ລາຍລະອຽດຂ່າວ
ຕອນຊຽນ ຄວ້າ 3 ຫຼຽນເງິນ ລາຍການ ກິລາຍົກນໍ້າໜັກ ຊີງແຊ໋ມນາໆຊາດ ເພື່ອສະສົມຄະແນນ ຮ່ວມໂອແລມປິກ 2020
ຂຽນເມື່ອ: 10/02/2020 17:02 | ໂດຍ: ເພຣເມັກເກີ | ອ່ານ: 248 ຄັ້ງ

          ທ້າວ ຕອນຊຽນ ແຊ່ຈ໋າວ ນັກກິລາຍົກນໍ້າໜັກທີມຊາດລາວ ຮຸ່ນນ້ຳໜັກບໍ່ເກີນ 55 ກິໂລກຣາມ ນັກຮຽນຂອງໂຮງຮຽນພອນສະຫວັນກິລາ ສ້າງຜົນງານໄດ້ຢ່າງໂດດເດັ່ນ ຄວ້າ 3 ຫຼຽນເງິນ ຈາກປະເພດຄຣິນແອນເຈກ, ທ່າສະແນັດ ແລະ ລວມຄະແນນຈາກ 2 ທ່າດັ່ງກ່າວ ໃນການແຂ່ງຂັນກິລາຍົກນໍ້າໜັກຊີງແຊ໋ມນາໆຊາດ ຫຼື International Solidarity Championships ລະຫວ່າງວັນທີ 8-12 ກຸມພາ 2020 ທີ່ປະເທດອຸເບກີສະຖານ.

          ຕາມການລາຍງານຂອງ ທ່ານ ນາງ ເຄືອຄຳລີ ລີເຍ່ຍວື ອະດີດເຈົ້າຂອງຫຼຽນຄຳ ປະຫວັດສາດ ກິລາຍົກນໍ້າໜັກຍິງ ງານກິລາຊີເກມ ຫຼື ວຽງຈັນ ເກມ 2009 ທັງເປັນຄູຝຶກຍົກນໍ້າໜັກຂອງໂຮງຮຽນພອນສະຫວັນກິລາ-ກາຍະກຳ ກົມກິລາລະດັບສູງ ກະຊວງສຶກສາທິການ ແລະ ກິລາ ແຈ້ງໃຫ້ຊາບວ່າ: ເປັນໂອກາດທີ່ດີ ແລະ ມີຄວາມພາກພູມໃຈຫຼາຍທີ່ສຸດ ທີ່ໄດ້ເຫັນຜົນງານຂອງລູກສິດ ທ້າວ ຕອນຊຽນ ແຊ່ຈ໋າວ ເປັນນັກຮຽນຂອງໂຮງຮຽນພວກເຮົາ ພຽງຄົນດຽວທີ່ໄດ້ຕາງໜ້າປະເທດຊາດເຂົ້າຮ່ວມແຂ່ງຂັນກິລາຍົກນໍ້າໜັກຊີງແຊ໋ມນາໆຊາດ ຫຼື International Solidarity Championships ລະຫວ່າງວັນທີ 8-12 ກຸມພາ 2020 ທີ່ປະເທດອຸເບກີສະຖານ ໂດຍມີນັກກິລາຈາກຫຼາຍຊາດໃນທົ່ວໂລກເຂົ້າຮ່ວມແຂ່ງຂັນ ເພື່ອລ່າຄະແນນລຸ້ນຍາດເອົາໂຄຕ້າເຂົ້າຮ່ວມງານກິລາ ໂອແລມປີກສາກົນ ທີ່ປະເທດຍີ່ປຸ່ນຮັບກຽດເປັນເຈົ້າພາບ ຈະຈັດຂຶ້ນໃນເດືອນສິງຫາປີນີ້ ແລະ ຜົນງານຂອງ ຕອນຊຽນ ກໍເຮັດໃຫ້ພໍ່ແມ່ປະຊາຊົນຊາວລາວບໍ່ຜິດຫວັງ ສາມາດຍາດໄດ້ 3 ຫຼຽນເງິນ ຈາກປະເພດຄຣິນແອນເຈກ, ທ່າສະແນັດ ແລະ ລວມຄະແນນຈາກ 2 ທ່າດັ່ງກ່າວ ສ່ວນອັບດັບທີ 1 ຂອງທັງສອງທ່າ ແມ່ນຕົກເປັນຂອງນັກກິລາຈາກປະເທດຊາອຸດິດອາລະເບຍ ແລະ ທີ 3 ປະເທດຢູກັນດ່າ ຕໍ່ຜົນງານດັ່ງກ່າວ ຫຼັງຈາກ ຕອນຊຽນ ເດີນທາງກັບມາເຖິງລາວ ກໍຈະໄດ້ສືບຕໍ່ຝຶກຝົນ ຕອນຊຽນ ເພີມຕື່ມອີກ ເຊື່ອວ່າດ້ວຍຄວາມເອົາໃຈໃສ່ ແລະ ຄວາມຂະຫຍັນຈະສາມາດເຮັດໃຫ້ ຕອນຊຽນ ໄປເຖິງຈຸດທີ່ຝັນໄດ້.

