ລາຍລະອຽດຂ່າວ
ໄອກິໂດຈາກຍີ່ປຸ່ນ ເຂົ້າພົບປະ ການນຳກົມກິລາລະດັບສູງ ພາຍຫຼັງສຳເລັດກິດຈະກຳ ໃນອາທິດທີ່ຜ່ານມາ
ຂຽນເມື່ອ: 17/02/2020 16:02 | ໂດຍ: ເພຣເມັກເກີ | ອ່ານ: 159 ຄັ້ງ

      ເມື່ອວັນທີ 17 ກຸມພາ ຜ່ານມາ ທີ່ຫ້ອງປະຊຸມ ກົມກິລາລະດັບສູງ ກະຊວງສຶກສາທິການ ແລະ ກິລາ (ຕຶກເດິ່ນບານເຕະເຈົ້າອານຸວົງ) ທ່ານ ພົມມະລາດ ພວງມະຈັນ ຫົວໜ້າສະໂມສອນກິລາໄອກິໂດແຫ່ງຊາດລາວ ພ້ອມດ້ວຍຄະນະ ໄດ້ພາ ທ່ານ ໄຮໂຣຢູກິ ຊາກາຣິ ຄູຝຶກກິລາໄອກິໂດ ຈາກປະເທດຍີ່ປຸ່ນ ໄດ້ເຂົ້າພົບປະ ແລະ ລາຍງານການເຄື່ອນໄຫວການຝຶກອົບຮົມ ແລະ ຍົກລະດັບນັກກິລາລາວ ໃຫ້ແກ່ ກົມກິລາລະດັບສູງ ກະຊວງສຶກສາທິການ ແລະ ກິລາ. ໃຫ້ກຽດຕ້ອນຮັບໂດຍ ທ່ານ ປອ ສອນເພັດ ພັນດານຸວົງ ຫົວໜ້າພະແນກຄຸ້ມຄອງຂໍ້ມູນກິລາລະດັບສູງ ແລະ ທ່ານ ບຸນມາ ທຳມະວົງ ຫົວໜ້າພະແນກພັດທະນາກິລາ ກົມກິລາລະດັບສູງ ກະຊວງສຶກສາທິການແລະ ກິິລາ.

      ໂອກາດດັ່ງກ່າວ, ທ່ານ ພົມມະລາດ ພວງມະຈັນ ກໍ່ໄດ້ລາຍງານການມາພົບປະໃຫ້ຄັ້ງນີ້ ແມ່ນເພື່ອມາລາຍງານກິດຈະກຳທີ່ຈັດຂຶ້ນ ໃນວັນທີ 14-17 ກຸມພາ ຜ່ານມາ. ໂດຍ  ທ່ານ ໄຮໂຣຢູກິ ຊາກາຣິ ຄູຝຶກກິລາໄອກິໂດ ຈາກປະເທດຍີ່ປຸ່ນ ໄດ້ມາຈັດອົບຮົມ ແລະ ຍົກລະດັບກິລາໄອກິໂດ ໃຫ້ແກ່ຄູຝຶກ ແລະ ນັກກິລາຂອງລາວເຮົາ. ນອກຈາກນັ້ນ ຍັງໄດ້ມີການສອບເສັງທຽບສາຍດຳ ຊຶ່ງນັກກິລາ 8 ຄົນສາມາດສອບເສັງທຽບສາຍໄດ້ທັງມົດ ປະກອບມີ ສາຍດຳ ຂັ້ນ 1 ໄດ້ 3 ຄົນ, ສາຍດຳຂັ້ນ 2 ໄດ້ 3 ຄົນ ແລະ ສາຍດຳຂັ້ນ 3 ໄດ້ 2 ຄົນ. ຖືວ່າ ກິດຈະກຳໃນຄັ້ງນີ້ ແມ່ນສາມາດສຳເລັດຕາມເປົ້າໝາຍ ແລະ ທ່ານ ໄຮໂຣຢູກິ ຊາກາຣິ ກໍ່ຈະໄດ້ເດີນທາງກັບປະເທດໃນມື້ນີ້. ສະນັ້ນ ຈຶ່ງໄດ້ມາພົບປະ ແລະ ຢຽມຢາມ ຄະນະກົມກິລາລະດັບສູງ ແລະ ແລກປ່ຽນບົດຮຽນນຳ ເພື່ອຈະໄດ້ນຳໄປພັດທະນາກິລາໄອກິໂດ ໃນຕໍ່ໜ້າ. ພ້ອມກັນນັ້ນ, ຍັງປຶກສາຫາລືກ່ຽວກັບການຍົກລະດັບສະໂມສອນກິລາໄອກິໂດແຫ່ງຊາດລາວ ໃຫ້ມາເປັນ ສະຫະພັນກິລາໄອກິໂດແຫ່ງຊາດລາວ ໃຫ້ອານາຄົດ.

       ຂະນະທີ່ ທ່ານ ປອ ສອນເພັດ ພັນດານຸວົງ ກໍ່ໄດ້ກ່າວຊົມເຊີຍໃນການປະກອບສ່ວນ ແລະ ພັດທະນາກິລາໄອກິໂດລາວ ຂອງ  ທ່ານ ໄຮໂຣຢູກິ ຊາກາຣິ ແລະ ຫວັງວ່າ ໃນອານາຄົດຈະໄດ້ຮັບການຊ່ວຍເຫຼືອ ແລະ ສະໜັບສະໜູນເລື່ອງກິດຈະກຳແບບນີ້ອີກ.

ໂດຍ: ວັນສົດໃສ




ຂ່າວຍອດນິຍົມ 7 ວັນລ່າສຸດ
ຂ່າວລ່າສຸດ