ລາຍລະອຽດຂ່າວ
2 ນັກເຕະ ຢູ-15 ລາວ ໂຕໂຢຕ້າ ຮ່ວມຄັດເລືອກຊີງທຶນການສຶກສາ ແລະ ຝຶກບານເຕະ ທີ່ສະຫະລັດອາເມລິກາ
ຂຽນເມື່ອ: 17/02/2020 16:02 | ໂດຍ: ເພຣເມັກເກີ | ອ່ານ: 335 ຄັ້ງ

      ທ້າວ ຄູນທະວີ ທອງມະນີ ແລະ ທ້າວ ດູລະໄນ ແກ້ວມະນີວົງ 2 ນັກເຕະອະດີດລູກສິດ ອາຈານ ບຸນລັບ ເຄນກິດຕິສັກ ອະດີດນັກເຕະທີມຊາດລາວ ຈາກສະໂມສອນ ອາຄາເດມີ້ ວຽງຈັນ ເອັບທີ ທັງເປັນນັກເຕະຮຸ່ນອາຍຸ 15 ປີ ສະໂມສອນ ລາວ ໂຕໂຢຕ້າ ເອັບຊີ ຕິດ 1 ໃນ 11 ຄົນ ໃນໂຄງການຮ່ວມມື ຂອງສະໂມສອນລ໊ອບ ສະເຕດ້ຽມ  ແລະ ສະໂມສອນ ນະຄອນຫຼວງ ຫຼື ວຽງຈັນ ເອັບເອ ໄດ້ອອກເດີນທາງໄປຄັດເລືອກຊີງທຶນການສຶກສາ ແລະ ຝຶກກິລາບານເຕະຂອງໂຄງການ U.S. COLLEGE SPORTS CAMP ASIA TRY OUT ເຊິ່ງເປັນໂຄງທີ່ຈະຄັດເອົານັກກີລາດີເດັ່ນທີ່ດີທີ່ສຸດ 1 ຄົນ ໄປຝຶກບານເຕະ ແລະ ສຶກສາຕໍ່ທີ່ ສະຫະລັດອາເມຣິກາ ທເຊິ່ງຈະຈັດຂຶ້ນທີ່ສະໜາມກີລາແຫ່ງຊາດປະເທດໄທ ນະຄອນຫຼວງບາງກອກ ປະເທດໄທ ລະຫວ່າງວັນທີ 15-16 ກຸມພາ 2020.

      ທ້າວ ຄູນທະວີ ທອງມະນີ ບອກວ່າ: ຫຼານໄດ້ເຕະມາຕັ້ງແຕ່ອາຍຸ 7 ປີ ປັດຈຸບັນ ກໍອາຍຸ 13 ປີແລ້ວ ຮູ້ສືກເປັນກຽດ ແລະ ພາກພູມໃຈຫຼາຍ ທີ່ໄດ້ຕາງໜ້າເຍົາວະຊົນລາວ ເຂົ້າຮ່ວມກິດຈະກຳດັ່ງກ່າວ ແລະ ຂໍຂອບໃຈມາຍັງໂຮງຮຽນນິລະດາ ແລະ ຄອບຄົວ ໂດຍສະເພາະແມ່ນພໍ່ ເຊິ່ງຍາມໃດກໍໄດ້ທຸ້ມເທສົ່ງເສີມຕະຫຼອດມາ ຂໍໃຫ້ເຊື່ອໝັ້ນວ່າ ລູກຈະຕັ້ງໃຈ ແລະ ທຸ້ມເທຢ່າງສຸດຄວາມສາມາດ ສົມດັ່ງເຫື່ອແຮງພໍ່ທີ່ໄດ້ຊຸກຍູ້ລູກມີປະສົບການໄລຍະທີ່ຜ່ານມາ ກໍຄື ກຽມສະພາບຮ່າງກາຍ, ເທັກນິກທັກສະທີ່ຮຽນມາ ເພື່ອນຳໃຊ້ໃຫ້ເກີດເປັນໂຫຍດສູງສຸດ ກໍຄື ເຂົ້າຮ່ວມຍາດໂຄຕ້າໃນຄັ້ງນີໃຫ້ໄດ້.​

