ້ອງການ 2 ຢ່າງ ເສີມຄວາມແຂງແກ່ນ ກ່ອນຈະປ້ອງກັນແຊ໋ມຫຼຽນຄຳ ຊຽງຂວາງ ເກມ
ຂຽນເມື່ອ: 24/02/2020 14:02 | ໂດຍ: ເພຣເມັກເກີ | ອ່ານ: 189 ຄັ້ງ

          ທ້າວ ໄຊສົມພອນ ວົງປະຈິດ ນັກກິລາດອກປີກໄກ່ ມື 2 ຂອງລາວ ທັງເປັນເຈົ້າຂອງແຊ໋ມເກົ່າ ຫຼຽນຄຳ ງານກິລາ ອຸດົມໄຊ ເກມ 2014 ຕ້ອງການຝຶກຊ້ອມເພີ້ມອີກ 2 ຢ່າງ ກໍຄື ຟື້ນພະລະກຳລັງ ແລະ ຮຽນຮູ້ເທັນນີກທາງດ້ານວິທະຍາສາດການກິລາ ເສີມຄວາມແຂງແກ່ນ ສ້າງຄວາມໝັ້ນໃຈເຂົ້າຮ່ວມປ້ອງກັນແຊ໋ມ ຫຼຽນຄຳ ໃນງານມະຫະກຳກິລາແຫ່ງຊາດ ຄັ້ງທີ Xl ຫຼື ຊຽງຂວາງ ເກມ ທີ່ແຂວງຊຽງຂວາງ ເປັນເຈົ້າພາບ ລະຫວ່າງວັນທີ 22 ມີນາ ຫາ 1 ເມສານີ້ ສະໄໝທີ 2 ແລະ ເປັນຫຼຽນຂອງຂວັນລາງວັນເພື່ອຄວາມພາກພູມໃຈໃຫ້ແກ່ພໍ່ແມ່ປະຊາຊົນຊາວ ນະຄອນຫຼວງ ກໍຄື ທັບນັກກິລາ ນະຄອນຫຼວງ ເພື່ອລຸ້ນທວງຄວາມຍິ່ງໃຫຍ່ ຄອງເຈົ້າຫຼຽນຄຳ ໃນງານກິລາແຫ່ງຊາດດັ່ງກ່າວ.

