ລາຍລະອຽດຂ່າວ
ກົມກິລາລະດັບສູງ ອົບຮົບການລົງທະບຽນ IT ໃຫ້ແກ່ 6 ພາກສ່ວນ ກຽມຮ່ວມງານ ຊຽງຂວາງເກມ 2020 ທີ່ແຂວງຊຽງຂວາງ
ຂຽນເມື່ອ: 12/02/2020 10:02 | ໂດຍ: ເພຣເມັກເກີ | ອ່ານ: 176 ຄັ້ງ

     ກົມກິລາລະດັບສູງ ກະຊວງສຶກສາທິການ ແລະ ກິລາ ຈັດອົບຮົບແນະນຳການລົງທະບຽບ IT ໃຫ້ແກ່ 6 ພາກສ່ວນ ກ່ອນເຂົ້າຮ່ວມງານມະຫາກຳກິລາ ແຫ່ງຊາດ ຄັ້ງທີ 11 ທີ່ແຂວງຊຽງຂວາງ ເປັນເຈົ້າພາບ ໃນທ້າຍເດືອນມີນາ ຈະເຖິງນີ້.

      ເມື່ອວັນທີ 12 ກຸມພາ ຜ່ານມາ ທີ່ຫ້ອງປະຊຸມ ກົມກິລາລະດັບສູງ ກະຊວງສຶກສາທິການ ແລະ ກິລາ ໄດ້ມີການຈັດອົບຮົບແນະນຳການລົງທະບຽນລະບົບ IT ໃຫ້ແກ່ 6 ພາກສ່ວນ ທີ່ກະກຽມເຂົ້າຮ່ວມງານມະຫາກຳກິລາ ແຫ່ງຊາດ ຄັ້ງທີ 11 ທີ່ແຂວງຊຽງຂວາງ ເປັນເຈົ້າພາບ ໃນລະຫວ່າງວັນທີ 22 ມີນາ ຫາ 1 ເມສາ 2020 ຂຶ້ນ. ໃຫ້ກຽດເປັນປະທານໂດຍ ທ່ານ ສິງຄຳ ນາລິນ ຮອງຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ, ທ່ານ ປອ ສອນເພັດ ຈັນດານຸວົງ ຫົວໜ້າພະແນກຄຸ້ມຄອງຂໍ້ມູນກິລາລະດັບສູງ ກະຊວງສຶກສາທິການ ແລະ ກິລາ ທັງເປັນວິທະຍາກອນ ພ້ອມດ້ວຍທີມງານຂອງພະແນກ, ມີນັກສຳມະນາກອນທີ່ມາຈາກ 6 ພາກສ່ວນ ປະກອບມີ ກະຊວງປ້ອງກັນຄວາມສະຫງົບ, ກະຊວງປ້ອງກັນປະເທດ, ກະຊວງພະລັງງານ ແລະ ບໍ່ແຮ່, ກະຊວງສາທາລະນະສຸກ, ກະຊວງວິທະຍາສາດ ແລະ ເຕັກໂນໂລຊີ ແລະ ສະຫະພັນກຳມະບານລາວ ເຂົ້າຮ່ວມທັງໝົດ 14 ທ່ານ ເປັນຍິງ 2 ທ່ານ.

          ໂອກາດດັ່ງກ່າວ, ທ່ານ ສິງຄຳ ນາລິນ ກໍ່ໄດ້ກ່າວຕ້ອນຮັບບັນດານັກສຳມະນາກອນທີ່ເຂົ້າມາຮ່ວມໃນຄັ້ງນີ້ ແລະ ຫວັງວ່າ ການອົບຮົບດັ່ງກ່າວ ຈະເຮັດໃຫ້ບັນດາທ່ານທັງໝົດ 6 ພາກສ່ວນ ຈະເຂົ້າໃຈໄດ້ດີ ໃນການລົງທະບຽບຕ່າງໆ ເພື່ອເຂົ້າຮ່ວມງານມະຫາກຳກິລາແຫ່ງຊາດ ຄັ້ງທີ 11 ທີ່ແຂວງຊຽງຂວາງ ເປັນເຈົ້າພາບ ໃນທ້າຍເດືອນມີນາ ຈະເຖິງນີ້.

          ສຳລັບ ການອົບຮົບແນະນຳການລົງທະບຽນລະບົບ IT ໃນຄັ້ງນີ້ ແມ່ນຈະດຳເນີນເປັນເວລາ 1 ວັນ ນັກສຳມະນາກອນ ຈະໄດ້ຮຽນຮູ້ການລົງທະບຽບຕ່າງໆ ທັງການອອກບັດ, ແຈ້ງຈຳນວນກິລາເຂົ້າຮ່ວມ ແບບອອນໄລ. ຊຶ່ງລະບົບນີ້ ແມ່ນສ້າງຂຶ້ນເພື່ອຮອງຮັບການລົງທະບຽນລາຍການແຂ່ງຂັນ, ລາຍຊື່ຜູ້ເຂົ້າຮ່ວມງານມະຫາກໍາກິລາແຫ່ງຊາດ ຄັ້ງທີ 11 ປະຈຳປີ 2020 ທີ່ແຂວງຊຽງຂວາງ. ນອກຈາກນ້ັນ ໃນລະບົບດັ່ງກ່າວ ຍັງເປັນລະບົບທີ່ສ້າງຂຶ້ນເພື່ອລາຍງານຜົນການແຂ່ງຂັນ, ຕາຕະລາງແຂ່ງຂັນຂອງປະເພດຕ່າງໆ, ສະຖານທີ່ແຂ່ງຂັນ ແລະ ອື່ນໆ ເພື່ອອຳນວຍຄວາມສະດວກໃຫ້ແກ່ງານມະຫາກຳກິລາແຫ່ງຊາດ ໃນຄັ້ງນີ້ ເປັນຄັ້ງທຳອິດ.

 

ໂດຍ: ວັນສົດໃສ




ຂ່າວຍອດນິຍົມ 7 ວັນລ່າສຸດ
ຂ່າວລ່າສຸດ