      ຂະນະທີ່ທ້າວ ດູລະໄນ ແກ້ວມະນິວົງ ກໍໄດ້ບອກວ່າ: ຫຼານຮູ້ສືກດີ ແລະ ພາກພູມໃຈຫຼາຍທີ່ຖືກເລືອກໃຫ້ໄປເຂົ້າຮ່ວມຄັດເລືອກຊີງທຶນການສຶກສາໃນຄັ້ງນີ້ ສະນັ້ນ ເພື່ອເຮັດໃຫ້ປະສົບຜົນສຳເລັດ ໃຫ້ໄດ້ຕິດ 1 ໃນ 3 ກໍຈະນຳໃຊ້ຄວາມສາມາດຂອງຕົນເອງທີ່ໄດ້ຮຽນຮູ້ມາແຕ່ນ້ອຍ ກໍຄື ທັກສະໃນການຈັບບານ ສົ່ງບານ ແລະ ສະແດງເທັກນິກ,​ ທັກສະຕ່າງໆ ເພື່ອສະແດງໃນກິດຈະກຳໃນຄັ້ງນີ້ ໃຫ້ເພີ່ນໄດ້ເຫັນ ແລະ ຮັບຮູ້ ວ່າເດັກນ້ອຍຄົນລາວ ກໍມີຄວາມສາມາດບໍ່ແພ້ເດັກນ້ອຍຄົນຈາກຊາດໃດໆ.

      ສຳລັບຜົນງານຂອງນ້ອງໆ ທັງສອງ ທີ່ຜ່ານມາ ແມ່ນບໍ່ທຳມະດາ ໂດຍສະເພາະເປັນເດັກສ້າງຂອງອາຈານ ບຸນລັບ ເຄນກິດຕິສັກ ອະດີດນັກເຕະບານທີມຊາດລາວ ໂດຍໄດ້ຕາງໜ້າເຍົາວະຊົນລາວ ຄວ້າແຊ໋ມ ລາຍການທີ່ສ ເກົາຫຼີ ເມື່ອປີ 2016 ແລະ ພາທີມ ນະຄອນຫຼວງ ຮຸ່ນອາຍຸ 12 ປີ ຄວ້າອັນດັບທີ 2 ລາຍການ ນາໆຊາດ ຮຸ່ນອາຍຸ 12 ປີ ທີ່ນະຄອນຫຼວງ ບາງກອກ ປະເທດໄທ ເມື່ອປີ 2019 ແລະ ຫຼ້າສຸດ ທ້າວ ຄູນທະວີ ທອງມະນີ ກໍພາທີມດີເຄ ຄວ້າແຊ໋ມ ເຕະບານ ຢູ-14 ປີ ທີ່ສປ ຈີນ ເມື່ອກາງປີ 2019 ກ່ອນທີ່ທັງສອງ ຈະພາທີມລາວ ໂຕໂຢຕ້າ ຄວ້າອັນດັບທີ 4 ລາຍການ ເຕະບານ ຢູ-15 ຊີງຂັນປະທານສະຫະພັນບານເຕະແຫ່ງຊາດ ເມື່ອທ້າ່ຍປີ 2019

      ສ່ວນການໄປຄັ້ງນີ້ແມ່ນ ໄດ້ມີການຄັດເລືອກເອົານັກກິລາຮຸ່ນອາຍຸບໍ່ເກີນ 12 - 18 ປີ ຈາກສະໂມສອນ ລ໋ອບ ສະເຕດ້ຽມ ສົມທົບກັບ ວຽງຈັນ ເອັຟເອ ລວມທັງໝົດມີ 11 ຄົນ ເພື່ອໄປຮ່ວມຄັດເລືອກໃນໂຄງການດັ່ງກ່າວ ຈະຈັດຂຶ້ນ ລະຫວ່າງວັນທີ 15-16 ກຸມພາ 2020 ທີ່ສະໜາມກີລາແຫ່ງຊາດປະເທດໄທ ຫົວໝາກ ໂດຍຈະມີນັກກີລາຈາກສະໂມສອນໃນປະເທດໄທ ທີ່ຄວ້າມາຮ່ວມຄັດເລືອກຫຼາຍກວ່າ 100 ຄົນ ເຊິ່ງການຄັດເລືອກແມ່ນຈະໄດ້ຮັບການຝຶກສອນຈາກຄູຝຶກທີ່ມີປະສົບການ ແລະ ຈະມີການຈັດທີມແບ່ງກັນແຂ່ງຂັນ ເພື່ອຄັດເອົານັກເຕະທີ່ດີທີ່ສຸດ 1 ຄົນໃນແຕ່ລະຮຸ່ນ ເພື່ອຄວ້າທຶນການສຶກສາ ແລະ ຝຶກບານເຕະ 100% ໄປທັດສະນະສຶກສາຕໍ່ທີ່ສະຫະລັດອາເມຣິກາ.

   ໂດຍ: ປາກກາດຳ