          ຕາມການໃຫ້ສຳພາດຂອງ ທ້າວ ໄຊສົມພອນ ວົງປະຈິດ ນັກກິລາດອກປີກໄກ່ທີມຊາດລາວ ທັງເປັນ ມື 2 ຂອງ ສປປ ລາວ ເຈົ້າຂອງຫຼຽນຄຳ ອຸດົມໄຊ ເກມ ໃຫ້ສຳພາດວ່າ: ປັດຈຸບັນຕົນເອງ ມີກຳລັງໃຈສູງຫຼາຍ ພາຍຫຼັງທີ່ໄດ້ເກັບຕົວຝຶກຊ້ອມາເປັນເວລາ 3 ເດືອນເຕັມ ໂດຍມີຄວາມພ້ອມເກືອບເຕັມຮ້ອຍແລ້ວ ຄວາມຕ້ອງການຍັງພຽງແຕ່ຕ້ອງຝຶກຊ້ອມເອົາພະລະກຳລັງ ແລະ ຮຽນຮູ້ເທັນນີກທາງດ້ານວິທະຍາສາດການກິລາ ຈາກຜູ້ຊຽວຊານ ກໍຄື ຄູຝືກສອນ ເພື່ອນຳມາເສີມຄວາມແຂງແກ່ນ ແລະ ສ້າງຄວາມໝັ້ນໃຈ ກ່ອນເຂົ້າຮ່ວມປ້ອງກັນແຊ໋ມ ຫຼຽນຄຳ ສະໄໝທີ 2 ເພື່ອກາຍເປັນສະຖິຕິໃນແກ່ຕົນເອງ ໃນການງານກິລາລະດັບຊາດ ອີກຢ່າງ ກໍຢາກໃຫ້ເປັນຫຼຽນຄຳຂອງຂວັນລາງວັນເພື່ອມອບໃຫ້ແກ່ພໍ່ແມ່ປະຊາຊົນຊາວ ນະຄອນຫຼວງ ໄດ້ມີຄວາມພາກພູມໃຈ ກໍຄື ຊ່ວຍໃຫ້ທັບນັກກິລາ ນະຄອນຫຼວງ ເພື່ອລຸ້ນທວງຄວາມຍິ່ງໃຫຍ່ ຄອງເຈົ້າຫຼຽນຄຳ ໃນງານກິລາ ຊຽງຂວາງ ຄັ້ງນີ້ ອີກດ້ວຍ. ແນວໃດກໍຕາມ, ໃນສ່ວນຕົວແລ້ວ ກໍບໍ່ຢາກປະມາດ ເພາະກິລາດອກປີກໄກ່ ໃຜຝຶກຊ້ອມດີ ແລະ ມີຄູຝືກຊ່ວຍບອກສອນ ກໍມີໂອກາດແຈ້ງເກີດ ໂດຍສະເພາະ ມື 1 ລາວ ທ້າວ ວິຊຸນນະລາດ ພິຈິດ ປີນີ້ ໄດ້ລົງຫຼິ້ນໃຫ້ກະຊວງພະລັງງານ ແລະ ບໍ່ແຮ່ ຖືເປັນຄູ່ປັບຕະຫຼອດການ ແລະ ເປັນຄູ່ແຂ່ງຂັນສຳຄັນ ສະນັ້ນ ໃນໄລຍະມີເວລາທີ່ເຫຼືອກໍຈະພະຍາຍາມຝຶກຊ້ອມ ແລະ ສຶກສາຜົນການແຂ່ງຂັນກັບ ວິຊຸນນະລາດ ທີ່ຜ່ານມາ ນຳມາປັບປຸງແກ້ໄຂ ເພື່ອຮັບປະກັນໃນການປ້ອງກັນແຊ໋ມ ໃຫ້ປະສົບຜົນສຳເລັດດັ່ງທີ່ຕັ້ງໃຈໄວ້.  

          ການແຂ່ງຂັນກິລາດອກປີກໄກ່ ຊຽງຂວາງ ເກມ ແມ່ນເລີ່ມແຂ່ງຂັນລະຫວ່າງວັນທີ 23-30 ມີນາ 2020 ເຊິ່ງຈະມີການຊີງໄຊກັນທັງໝົດ 7 ລາຍການ ປະກອບມີ ປະເພດດ່ຽວຍິງ-ດ່ຽວຊາຍ, ທີມຄູ່ຍິງ-ທີມຄູ່ຊາຍ, ທີມຊຸດ ແລະ ທີມປະສົມ ກຳນົດເງື່ອນໄຂໃຫ້ນັກກິລາລົງແຂ່ງຂັນໄດ້ 2 ລາຍການ ຕໍ່ 1 ຄົນ ສະເພາະນະຄອນຫຼວງ ແມ່ນຈະສົ່ງນັກກິລາ ຈຳນວນ 12 ຄົນ, ຍິງ 5 ຄົນ ລົງແຂ່ງຂັນຄົບທຸກລາຍການ ສ່ວນ ທ້າວ ໄຊສົມພອນ ວົງປະຈິດ ແມ່ນຈະໄດ້ລົງຫຼິ້ນລາຍການດ່ຽວ ແມ່ນ 100 ເປີເຊັນ ສ່ວນອີກ 1 ລາຍການ ຍັງມີການຄັດເລືອກກັນຢູ່ ສ່ວນການປະກົບຄູ່ ໃຜຈະໄດ້ຄູ່ກັບໃຜ ແມ່ນຈະຂໍສະເໜີລາຍງານໃຫ້ຊາບຕາມພາຍຫຼັງ.   

ໂດຍ: ປາກກາດຳ




ຂ່າວຍອດນິຍົມ 7 ວັນລ່າສຸດ
ຂ່າວລ່າສຸດ