          ທ່ານ ນາງ ເຄືອຄຳລີ ລີເຍ່ຍວື ບອກຕື່ມາອີກວ່າ: ພາຍຫຼັງທີ່ໄດ້ມີການສ້າງຕັ້ງໂຮງຮຽນພອນສະຫວັນກິລາ-ກາຍະກຳຂຶ້ນມາແຕ່ປີ 2013 ສາມາດຕີລາຄາໄດ້ສູງ ໂຮງຮຽນພວກເຮົາ ໄດ້ສ້າງນັກກິລາຫຼາຍປະເພດ ປະກອບສ່ວນໃຫ້ວົງການກິລາລາວເຕີບໃຫຍ່ຂະຫຍາຍຕົວຢ່າງກວ້່າງຂວາງ ໂດຍສະເພາະກິລາຍົກນໍ້າໜັກ ທີ່ຫາກໍຕັ້ງ ແລະ ບັນຈຸເຂົ້າຫຼັກສູດການຮຽນການສອນຂອງໂຮງຮຽນ ສາມາດສ້າງນັກກິລາໄດ້ 2 ຮຸ່ນ ກໍຄື 2 ສົກຮຽນ ລວມມີ 4 ຄົນ ແລະ ປັດຈຸບັນກໍມີເຖິງ 8 ຄົນ, ຍິງ 2 ຄົນ ທຸກຄົນແມ່ນໄດ້ເກັບຕົວຝຶກຊ້ອມຢູ່ທີ່ໂຮງຮຽນເປັນຕົ້ນຕໍ ເພື່ອກຽມຄັດເລືອກໄປແຂ່ງຂັນລາຍການ ຊີງແຊ໋ມນາໆຊາດ ເພື່ອສະສົມຄະແນນໄປງານກິລາໂອແລມປີກ 2020 ຈະຈັດຂຶ້ນທີ່ປະເທດກາຊັກສະຖານ ໃນເດືອນເມສານີ້ ອີກດ້ວຍ ເຊິ່ງລາຍການດັ່ງກ່າວ ແມ່ນຈະຄັດເລືອກເອົານັກກິລາຍິງ 1 ຄົນ ແລະ ຊາຍ 1 ຄົນ.

          ສຳລັບຜົນງານໃນການເຂົ້າຮ່ວມງານກິລາ ຍົກນໍ້າໜັກຊີງແຊ໋ມນາໆຊາດ ຫຼື International Solidarity Championships ລະຫວ່າງວັນທີ 8-12 ກຸມພາ 2020 ທີ່ປະເທດອຸເບກີສະຖານ ສປປ ລາວ ໄດ້ສົ່ງນັກກິລາ 1 ຄົນ ກໍຄື ທ້າວ ຕອນຊຽນ ແຊ່ຈ໋າວ ສ່ວນທ່ານ ຄຳຫຼວງ ແກ້ວກາ ເປັນກຳມະການຕັດສິນ ແລະ ທ່ານ ບົວລິນ ແກ້ວວິໄລເກດ ເປັນຄູຝຶກ.  

ໂດຍ: ປາກກາດຳ