ລາຍລະອຽດຂ່າວ
ເຈົ້າພາບ ຕັ້ງເປົ້າບໍ່ໃຫ້ຫຼຸດ 38 ຫຼຽນຄໍາ ຊຽງຂວາງ ເກມ 2020, ສ່ວນສະໜາມເປີດ-ປິດ ສ້າງສໍາເລັດ 100 ເປີເຊັນ
ຂຽນເມື່ອ: 17/02/2020 16:02 | ໂດຍ: ເພຣເມັກເກີ | ອ່ານ: 258 ຄັ້ງ

      ທັບນັກກິລາ ແຂວງຊຽງຂວາງ ເຈົ້າພາບ ງານມະຫະກໍາກິລາແຫ່ງຊາດ ຄັ້ງທີ Xl ຫຼື ຊຽງຂວາງ ເກມ ທີ່ແຂວງຊຽງຂວາງ ເປັນເຈົ້າພາບ ລະຫວ່າງວັນທີ 22 ມີນາ ຫາ 1 ເມສາ 2020 ຈະສົ່ງຄະນະນໍາ, ຄູຝຶກ ແລະ ນັກກິລາ ຈຳນວນ 600 ກວ່າຄົນ ພ້ອມທັງຕັ້ງເປົ້າຈະສູ້ຊົນບໍ່ໃຫ້ຫຼຸດ 38 ຫຼຽນຄໍາ, 32 ຫຼຽນ ແລະ 41 ຫຼຽນທອງ ແລະ ໃຫ້ຕິດ 1 ໃນ 9 ຂອງຕາຕະລາງສະຫຼຸບຫຼຽນ ຂະນະທີ່ ສະໜາມເປີດ-ປິດ ສ້າງສໍາເລັດແລ້ວ 100%.

      ໂອກາດນີ້, ທ່ານ ບຸນຕົ້ນ ຈັນທະພອນ ເຈົ້າແຂວງໆຊຽງຂວາງ ທັງເປັນປະທານຄະນະກຳມະການຈັດງານ ມະຫະກໍາກິລາແຫ່ງຊາດ ຄັ້ງທີ Xl ໃຫ້ສໍາພາດຕໍ່ທີມຂ່າວ ເສດຖະກິດການຄ້າ ເມື່ອອາທິດທີ່ຜ່ານມາວ່າ: ດັ່ງທີ່ຮູ້ ແຂວງຊຽງຂວາງ ກຽມເປັນເຈົ້າພາບຈັດ 3 ງານໃຫຍ່ລະດັບຊາດກໍ່ຄື: ງານສະເຫຼີມສະຫຼອງ ທົ່ງໄຫຫີນ ເຂົ້າເປັນມໍລະດົກໂລກ, ງານສະເຫຼີມສະຫຼອງ ວັນສ້າງຕັ້ງພັກ ປະຊາຊົນ ປະຕິວັດລາວ ແລະ ງານມະຫາກໍາກີລາແຫ່ງຊາດ ຄັ້ງທີ 11 ເຊິ່ງຜ່ານການກວດກາແມ່ນໄດ້ກະກຽມຄວາມພ້ອມແລ້ວ ໂດຍສະເພາະສະໜາມເປີດ-ປິດ ງານກີລາໄດ້ສ້າງສໍາເລັດແລ້ວ ເຫຼືອແຕ່ການປັບປຸງພື້ນສະໜາມ ແລະ ບົວລະວັດ ເພາະກ່ອນໜ້ານີ້ອຸ່ນຫະພູມຫຼຸດລົງເຖິງ 0 ອົງສາ ເຮັດໃຫ້ຫຍ້າຫົດຕົວ ແລະ ຈໍານວນໜຶ່ງກໍຕ່າຍໄປ ເຮັດໃຫ້ການບົວລະບັດເປັນໄປດ້ວຍຄວາມຍາກລໍາບາກ ແລະ ມາຮອດປັດຈຸບັນອາກາດດີຂຶ້ນ ເຮັດໃຫ້ຫຍ້າເລີ່ມຂຽວ.

