ລາຍລະອຽດຂ່າວ
ຮູກັງ ຢູໄນເຕັດ ຈາກສິງກະໂປ ບຸກຊະນະ 3-1 ລາວໂຕໂຢຕ້າ ເຕະບານ ເອເອັບຊີ ຄັບ 2020
ຂຽນເມື່ອ: 12/02/2020 12:02 | ໂດຍ: ເພຣເມັກເກີ | ອ່ານ: 174 ຄັ້ງ

       ກ່ອນການແຂ່ງຂັນຫົວໜ້າຄູຝຶກສະໂມສອນ ຫູກັງ ຢູໄນເຕັດ ຈາກສິງກະໂປບອກວ່າ ການເຂົ້າຮ່ວມການແຂ່ງຂັນໃນເທື່ອນີ້ເປັນຄັ້ງທຳອິດຂອງສະໂມສອນທີ່ເຂົ້າຮ່ວມການແຂ່ງຂັນລະດັບນາໆ ຊາດແລະທີມຕົນຈະຂໍໍເອົາການແຂ່ງຂັນນີ້ເປັນເວລາທີຫາປະສົບການໃຫ້ກັບ ນັກເຕະພາຍໃນສະໂມສອນ

       ພໍແຕ່ກຳມະການເປົ່າໝາກຫວີດເລີ່ມການແຂ່ງຂັນ ສະໂມສອນ ຫູກັງ ຢູໄນເຕັດ ກໍ່ເປັນຝ່າຍເປີດເກມບຸກເຂົ້າໃສ່ ເຈົ້າຖິ່ນລາວໂຕໂຢຕ້າ ທັນທີ ແຕ່ ກໍ່ບໍ່ສາມາດເຮັດຫຍັງໄດ້, ເມື່ອເກມຜ່ານໄປໄດ້ 10 ນາທີ ກໍ່ເປັນທາງ ສະໂມສອນ ລາວໂຕໂຢຕ້າ ເອັບຊີ ແຊ້ມລາຍການລີກສູງສຸດຂອງ  ລາວ ຫຼື  ເປບຊີ ລາວພຣີເມຍລີກ ລະດູການ 2019 ຕັ້ງເກມໄດ້ ແລະເປັນຝ່າຍຄອງບານໄດ້ເໜືອກວ່າ ແລະ ມາເຖິງນາທີໆ 15 ໂກລັນ ເຈີໂກວີກ (Goran Jerkovic) ຂຶ້ນໂໝ່ງບານດັກລົງພື້ນສຽບຕາໜ່າງໃຫ້ ເຈົ້າຖິ່ນ ຂຶ້ນນໍາໄປກ່ອນ 1-0. ຈາກນັ້ນ ລາວ ໂຕໂຢຕ້າ ເອັບຊີ ກໍເປີດເກມບຸກໄດ້ດີຢ່າງຕໍ່ເນື່ອງ ແລະ ມີໂອກາດຫຼາຍຄັ້ງແຕ່ໜ້າເສຍຍິງບໍ່ເຂົ້າເປົ້າ ແລະ ພາດເອງ ຈາກນັ້ນ ກໍເປັນທີມຈາກ ສິງກະໂປ ທີ່ຕັ້ງກຳແພງຢ່າງໜ໊ຽວແໜ້ນ ແລະ ອາໄສສວນກັບ ຈົນມາເຖິງນາທີໆ 39 ໄລ່ຕີສະເໝີໄດ້ສຳເລັດ 1-1 ປະຕູ ຈາກການຍິງຂອງ Charles Machell ກ່ອນຈົບເຄິ່ງເວລາທໍາອິດຍັງສະເໝີກັນ 1-1 ປະຕູ.

      ກັບເຂົ້າມາຫຼິ້ນໃນເຄິ່ງເວລາທີ 2 ເລີ່ມເກມພຽງ 8 ນາທີ ທີມຈາກສິງກະໂປ ກໍເຮັດໃຫ້ກອງເຊຍ ເຈົ້າຖິ່ນ ມິດໃນທົ່ວສະໜາມ ຂຶ້ນນໍາ 2-1 ຈາກຈັງຫວະສວນກັບທາງດ້ານກາງ ແລະ ເປັນ Stipe Plazibat ຫຼຸດດ່ຽວກ່ອນຈະຍິງເໜືອຊັ້ນຂ້າມຫົວຂອງ ສຸກທະວີ ສູນດາລາ ຜູ້ຮັກສາປະຕູຂອງ ລາວ ໂຕໂຢຕ້າ ເອັບຊີ ທີ່ແລ່ນອອກມາຕັດບານແຕ່ກັບຕົວບໍ່ທັນ. ເຖິງຢ່າງໃດກໍ່ຕາມ, ລາວໂຕໂຢຕ້າ ເອັບຊີ ກໍພະຍາມບຸກຢ່າງຕໍ່ເນື່ອງ ແຕ່ຖີ້ມໂອກາດໄປຫຼາຍຄັ້ງ ກ່ອນທີ່ນາທີ 82 ຈະມາເສຍຈຸດໂທດ ແລະ ເປັນ Stipe Plazibat ຮັບໜ້າທີ່ສັງຫານບໍ່ພາດ ຊ່ວຍໃຫ້ທີມ Hougang United FC ບຸກມາເອົາຊະນະ ລາວໂຕໂຢຕ້າ ເອັບຊີ ເຖິງຖິ່ນ 3-1 ປະຕູ.

      ສ່ວນຕາຕະລາງການແຂ່ງຂັນນັດຕໍ່ໄປຂອງ ລາວ ໂຕໂຢຕ້າ ເອັບຊີ ມີຄິວໄປຢາມ YANGON UNITED FC ໃນວັນ 25 ກຸມພາ 2020 ທີ່ສະຫະພາບມຽນມາ, ໄປຢາມ Hochiminh City FC ໃນວັນທີ 10 ມີນາ 2020 ທີ່ສສ ຫວຽດນາມ, ຮັບການມາຢາມຂອງ Hochiminh City FC ໃນວັນທີ 15 ເມສາ 2020, ໄປຢາມ Hougang United FC ໃນວັນທີ 29 ເມສາ 2020 ແລະ ຮັບການມາຢາມຂອງ YANGON UNITED FC ໃນວັນທີ 13 ພຶດສະພາ 2020 ທີ່ສະໜາມກິລາແຫ່ງຊາດ (ຫຼັກ16).

ໂດຍ: ປາກກາດຳ

ພາບໂດຍ:Visitthiphong Seanphimmachak




ຂ່າວຍອດນິຍົມ 7 ວັນລ່າສຸດ
ຂ່າວລ່າສຸດ