      ຂະນະດຽວກັນ ທ່ານ ທອງສີ ພັນທະວົງ ຮອງຫົວໜ້າພະແນກສຶກສາການ ແລະ ກິລາ ແຂວງຊຽງຂວາງ, ທັງເປັນຄະນະກອງເລຂາ ແລະ ຫົວໜ້າອະນຸກໍາມະກາເນື້ອໃນ ລາຍງານເພີ່ມຕື່ມວ່າ: ພື້ນຖານໂຄ່ງລ່າງມາຮອດປັດຈຸບັນ ກໍາລັງກວດກາເຊັກກຽມມອບຮັບສະໜາມເປີດ-ປິດ ໃນໄວໆນີ້ ລວມເຖິງສະໜາມອື່ນກໍຂຸ້ນຂ້ຽວກວດກາຢ່າງຮີບດ່ວນ ແລະ ໃຫ້ຈະສໍາເລັດແລ້ວ, ດັ່ງທີ່ຮູ້ວ່າ ງົບປະມານຂອງລັດຖະບານ ມີຄວາມເບາະບາງ, ຈິ່ງໄດ້ສະເໜີຂໍງົບຈາກພາກເອກະຊົນ ມາສ້າງສະໜາມເພີ່ມຕື່ມອີກ 6 ສະໜາມໄດ້ແກ່ ສະໜາມບານສົ່ງໃນຮົ່ມ, ສະໜາມຍິງປືນ, ສະໜາມກ໊ອຟ, ໂບລີ້ງ, ເປຕັງ ແລະ ສະນຸກເກີ ສ່ວນທາງດ້ານພື້ນຖານໂຄ່ງລາງ ເປັນຕົ້ນແມ່ນເສັ້ນທາງ ເຂົ້າສະໜາມເປີດ-ປິດ ແມ່ນມີການກໍ່ສ້າງສໍາເລັດແລ້ວ 100% ເຊິ່ງມີ 2 ເສັ້ນທາງທີ່ສາມາດເຂົ້າສະໜາມດັ່ງກ່າວໄດ້ ໂດຍໄດ້ມີການປູກຕົ້ນໄມ້ຕາມແຄມເສັ້ນທາງ ແລະ ຍັງໄດ້ຕິດຕັ້ງຕາຄ່າຍໄຟຟ້າ ໄຟເຍືອງທາງເຂົ້າສະໜາມດັ່ງກ່າວ, ສ່ວນສະຖານທີ່ພັກຂອງນັກກິລາ ແລະ ຄູຝຶກ ພວກເຮົາໄດ້ກໍານົດເອົາ 27 ແຫ່ງ ເຊິ່ງພວກເຮົາໄດ້ມີການກວດກາ ແລະ ປະມູນການປັບປຸງໄປສໍາເລັດໄປແລ້ວ 19 ແຫ່ງ ຄາດວ່າທ້າຍເດືອນກຸມພານີ້ ຈະສໍາເລັດຢ່າງສົມບູນ ແລະ ວັນທີ 13-14 ມີນາ 2020 ຈະເປີດນໍາໃຊ້ສະໜາມທີ່ພັກຢ່າງເປັນທາງການ ” ທ່ານ ທະວົງສີ ພັນທະວົງ ກ່າວ.

      ທ່ານ ທະວົງສີ ພັນທະວົງ ກ່າວອີກວ່າ: ຊຽງຂວາງ ເກມ 2020 ມີ 24 ພາກສ່ວນແຈ້ງເຈດຈໍານົງເຂົ້າຮ່ວມປະກອບດ້ວຍ 17 ແຂວງ ກັບ 1 ນະຄອນຫຼວງເຂົ້າຮ່ວມແຂ່ງຂັນ ແລະ 6 ກະຊວງ ສະເພາະແຂວງຊຽງຂວາງ ສົ່ງເຂົ້າຮ່ວມຄະນະນໍາ, ຄູຝຶກ ແລະ ນັກກີລາ 655 ຄົນ ( ຍິງ 274 ຄົນ ) ເຂົ້າຮ່ວມແຂ່ງຂັນ ແລະ ໄດ້ເຂົ້ານອນສູນແຕ່ວັນທີ 15 ມັງກອນ 2020 ສົ່ງເຂົ້າຮ່ວມຄົບ 28 ປະເພດກິລາ ເຊິ່ງທາງຄະນໍາຕັ້ງເປົ້າໄວ້ບໍ່ໃຫ້ຫຼຸດ 38 ຫຼຽນຄໍາ, 32 ຫຼຽນເງິນ ແລະ 41 ຫຼຽນທອງ ລວມ 122 ຫຼຽນຄໍາ ຫວັງໃຫ້ຕິດ 1 ໃນ 9 ຂອງຕາຕະລາງຄະແນນສະຫຼຸບຫຼຽນ.

ເນື້ອໃນຂ່າວ ແລະ ຮູບ ໂດຍໄຊຫຼ້າຄຳ,

ຮຽບຮຽງໂດຍ ປາກກາດຳ